គ្រាន់តែរឿងភាគ Kim Soohyun និង IU មួយ KBS អាចរកបានជាង៥លានដុល្លារ

2015-05-28 21:15:52
ចំនួនមតិ 0 | ចំនួនចែករំលែក 0

ចន្លោះមិនឃើញ

ភាពយន្តភាគថ្មី "Producer” ដែលសម្ដែងដោយ តារាល្បី Kim Soohyun និង IU បានក្លាយជារឿងដែលរកបានចំណូលខ្ពស់បំផុតមួយសម្រាប់ស្ថានីយទូរទស្សន៍ KBS បន្ទាប់ពីរឿងនេះអាចរកបាន ៦ពាន់លានវុន (ប្រហែល ៥,៤លានដុល្លារ) ពីការលក់ម៉ោងផ្សាយពាណិជ្ជកម្ម និងសិទ្ធផ្សព្វផ្សាយលើទូរទស្សន៍ផ្សេងៗ។

តាមរយៈរបាយការណ៍មួយដែលចេញផ្សាយកាលពីថ្ងៃទី២៧ ខែឧសភា ភាពយន្តភាគ "Producer” ដែលកំពុងចាក់ផ្សាយរាល់ថ្ងៃសុក្រ និងថ្ងៃសៅរ៍ អាចរកបាន ៣០០លានវុន (ប្រហែល ២៧០ ០០០ដុល្លារ) ពីការផ្សាយពាណិជ្ជកម្មក្នុងមួយភាគៗ។ ដោយភាពយន្តនេះមានចំនួនសរុប ១២ភាគ ដូច្នេះគិតតែការលក់ម៉ោងផ្សាយពាណិជ្ជកម្ម ភាពយន្តនេះអាចរកបាន ប្រហែល ៣,២លានដុល្លារ។ អ្នកឧបត្ថម្ភកម្មវិធីនេះមានដូចជា ក្រុមហ៊ុន Busan Contents Market និងគេហទំព័រចិន Sohu.com។

គិតទាំងការលក់ម៉ោងផ្សាយពាណិជ្ជកម្មលើប៉ុស្តិ៍ KBS ផ្ទាល់ និងការលក់សិទ្ធឲ្យទូរទស្សន៍ផ្សេងៗទៀត ភាពយន្តនេះ អាចរកបាន ៦ពាន់លានវុនហើយ (ប្រហែល ៥,៤លានដុល្លារ)។ ទោះយ៉ាងណា KBS នៅរំពឹងថានឹងរកចំណូលបានច្រើនទៀតពីភាពយន្តភាគថ្មីមួយនេះ។

ចំណូលដ៏ច្រើនលើសលុបនេះបានធ្វើឲ្យក្រុមការងារទូរទស្សន៍ KBS សប្បាយចិត្តយ៉ាងខ្លាំង។ អ្នកនាំពាក្យម្នាក់បាននិយាយថា "កន្លងមកពួកយើងព្រួយបារម្ភព្រោះ កម្មវិធីល្បីៗនៅប៉ុស្តិ៍ផ្សេងៗ ដូចជា កម្មវិធី 'Law of the Jungle' របស់ទូរទស្សន៍ SBS និង 'Three Meals a Day' សុទ្ធតែចាក់ផ្សាយនៅម៉ោងនេះ ប៉ុន្តែចំនួនអ្នកទស្សនាគឺច្រើនជាងការរំពឹងទុករបស់យើង។ រឿងនេះពិតជារឿងមាសរឿងពេជ្ររបស់ KBS មែន" ៕