តារាសិចស៊ី ស្រីម៉ុច ត្រូវគេអន្ទងឲ្យជិះយន្តហោះពីសិង្ហបុរីមកថតស្ប៉តពាណិជ្ជកម្មនៅកម្ពុជា

2015-06-30 16:08:36
ចំនួនមតិ 0 | ចំនួនចែករំលែក 0

ចន្លោះមិនឃើញ

តារាម៉ូដែល និងជាតារាសិចស៊ី ស្រីម៉ុច ដែលបានទៅរស់នៅប្រទេសសិង្ហបុរីប្រមាណ ១០ឆ្នាំមកហើយ បានមកដល់កម្ពុជាកាលពីសប្ដាហ៍មុនដោយស្នាក់នៅតែ៣ថ្ងៃប៉ុណ្ណោះ ដើម្បីថតស្ប៉តពាណិជ្ជកម្ម ដែលអន្ទងដោយមជ្ឈមណ្ឌលកែសម្ផស្សក្នុងស្រុកមួយឈ្មោះថា Dermoclinic។

ដំណើរចុះមកស្រុកលើកនេះ កើតក្រោយពីនាង និងគ្លីនិកកែសម្ផស្សខាងលើបានព្រមព្រៀងការងារជាមួយគ្នា ដោយតារាស្រីដែលគេច្រើនហៅថា ជីដូនកាកីរូបនេះ យល់ព្រមធ្វើជាតារាតំណាង Dermoclinic រយៈពេល៣ឆ្នាំ។ តំណែងនេះ ក្រោយ ស្រីម៉ុច បានយកឈ្នះលើបេក្ខភាពតារាស្រីបីរូបផ្សេងទៀត សុទ្ធជាស្រីស្អាត ល្បី និងមានវ័យក្មេងជាងខ្លួនឆ្ងាយថែមទៀត។

អ្នកស្រី ហូវ ដាណេ នាយិកាគ្លីនិកកែសម្ផស្សខាងលើសុំមិនបង្ហើបពីតារាស្រី៣នាក់ដែលស្ថិតក្រៅជម្រើស ក្នុងហេតុផលកុំឲ្យមានប៉ះពាល់ជាវិជ្ជមានដល់ពួកគេ។ តែអ្នកស្រីបានបង្ហើបវិញថា ស្រីម៉ុច មានចំណុចលេចធ្លោចំនួន៤ ដែលត្រូវបានជ្រើសរើសដោយដៃគូពាណិជ្ជកម្មរបស់អ្នកស្រីមកពីប្រទេសកូរ៉េ។

ទី១ នាងជាតារាចិត្តស្លុយហ៊ានថតបង្ហាញរូបរាងមិនញញើត ត្រូវនឹងស្ប៉តពាណិជ្ជកម្មរបស់អ្នកស្រីដែលត្រូវបង្ហាញសាច់ ក៏ដូចជាស្បែក។ទី២រូបសម្រស់ ដែលនាងមានសាច់ចាំបានល្អ បើទោះជាមានវ័យជ្រេ និងកូនដល់ទៅ៣នាក់ប៉ុន្តែនៅតែស្អាត។ ទី៣ ស្រីម៉ុច មានត្រេមុខស្រទន់ និងទាក់ទាញ។ ទី៤ តារាស្រីរូបនេះ នៅតែរក្សាបានតម្លៃខ្ពស់បើទោះមានវ័យច្រើនណាស់ទៅហើយ។ ទាំងនេះ នាំឲ្យ Dermoclinic សម្រេចចិត្តជ្រើសរើសយកស្រី ម៉ុច។

“តាមពិតយើង បានចំណាយពេលទាក់ទងស្រីម៉ុច អស់ពេលប្រមាណ៤ខែមកហើយ តែគាត់រវល់ច្រើនទើបតែពេលនេះ។ ប៉ុន្តែក្រុមការងារយើងគិតរួចហើយថា បើទោះគាត់រវល់មិនអាចមកបាន ក៏យើងនាំក្រុមការងារទៅថតគាត់ដល់សិង្ហបុរីតែម្ដងដែរ"។ អ្នកស្រី ដាណេ បន្ថែម។

វិលមកសាមីខ្លួនវិញ ថ្លែងថា នាងពិតជារវល់ច្រើនមែននៅសិង្ហបុរីនោះ ទើបតែពេលនេះអាចឆ្លៀតមកបាន។ "បងគាត់ហៅយូរហើយ ព្រោះរវល់រឿងកូន ដល់ឥឡូវកូនវ៉ាកងទៅ ផ្សំនឹងតម្លៃរាងគ្រាន់បើដែរក៏មកទៅ...ហើយក៏អរគុណបង(អ្នកស្រីដាណេ)ដែរ ដែលនៅមើលឃើញ ចាស់ប៉ុណ្ណឹងហើយនៅមើលឃើញទៀត(សើច)!”។

សកម្មភាពផ្សព្វផ្សាយពីសេវាកម្ម និងផលិតផលនានារបស់ Dermoclinicនាពេលនេះ ស្រីម៉ុច ត្រូវតម្រូវអោយចាប់ដៃគូជាមួយ អេនឌី ដែលតាមនាយិកាខាងលើ លោក ជាតារាប្រុសមានសាច់ស្អាតជាងគេ។

អ្នកស្រី ថ្លែងថា "យើងដឹងហើយ អេនឌី គាត់ចាស់វស្សាដែរហើយក្នុងសិល្បៈប៉ុន្តែបើនិយាយពីសាច់ គឺគាត់ជាតារាសាច់ស្អាត។ សួរថាសាច់ស្អាតហ្នឹង បើគាត់មិនថែរក្សាទេ តើវ័យនេះ សាច់គាត់អាចនៅតែស្អាតអីចឹងទេ អីចឹងហ្នឹងហើយជាមូលហេតុយើងជ្រើសគាត់ ផ្សំនឹងគាត់ក៏ជាអតិថិជនរបស់គ្លីនិកយើងមួយរូបដែរ ដែលទើបរួចផុតពីរឿងប្រតិកម្មស្បែកមុខថ្មីៗ"។

អ្នកស្រី ដាណេ បញ្ជាក់បន្ថែមថា អ្វីដែលបានធ្វើរួចហើយ គឺជាការងារទី១របស់ ស្រីម៉ុច ធ្វើឲ្យ Dermoclinic ក្នុងនាមជាតារាតំណាងគ្លីនិក។ តែតារាស្រីសិចស៊ីរូបនេះ នៅមានសកម្មភាពបន្តបន្ទាប់ទៀតពេលខាងមុខ ៕

តារាសិចស៊ី ដែលធ្លាប់រងមុខកាំបិតកែសម្ផស្សផ្ដាំសុភាពនារី “កុំខ្លាច!”