រូបថតមួយសន្លឹក សាវិន ហ្វីលីព នឹកឃើញអស់ពាក្យទូន្មានអ្នកម្ដាយ
- 2015-07-28 17:52:58
- ចំនួនមតិ 0 | ចំនួនចែករំលែក 0
រូបថតមួយសន្លឹក សាវិន ហ្វីលីព នឹកឃើញអស់ពាក្យទូន្មានអ្នកម្ដាយ
ចន្លោះមិនឃើញ
រឿងរ៉ាវចាស់ៗដែលកប់ក្នុងអតីតកាលស្ទើរតែភ្លេចអស់ ប៉ុន្តែ នៅពេលប្រទះឃើញរូបមួយសន្លឹកខាងក្រោមនេះ ធ្វើឲ្យលោក សាវីន ហ្វីលីព នឹកឃើញគ្រប់អនុស្សាវរីយ៍ជាមួយអ្នកម្ដាយ ជាពិសេសពាក្យទូន្មានម្ដាយដែលតែងទូន្មានល្អចំពោះកូន ហើយពាក្យទាំងនោះធ្វើឲ្យតារាសម្ដែងរូបនេះជោគជ័យសព្វថ្ងៃ។
កុមារា ហ្វីលីព ថតឈរក្បែរម្ដាយមុនចូលរៀននៅថ្នាក់ទី ២ នៃសាលាបឋមសិក្សាសន្ធរម៉ុក (ថតក្នុងឆ្នាំ ១៩៨២)
ស្ថិតនៅក្នុងសំលៀកបំពាក់ជាសិស្ស ឈរក្បែរអ្នកម្ដាយ នោះគឺជារូបភាពរបស់លោកហ្វីលីពនៅវ័យ ១០ ឆ្នាំ ហើយក៏ជាគ្រាដែលកំពុងស្រេកឃ្លានចង់រៀន និង ថតរូបទុកមុនចូលរៀនថ្នាក់ទី ២ នៃសាលាបឋមសិក្សាសន្ធរម៉ុក។ "ខ្ញុំកាលហ្នឹងទើបអាយុ ១០ ឆ្នាំ ពេលនោះខ្ញុំចង់រៀនអើយចង់រៀន ហើយម្ដាយក៏សម្រេចឲ្យខ្ញុំទៅរៀនតែមុនទៅរៀនម្ដាយខ្ញុំបាននាំខ្ញុំទៅថតរូប នៅហាងថតរូប International Photoshop នៅម្ដុំសេរីភាព"។ ហ្វីលីព និយាយ។
“ខ្ញុំប្រទះឃើញរូបនេះ កាលពីយប់មិញ ពេលខ្ញុំទៅលេងម៉ាក់នៅផ្ទះ ម៉ាក់ខ្ញុំបានផ្ដិតវាឡើងវិញ ហើយដាក់ស៊ុម គ្រាន់តែឃើញភ្លាមខ្ញុំមានអារម្មណ៍រំភើបណាស់ វាហាក់ដាស់អារម្មណ៍របស់ខ្ញុំដែលបានកើតឡើងកាលពីជាង ៣០ ឆ្នាំមុន ជាពិសេសពាក្យទូន្មានដែលម្ដាយតែព្រានប្រដៅ"។ ហ្វីលីព បន្ថែម។
ពាក្យពីរឃ្លាដែលលោក សាហ្វីន ហ្វីលីព ចងចាំជាងគេពីការទូន្មានរបស់អ្នកម្ដាយ គឺ "កូនត្រូវតែខំរៀន" និង "កូនត្រូវតែមានអំពើល្អ"។ លោក ហ្វីលីព បានរំលឹកពាក្យអ្នកម្ដាយថា "បើទោះកូនមានរូបសម្បត្តិល្អហើយក្ដី ប៉ុន្ដែ កូនគ្មានអំពើល្អនោះ គឺមិនល្អទេ ហើយបើកូនប្រុសរឹងមាំយ៉ាងណាក្ដី ប៉ុន្ដែ បើកូនខ្វះចំណេះនោះក៏មិនកើតដែរ កូនត្រូវតែរៀន គឺរៀនឲ្យចេះ"។
អ្នកម្ដាយរបស់លោក សាវីន ហ្វីលីព ឈ្មោះ នៅ សាវិន បច្ចុប្បន្នវ័យ ៦៧ ឆ្នាំ អតីតជាគ្រូបង្រៀននៅវិទ្យាល័យសន្ធរម៉ុក ដែលអ្នកស្រីបានធ្វើជាគ្រូបង្រៀនតាំងឆ្នាំ ១៩៧៩ ហើយទើបតែចូលនិវត្តន៍កាលពី ៦-៧ ឆ្នាំមុននេះ។
