ស្រុកមួយនៅតាកែវបង្កើត ពានបាល់ទាត់មិត្តភាព ប្រកួតក្នុងដី និងក្រៅដី

2015-05-25 23:44:25
ចំនួនមតិ 0 | ចំនួនចែករំលែក 0

ចន្លោះមិនឃើញ

ពិតជាមិនធម្មតាមែននៅភូមិត្រាំខ្នារ ខេត្តតាកែវ មានការប្រកួតបាល់ទាត់មួយហៅថា ពានរង្វាន់បាល់ទាត់មិត្តភាពត្រាំខ្នារដែលចូលរួមប្រកួតចំនួន៨ក្រុម និងប្រើរូបមន្តប្រកួតក្នុងដី និងក្រៅដី។

លោក សួន សារឹម ជាប្អូនប្រុសរបស់លោក ឈៀង សារឿន ដែលជាកីឡាករក្នុងក្រុម Slableang FC នៅលីកបាល់ទាត់មិត្តភាពត្រាំខ្នារ បានឲ្យដឹងថា លីកបាល់ទាត់មិត្តភាពត្រាំខ្នារនេះត្រូវបានបង្កើតឡើងតាំងពីឆ្នាំ ២០១៣ ។ រដូវកាលនេះដែលទើបតែចាប់ផ្តើមបាន២សប្តាហ៍ មានក្រុមចំនួន ៨ បានចូលរួមប្រកួត។ តាមគម្រោង ពាននេះត្រូវប្រើរយៈពេល១៤សប្តាហ៍ ឬក្រុមនីមួយៗត្រូវប្រកួតចំនួន១៤ដងដែលក្រុមទាំងអស់ត្រូវជួបគ្នាពីរជើង (ក្នុងដី/ក្រៅដី)។ ក្រុមណាដែលមានពិន្ទុច្រើនជាងគេនឹងក្លាយជាជើងឯកតែម្តង។

សារឹម បន្តថា លីកបាល់ទាត់មិត្តភាពត្រាំខ្នារ កាលឆ្នាំ ២០១៣ មានក្រុមចូលរួមតែចំនួន ៤ ប៉ុណ្ណោះ ប៉ុន្តែដោយសារមានការស្រលាញ់ និងចូលចិត្តវិស័យបាល់ទាត់របស់បងប្អូនប្រជាពលរដ្ឋមួយចំនួននៅស្រុកជិតៗ ពួកគាត់បានប្រមូលផ្ដុំគ្នាបង្កើតជាក្រុមបាល់ទាត់ឡើងដើម្បីចូលរួមប្រកួតប្រជែងជាមួយលីកបាល់ទាត់មួយនេះ។

លោកបានលើកឡើងទៀតថា ក្រុមដែលមានបំណងចង់ចូលរួម ត្រូវបង់ប្រាក់ចុះឈ្មោះចំនួន ១០ ម៉ឺនរៀល ប៉ុន្តែទឹកប្រាក់ទាំងអស់ដែលប្រមូលបានពីក្រុមចុះឈ្មោះគឺទុកសម្រាប់ជាប្រាក់រង្វាន់ដល់ម្ចាស់ជើងឯក ក្នុងលីកនេះតែម្តង។ សម្រាប់ការចំណាយលើខោអាវ ការធ្វើដំណើរ និងការចំណាយផ្សេងគឺក្រុមជាអ្នកចំណាយដោយខ្លួនឯង។

ទោះបីជាយ៉ាងណា លោក សួន សារឹម បានឲ្យដឹងទៀតថា ក្រុមទាំងអស់គ្មានតារាងសម្រាប់លេងផ្ទាល់ខ្លួននោះទេ។ សម្រាប់ក្រុមដែលគ្មានទីលានផ្ទាល់ខ្លួន ពួកគេតែងតែលេងនៅតារាងបាល់ទាត់ វិទ្យាល័យត្រាំខ្នារស្រុកបាទី ខេត្ត តាកែវ។ ប៉ុន្តែប្រសិនបើតារាងបាល់ទាត់នេះមិនទំនេរ ពួកគេនឹងទៅសុំតារាងបាល់ទាត់នៅតាមសាលាផ្សេង ៗ ដែលនៅជិតៗដើម្បីលេង ហើយប្រសិនបើតារាងនៅតាមសាលាទាំងនោះរវល់ទៀត ពួកគេនឹងចូលលុយគ្នាជួលតារាងសម្រាប់លេង ឬ លេងនៅតាមវាលស្រែ ប្រសិនបើគ្មានលុយជួលតារាងទេនោះ ។

បុរសខាងលើបានប្រាប់ទៀតថា មូលហេតុដែលធ្វើឲ្យពួកគាត់បង្កើតលីកនេះឡើង ពីព្រោះពួកគាត់យល់ថា បាល់ទាត់អាចលេងបានគ្នាច្រើន និងនាំមកនូវ មិត្តភាព សាមគ្គីភាព សុខភាព។ ម៉្យាងទៀតវាក៏អាច កាត់បន្ថយពេលទំនេរទៅធ្វើរឿងផ្សេង ដែលគ្មានប្រយោជន៍ ហើយមូលហេតុមួយចំនួនទៀតគឺពួកគាត់ចង់ឲ្យ កម្ពុជា មានសកម្មភាពផុលផុស។ ពួកគាត់មានឡូហ្គោជាច្រើន ដែលស្ថិតក្នុងក្រុមល្បីៗ នៅលើពិភពលោកដូចជា Arsenal , Chelsea , Real Madrid , Barcelona , Man Utd , Liverpool ជាដើម។

ជាមួយគ្នានេះដែរ លោក ឈៀង សារឿន ជាកីឡាករក្នុងក្រុម Slableang FC សំណូមពរដល់ប្រជាពលរដ្ឋណាដែលចង់ចុះឈ្មោះចូលរួមប្រកួត និងមានសប្បុរសជនណាដែលស្រលាញ់វិស័យកីឡាបាល់ទាត់ហើយមានបំណងចង់ជួយឧបត្ថម្ភ កម្មវិធីនេះអាចទាក់ទងទៅលោកផ្ទាល់តាមរយៈទូរស័ព្ទលេខ ០៨៨៦០១៥៩៥៩, ០៧៨៧០៨៣២៣។

កាលពីរដូវកាលមុន ២០១៤ ម្ចាស់ជើងឯកពានរង្វាន់នេះត្រូវធ្លាក់ទៅលើក្រុមបាល់ទាត់ Tramkhna FC ហើយបើកឆាករដូវកាលនេះក្រុមនេះនៅតែរក្សាតំណែងនៅកំពូលតារាងដដែល៕