១៦ឆ្នាំចុងក្រោយនេះ Real ផ្លាស់ប្ដូរអ្នកចាត់ការល្បីៗ១២រូប

2015-05-28 13:00:59
ចំនួនមតិ 0 | ចំនួនចែករំលែក 0

ចន្លោះមិនឃើញ

Real Madrid ជាក្លិបធំមួយដែលធ្លាប់ឈ្នះពានរង្វាន់ UEFA Champions League ច្រើនជាងគេ បាន១០សម័យកាលមកហើយ ខណៈដែលក្លិបយក្សមួយនេះក៏ជាក្លិបដែលមានទឹកប្រាក់នៅក្នុងដៃច្រើនជាងក្លិបដទៃទៀតផងដែរ។ ដោយសារតែមានឥទ្ធិពលខ្លាំង និងមហិច្ឆតាខ្ពស់នេះហើយ ទើបធ្វើឱ្យអ្នកចាត់ការមួយចំនួនឱ្យតែមកដឹកនាំក្រុមនេះ តែងតែមានសម្ពាធការងារ ពោលគឺឱ្យតែមិនអាចជួយក្រុមលើកពានបាន ដឹងតែប្រឈមនឹងការបណ្ដេញចេញ ឬលាឈប់ខ្លួនឯងតែម្ដង។

តួយ៉ាងដូចរយៈពេល១៦ឆ្នាំចុងក្រោយនេះ ក្លិបម្ចាស់ពានរង្វាន់ La Liga ៣២សម័យកាលមួយនេះបានផ្លាស់ប្ដូរអ្នកចាត់ការល្បីៗដល់ទៅ១២រូបមកហើយ៖

១. លោក Vicente del Bosque (ខែវិច្ឆិកា ១៩៩៩ ដល់ខែមិថុនា ២០០៣)

លោក Vicente del Bosque ត្រូវបានគេចាត់ទុកថាជាអ្នកចាត់ការជោគជ័យម្នាក់នៅក្រុម Real Madrid ដោយអាចជួយក្រុមនេះឈ្នះពានរង្វាន់ La Liga ២ដង , Spanish Super Cup ១ដង , Copa del Rey ១ដង , UEFA Champions League ២ដង , UEFA Super Cup ១ដងនិង FIFA Club World Cup ១ដង។

២. លោក Carlos Queiroz (មិថុនា ២០០៣ ដល់ ឧសភា ២០០៤)

លោក Carlos Queiroz ជាអ្នកមកជំនួសលោក Vicente del Bosque នៅក្លិប Real Madrid នៅឆ្នាំ២០០៣។ ដោយអាចជួយក្រុមឈ្នះពានតែមួយ Spanish Super Cup រូបលោកបានដឹកនាំក្រុមនេះតែ១១ខែទេ ក៏ត្រូវគេបណ្ដេញចេញទៀត។

៣. លោក Jose Antonio Camacho (ខែឧសភា ២០០៤ ដល់ តុលា២០០៤)

លោក Jose Antonio Camacho ជាអ្នកដឹកនាំក្រុម Real Madrid បានតិចជាងគេ ពោលគឺត្រឹមតែ៦ប្រកួតដំបូងលោកក៏ត្រូវបានអ្នកគាំទ្រ និងក្លិបរិះគន់ច្រើនពេក ក៏សម្រេចចិត្តលាឈប់តែម្ដង។ ហើយ៦ប្រកួតដំបូងនោះ គឺឈ្នះ៤ និងចាញ់២។

៤. លោក Mariano Garcia Remon (តុលា ២០០៤ ដល់ ធ្នូ ២០០៤)

លោក Mariano Garcia Remon បានឡើងមកកាន់តំណែងជំនួសលោក Jose Antonio Camacho បានតែ៣ខែទេ ក៏ត្រូវបានគេបណ្ដេញចេញទៀត ដោយកាលនោះមានទំនាស់នៅក្នុងក្រុម។ ហើយរយៈពេល៣ខែនេះដែរ លោកដឹកនាំក្រុមបាន២០ប្រកួត ឈ្នះបាន១២ដង។

៥. លោក Vanderlei Luxemburgo (ខែធ្នូ ២០០៤ ដល់ខែធ្នូ ២០០៥)

លោក Vanderlei Luxemburgo បានមកដឹកនាំក្រុម Real Madrid បានពាក់កណ្ដាលរដូវកាលដែរ បន្ទាប់ពីលោក Mariano Garcia Remon ។ ហើយរដូវកាលនោះដែរ លោកអាចជួយក្រុម Real Madrid ឈរនៅចំណាត់ថ្នាក់លេខ២ក្នុងតារាង La Liga ។ មូលហេតុដែលធ្វើឱ្យប្រធានក្លិបដេញអតីតអ្នកចាត់ការក្រុម Santos រូបនេះចេញគឺដោយសារតែរូបលោករៀបក្បួនប្លែកពីគេពេក ៤-២-២-២ ។

