កូនខ្មែរមួយក្រុមបង្ហោះម៉ូតូ ដើម្បីបានថវិកាជួយមន្ទីរពេទ្យគន្ធបុប្ផា
- 2015-05-28 18:24:30
- ចំនួនមតិ 0 | ចំនួនចែករំលែក 0
កូនខ្មែរមួយក្រុមបង្ហោះម៉ូតូ ដើម្បីបានថវិកាជួយមន្ទីរពេទ្យគន្ធបុប្ផា
ចន្លោះមិនឃើញ
មិនថាចាស់មិនថាក្មេងឲ្យតែឮថាបង្ហោះម៉ូតូភាគច្រើនមិនចូលចិត្ត ហើយខ្លះទៀតគិតថាគ្មានប្រយោជន៍។ ផ្ទុយពីទស្សនៈខាងលើយុវជនខ្មែរមួយក្រុមបានបង្ហោះម៉ូតូ ដើម្បីបានថវិកានានាយកទៅបរិច្ចាគដល់ពេទ្យទេវតា គន្ធបុប្ផា ដែលជាពេទ្យមួយសង្គ្រោះជីវិតកុមាររាប់ម៉ឺននាក់ក្នុងប្រទេសកម្ពុជា។
លោក ថៃ សាមឌី ប្រធានក្រុម I LIKE MOTO បានឲ្យដឹងថា នេះជាការស្ម័គ្រចិត្តរបស់កូនក្រុមម្នាក់ៗ ដែលស្រលាញ់ម៉ូតូបង្ហោះដើម្បីប្រមូលថវិកាទៅជួយដល់មន្ទីរពេទ្យគន្ធបុប្ផាក្នុងកម្មវិធីខ្មែរតែមួយ។ កម្មវិធីនេះគឺក្រុមលោកបានសំដែងរយៈពេល ៣ ថ្ងៃខណៈមានអ្នកចូលរួមទស្សនាបរិច្ចាគថវិកាដល់ក្រុមលោកក្នុងឱកាសនោះ។ លើសពីនេះសមាជិកក្រុមលោកម្នាក់ៗក៏បានចូលនូវថវិកាដើម្បីរួមចំណែកបន្ថែមផងដែរ។
ប្រធានក្រុមរូបនេះថា ក្រុមលោកមានគ្នា ៤៧ នាក់ ដែលម្នាក់ៗសុទ្ធតែមានការងាររៀងៗខ្លួន ហើយមានខ្លះជានិស្សិតផងដែរ។ ដោយមានការឯកភាពគ្នាជាក្រុមទើបសម្រេចបង្កើតមូលនិធិបង្ហោះម៉ូតូនេះឡើង។ បន្ទាប់ពីបរិច្ចាគដល់មន្ទីរពេទ្យគន្ធបុប្ផារួចមក ក្រុមលោកក៏គ្រោងនឹងជួយបរិច្ចាគដល់កុមារកំព្រាដទៃទៀតនៅក្នុងប្រទេសកម្ពុជា។ តែយ៉ាងណាដោយសារសព្វថ្ងៃក្រុមលោកនៅខ្វះថវិកាទើបមានការពិបាកធ្វើមូលនិធិផ្សេងៗ ហើយក៏មិនញឹកញាប់តែនេះជាទឹកចិត្តក្រុមលោកហើយនឹងព្យាយាម។
លោកបន្តថា ធម្មតាការបង្ហោះម៉ូតូមិនមែនងាយស្រួលទេអាចគ្រោះថ្នាក់កើតឡើងជាយថាហេតុ តែដោយសារចិត្តស្រលាញ់ម៉ូតូក៏ដូចជាការបង្ហោះម៉ូតូ។ ម្យ៉ាងវិញទៀតការបង្ហោះម៉ូតូនេះតែងតែមានការប៉ះពាល់អ្នកផង តែក្រុមលោកតែងតែរកកន្លែងដែរមិនជាទីប្រជុំនៃចរាចរណ៍ឡើយ។ រាល់ការបង្ហោះម្ដងៗក្រុមលោកតែងតែមានសម្ភារៈការពារដូចជា មួកសុវត្ថិភាព ស្រោមការពារដៃជើង និង សំលៀកបំពាក់ការពារជាដើម។
សាមឌី បន្ថែមថា ការបង្ហោះម៉ូតូនេះគ្រាន់ជាពេលវេលាមួយទំនេរសម្រាកពីការងារ ឬ ការសិក្សារបស់សមាជិកក្រុមម្នាក់ៗ។ ជាងនេះទៅទៀត ប្រធានក្រុមនេះ មិនភ្លេចក្រើនរំលឹក ពីការគោរពច្បាប់ចរាចរណ៍ដល់កូនក្រុម ក៏ដូចជា ការជៀសឆ្ងាយពីគ្រឿងស្រវឹងផ្សេងៗ ដែលជាសីលធម៌សម្រាប់អ្នកបើកបរ។
អត្ថបទ៖ ស៊ីវហួង រៀនជំនាញកម្រមានស្រុកខ្មែរ តែសមត្ថភាពខ្លាំងអាចប្រជែងឈ្នះនិស្សិតចិនពូកែៗ
អត្ថបទ៖ ដារ៉ាឆានី