Drogba ប្រាប់ឈ្មោះកីឡាករ៣នាក់ដែលស្អប់មិនចង់ជួប

2015-07-09 17:53:54
ចំនួនមតិ 0 | ចំនួនចែករំលែក 0

ចន្លោះមិនឃើញ

កីឡាករ Didier Drogba បានប្រាប់ពីឈ្មោះកីឡាករ៣នាក់ដែលខ្លួនធ្លាប់ប្រកួតជាមួយ និងមិនចង់ជួបមុខនោះគឺ Rio Ferdinand, Nemanja Vidic និង Carles Puyol ។

Drogba បានធ្វើបទសម្ភាសន៍មួយជាមួយ Ferdinand កាលពីពេលថ្មីនេះនៅ BT Sport ។ ក្នុងកិច្ចសន្ទនាគ្នានោះដែរ អតីតកីឡាករ Man Utd បានសួរទៅអតីតកីឡាករ Chelsea ថា តើកីឡាករ៣នាក់ណាដែលរូបគេស្អប់ជាងគេក្នុងអាជីពជាកីឡាករកន្លងមក? ភ្លាមនោះ វីរបុរសក្រុមជម្រើសជាតិកូតឌីវ័របានប្រាប់ថា៖ "ខ្ញុំធ្លាប់ប្រាប់ហើយ អ្នកដែលខ្ញុំស្អប់នោះគឺអ្នកនិង Vidic ។ ខ្ញុំសប្បាយចិត្តណាស់ពេលដែលអាចរកគ្រាប់បាល់បានពេលប្រកួតជាមួយ Man Utd ព្រោះខ្ញុំមិនសូវជារកគ្រាប់បាល់បានទេពេលប្រកួតជាមួយពួកគេ។ ហើយម្នាក់ទៀតគឺ Carles Puyol ព្រោះគាត់ក៏ជាខ្សែការពារល្អម្នាក់ដែលបិទខ្ញុំជាប់រហូត”។

ខ្សែប្រយុទ្ធវ័យ៣៧ឆ្នាំខាងលើនេះចូលរួមជាមួយ Chelsea នៅឆ្នាំ២០០៤ ហើយចាកចេញនៅឆ្នាំ២០១២ បន្ទាប់ពីជួយតោខៀវជោគជ័យអស់រយៈពេល៨ឆ្នាំ។ កីឡាកររូបនេះបានត្រលប់មកជួយក្លិបមួយរដូវកាលទៀត កាលពីរដូវកាលមុនហើយក៏បានចាកចេញវិញទៀតបន្ទាប់ពីបានជួយលោក Jose Mourinho លើកពានបាន២។

សរុបរួម រយៈពេលប៉ុន្មានឆ្នាំនៅ Stamford Bridge លោក Drogba បានរកគ្រាប់បាល់១៦៤គ្រាប់ក្នុងការបង្ហាញខ្លួន៣៨១ប្រកួត និងបញ្ជូនបាល់ឱ្យមិត្តរួមក្រុមស៊ុតបាន៨៨គ្រាប់៕

ចុចអាន៖ Drogba ជាប់ឈ្មោះជាខ្សែប្រយុទ្ធល្អបំផុតរបស់ Chelsea

ប្រែសម្រួល៖ មុន្នី រម្យ ប្រភព៖ soccerladuma