៦. លោក Juan Ramon Lopez Caro (ខែធ្នូ ២០០៥ ដល់ ខែមិថុនា ២០០៦)

លោក Juan Ramon Lopez Caro ជាអ្នកចាត់ការដែលត្រូវក្រុម Real Madrid បណ្ដេញចេញបន្ទាប់ពីដឹកនាំក្រុមបានពាក់កណ្ដាលរដូវកាលដែរ ហើយការប្រកួតពាក់កណ្ដាលរដូវកាលនោះ គឺលោកដឹកនាំក្រុមឈ្នះរហូត ប៉ុន្តែដោយសារតែក្លិបមិនពេញចិត្តទម្រង់លេងរបស់លោកក៏បណ្ដេញចេញទៅ។

៧. លោក Fabio Capello (កក្ដដា ២០០៦ ដល់ មិថុនា ២០០៧)

លោក Fabio Capello ជាអ្នកចាត់ការដែលជួយក្រុម Real Madrid បានច្រើនដែរ ប៉ុន្តែដោយសារតែទម្រង់ការពាររបស់លោកមិនត្រូវចិត្តអ្នកគាំទ្រ និងម្ចាស់ក្លិប ក៏ត្រូវបណ្ដេញចេញទៅ។

៨. លោក Bernd Schuster (កក្កដា ២០០៧ ដល់ ធ្នូ ២០០៨)

លោក Bernd Schuster ជាអ្នកចាត់ការម្នាក់ជួយក្រុម Real Madrid ឈ្នះពាន La Liga និង Spanish Super Cup នៅឆ្នាំ២០០៨។ ប៉ុន្តែដោយសារលោក ដឹកនាំក្រុមប្រកួតចាញ់៣ប្រកួតក្នុង៤ប្រកួតចុងក្រោយក៏ត្រូវបានគេបណ្ដេញចេញតែម្ដង។

៩. លោក Juande Ramos (ធ្នូ ២០០៨ ដល់ មិថុនា ២០០៩)

លោក Juande Ramos បានមកដឹកនាំក្រុម Real Madrid មួយរដូវកាល ប៉ុន្តែមិនអាចជួយក្រុមលើកពានអ្វីបានក៏ត្រូវក្លិបដេញចេញ។ បញ្ចប់រដូវកាលដោយចាញ់ពិន្ទុក្រុម Barcelona ៩ពិន្ទុ។

១០. លោក Manuel Pellegrini (មិថុនា ២០០៩ ដល់ ឧសភា ២០១០)

ក្រោមការដឹកនាំរបស់លោក Pellegrini ក្រុម Real Madrid បានបញ្ចប់រដូវកាលដោយមានពិន្ទុ៩៦ពិន្ទុក្នុងដៃ ប៉ុន្តែនៅតែមិនអាចលើកពាន La Liga បានដដែល ដោយសារតែចាញ់ក្រុម Barcelona មាន៩៩ពិន្ទុក្នុងដៃ។ បុរសសញ្ជាតិឈីលីរូបនេះត្រូវ Real បណ្ដេញចេញ បន្ទាប់ពីក្រុមមើលឃើញ Jose Mourinho ល្អជាង។

១១. លោក Jose Mourinho (ឧសភា ២០១០ ដល់ មិថុនា ២០១៣)

លោក Jose Mourinho ជាអ្នកដឹកនាំក្រុម Real Madrid បានយូរគួរសមដែរ ដោយអាចជួយក្រុមនេះឈ្នះពាន La Liga ១ដង , Copa del Rey ១ដងនិង Spanish Super Cup ១ដង។ អតីតអ្នកចាត់ការក្រុម Porto រូបនេះចាកចេញពី Real នៅឆ្នាំ២០១៣។

១២. លោក Carlo Ancelotti (មិថុនា ២០១៣ ដល់ ឧសភា ២០១៥)

លោក Carlo Ancelotti ជាអ្នកដឹកនាំក្រុម Real Madrid លើកពាន៤ក្នុងរដូវកាលមុន Copa del Rey , UEFA Super Cup , UEFA Champions League និង FIFA Club World Cup ។ ប៉ុន្តែដោយសារតែមិនអាចជួយក្រុមលើកពានអ្វីមួយសោះ រដូវកាលនេះទើបត្រូវបានប្រធានក្លិបបណ្ដេញលោកចោល៕

ចុចអាន៖Real Madrid ជឿជាក់ថាទិញ De Gea បានមែន ព្រោះ…

ប្រែសម្រួល៖ មុន្នី រម្យ ប្រភព៖ straitstimes