លោក សាវិន ហ្វីលីព ដែលកើតក្នុងឆ្នាំ ១៩៧២ នៅភ្នំពេញ ដែលរស់នៅជាមួយម្ដាយជាស្រ្តីមេម៉ាយ ខណៈបងប្អូន និង ឪពុក បានស្លាប់នៅសម័យខ្មែរក្រហម បានរៀបរាប់ថា ពាក្យទូន្មានទាំងឡាយតាំងពីនៅតូចរហូតមកទល់នឹងពេលនេះ លោកនៅមិនទាន់ភ្លេចទេ ហើយពាក្យពេចន៍ណែនាំទាំងនោះ លោកបានធ្វើឲ្យសម្រេចតាមក្ដីស្រមៃរបស់អ្នកម្ដាយជាបណ្ដើរៗហើយដែរ។
សព្វថ្ងៃនេះ លោក ហ្វីលីព សម្រេចបាន៖
ការសិក្សា៖
-១៩៨១-១៩៨៨ លោកចូលរៀននៅសាលាបឋមសិក្សាសន្ធរម៉ុកពីថ្នាក់ទី ១ ដល់ថ្នាក់ទី ៧ -១៩៨៨-១៩៩១ លោកដូរមករៀននៅវិទ្យាល័យឥន្ទ្រទេវី ពីថ្នាក់ទី ៨ ដល់ថ្នាក់ទី ១១ -១៩៩៤-១៩៩៥ លោករៀនចប់ថ្នាក់បរិញ្ញាបត្រផ្នែកអក្សរសាស្ត្រអង់គ្លេសនៃសាកលវិទ្យាល័យមួយដែលគាំទ្រដោយស្ថានទូតអូស្ត្រាលី (ភ្លេចឈ្មោះសាលា) -១៩៩៥-១៩៩៦ លោកធ្លាប់រៀនផ្នែកគ្រប់គ្រងសណ្ឋាគាររយៈពេលខ្លីនៅប្រទេសសិង្ហបុរី -២០០២-២០០៣ លោករៀនសាជាថ្មីលើវគ្គខ្លីៗ ស្ដីពីគ្រប់គ្រងសណ្ឋាគារ (៦ ខែនៅ សិង្ហបុរី និង ៦ ខែ នៅរដ្ឋកាលីហ្វ័រញ៉ា សហរដ្ឋអាមេរិក។
វិស័យសិល្បៈ
-១៩៩៤-១៩៩៥ លោកជួបអ្នកដឹកនាំរឿងម្នាក់ចៃដន្យ ហើយបានថតរឿងដំបូង "ល្បិចស្នេហ៍ល្បែងជីវិត" ដែលលោក ពេជ្រ ភារុណ ជាតួឯក ហើយលោកជាតួមិត្តភ័ក្ដិតួឯក។ -ជាបន្តបន្ទាប់លោក ហ្វីលីព បានសម្ដែងរឿងជាច្រើន ហើយរឿងដែលទទួលបានប្រជាប្រិយភាពខ្លាំង គឺរឿង "ហនុមាន"។ -ក្រៅពីក្លាយជាតួសម្ដែង លោកហ្វីលីព ក៏ធ្លាប់ថតពាណិជ្ជកម្មផងដែរ។
បង្កើតមូលនិធិ
-ពាក្យទូន្មានរបស់អ្នកម្ដាយ "អំពើល្អ" និង ការស្រឡាញ់ចូលចិត្តការងារមនុស្សធម៌ លោក សាវិន ហ្វីលីព បានបង្កើតមូលនិធិមួយមានឈ្មោះ "មូលនិធិកុមារសាវិនកម្ពុជា" ហើយមូលនិធិនេះកំពុងដំណើរការរាល់ថ្ងៃ ដោយបានចែកអំណោយជាសម្ភារៈសិក្សា ក៏ដូចជា អណ្ដូងទឹកជូនប្រជាជនក្រីក្រ។ ទន្ទឹមនឹងគ្នានេះ តារាសម្ដែងជើងចាស់ រូបនេះ ទើបទទួលបានងារជាទូតសុឆន្ទៈប្រចាំអង្គការ Construire Les Generations Future (CGF Foundation)៕
ចុចអាន៖ សាវិន ហ្វីលីព ទទួលបានងារជាឯកអគ្គរាជទូតសុឆន្ទៈ
ចុចអាន៖ ១១ នាទីពី សារ៉ា បកស្រាយជម្លោះជាមួយ សាវីន ហ្វីលីប និង ក្មួយស្រី
មានអត្ថបទពាក់ព័ន្ធនឹងមនុស្សដែលអ្នកចងចាំ ចង់ឲ្យ Sabay ចុះផ្សាយ សូមទំនាក់ទំនងតាម៖
លេខទូរសព្ទ៖ 017 557 688 អ៊ីមែល៖ prak.chanseyha@cidc.com.kh លេខទូរសព្ទ៖ 099 588 880 អ៊ីមែល៖ bin.bunna@cidc.com.kh
ចង់ដឹងលក្ខខណ្ឌដើម្បីសរសេរផ្ញើមកកាន់ Sabay បានសូមចុចត្រង់នេះ!
អត្ថបទ៖ ប៊ិន ប៊ុណ្ណា