នៅពីក្រោយឈ្មោះជាតារា គឹម ហួន ជាអ្នកលក់បាយ

2015-05-26 11:30:16
ចំនួនមតិ 0 | ចំនួនចែករំលែក 0

ចន្លោះមិនឃើញ

ការប្រឡូកក្នុងវិស័យសិល្បៈជាង ១ ឆ្នាំ មកនេះ មិនបានធ្វើឱ្យតារាចម្រៀងវ័យក្មេង គឹម ហួន មានចំណូលគ្រប់គ្រាន់នោះទេ ព្រោះច្រៀងបានត្រឹមតែ ៥បទនៅក្នុងផលិតកម្ម Spider។ សាមីខ្លួនបញ្ជាក់ថា មានតែឆ្លៀតលក់បាយ ឬគុយទាវជាមួយម្ដាយនៅផ្ទះបន្ថែមទើបបាន។

គឹម ហួន និយាយថា៖" ទៅមុខខ្ញុំមិនទាន់ដឹងទេ តែបច្ចុប្បន្នមិនអាចរំពឹងចំណូលពីសិល្បៈ អញ្ចឹងមានតែលក់បាយបន្ថែម ទើបគ្រប់"។ យុវជនវ័យ២១ឆ្នាំបន្តថា មុខរបរប្រចាំថ្ងៃនៅតំបន់ពោធិចិនតុង កាក់កបគួរសម ដោយមានភ្ញៀវជាប្រចាំមិនដែលដាច់។ ម្យ៉ាងទៀត អាជីពសិល្បៈហាក់ស្ងប់ស្ងាត់ រួមទាំងកម្មវិធីប្រគំតន្ត្រីនានា។

យុវជនរូបនេះអះអាងថា គ្រោងទៅចូលរៀនថ្នាក់មហាវិទ្យាល័យវិញ ប្រសិនបើស្ថានភាពសិល្បៈនៅតែបន្តភាពស្ងប់ស្ងាត់ ព្រោះក្រោយបញ្ចប់បាក់ឌុប បានសម្រេចចិត្តផ្អាកជាបណ្ដោះអាសន្ន ហើយងាកមកប្រឡូកក្នុងវិស័យសិល្បៈ ដើម្បីបំពេញក្ដីស្រមៃរបស់ខ្លួនរយៈពេលជាង១ឆ្នាំមកនេះ។ តារាចម្រៀងរូបនេះបញ្ជាក់ថា នឹងប្រកបមុខរបររកស៊ីអ្វីម្យ៉ាង ស្របពេលការងារសិល្បៈក៏នៅតែបន្ត ទោះបីប្រាក់ចំណូលមិនគ្រប់គ្រាន់យ៉ាងណាក៏ដោយ។

ចាងហ្វាងផលិតកម្ម អូន ទួច ទទួលស្គាល់ថា កន្លងមិនបានសម្រុកក្នុងការផលិតបទចម្រៀងពិតមែន ដោយជាប់រវល់ក្នុងការងារភាពយន្ត ស្ទើរដកឃ្លាមិនរួច។ ទោះបីជាយ៉ាងចាងហ្វាងផលិតកម្មវ័យក្មេងរូបនេះបញ្ជាក់ថា កំពុងរៀបចំផលិតបទចម្រៀងជាបន្តបន្ទាប់ឱ្យបានច្រើនតាមភាពជាក់ស្ដែងក្នុងនោះក៏មានវត្តមាន គឹម ហួន ផងដែរ។

លោកបានបន្ថែមថា បច្ចុប្បន្នផលិតកម្មមានកម្លាំងគ្រប់គ្រាន់ ដោយមានក្រុមការងាររហូត២ក្រុមក្នុងការផលិតបទចម្រៀង និង ផលិតភាពយន្ត បម្រើឱ្យវិស័យសោតទស្សន៍កំពុងដំណើររាល់ថ្ងៃ។ ជាមួយគ្នាលោកក៏កំពុងប្រកាសរកតារាចម្រៀងស្រី ដែលមានសមត្ថភាពទៀតផង ដើម្បីបំពេញតាមផែនការយុទ្ធសាស្ត្រ៕

អានអត្ថបទ៖ បងប្អូន ថន លក្ខិណា មានមុខរាល់កម្មវិធីថៃ

អានអត្ថបទ៖ ទាយមើល៍តារាល្បីថៃ Film Rattapoom Tokongsup ពាក់ស្បែកជើងអីពេលមកកម្ពុជា?