សហព័ន្ធកីឡាវាយសីកម្ពុជាបើកវគ្គគ្រូបង្វឹកកម្រិតអន្តរជាតិ
- 2015-06-22 18:11:04
- ចំនួនមតិ 0 | ចំនួនចែករំលែក 0
សហព័ន្ធកីឡាវាយសីកម្ពុជាបើកវគ្គគ្រូបង្វឹកកម្រិតអន្តរជាតិ
ចន្លោះមិនឃើញ
សហព័ន្ធកីឡាវាយសីកម្ពុជា សហការជាមួយសហព័ន្ធកីឡាវាយសីអាស៊ី បានបង្កើតវគ្គសិក្សាគ្រូបង្វឹកកម្រិត ១ របស់ កីឡាវាយសីអន្តរជាតិ (BWF Level 1 Coach Education Course) រយៈពេល ១០ ថ្ងៃនៅក្នុងទីស្នាក់ការគណៈកម្មាធិការជាតិអូឡាំពិកកម្ពុជា។
ពិធីបើកវគ្គជាផ្លូវការនៅព្រឹកមិញនេះ
យោងតាមការឱ្យដឹងពីលោក ជាម សុភា អគ្គលេខាធិការរងសហព័ន្ធកីឡាវាយសី បានឱ្យដឹងថាវគ្គនេះចាប់ពីថ្ងៃទី ២២ ដល់ ៣០ ខែ មិថុនា ឆ្នាំ ២០១៥ ដោយមានសិក្ខាកាមចូលរួមចំនួន ៣២ នាក់ មកពី ១៤ ក្លិបផ្សេងគ្នា និង ៩ នាក់មកពី ៩ សាលាវិទ្យាល័យក្នុងរាជធានីភ្នំពេញ ដោយក្នុងនោះក៏មានសិក្ខាកាមម្នាក់មកពីប្រទេសម៉ាឡេស៊ី ផងដែរ។ លោក Sambenthan Sivaperamal គ្រូឧទ្ទេសរបស់សហព័ន្ធកីឡាវាយអាស៊ី ធ្វើជាគ្រូបង្ហាត់ប្រចាំវគ្គនេះ។ ឧត្ដមសេនីយ៍ឯក លី កុសល ប្រធានសហព័ន្ធកីឡាវាយសីកម្ពុជា បានស្នើឱ្យសិក្ខាកាមទាំងអស់យកចិត្តទុកដាក់សិក្សាឱ្យបានល្អ ដើម្បីយកទៅអនុវត្តន៍នៅតាមក្លិប ឬ ស្ថាប័នរបស់ខ្លួន ជាពិសេសបណ្ដុះយុវជនថ្នាលឱ្យបានច្រើននិងល្អៗ មុនកម្ពុជាធ្វើជាម្ចាស់ផ្ទះព្រឹត្តិការណ៍កីឡាស៊ីហ្គេមឆ្នាំ ២០២៣ ខាងមុខ។ លោក រំលឹកកាលពីស៊ីហ្គេមកន្លងទៅថា ក្រុមជម្រើសជាតិកីឡាវាយសី ធ្វើបានល្អ ទោះជាមិនអាចឈានដល់វគ្គដណ្ដើមមេដាយក៏ដោយ ប៉ុន្ដែលោករំពឹងថា ប្រសិនបើសិក្ខាកាមទាំងអស់យកទៅបង្រៀនជំនាន់ក្រោយនោះ ក្រុមជម្រើសជាតិនឹងមានកីឡាករល្អៗកាន់តែច្រើនចេញទៅប្រកួតនៅលើឆាកអន្តរជាតិ៕ អត្ថបទ៖ ម៉ឺន រស្មី