“Mission Impossible” របស់ Tom Cruise គ្រងតំណែងកំពូលលើ Box Office

2015-08-03 19:13:50
ចំនួនមតិ 0 | ចំនួនចែករំលែក 0

ចន្លោះមិនឃើញ

ខ្សែភាពយន្ត "Mission: Impossible – Rogue Nation” បានក្លាយជាភាពយន្តលេខមួយលើតារាង Box Office អាមេរិកសប្ដាហ៍នេះ ក្រោយរកចំណូលបាន ៥៦លានដុល្លារ ក្នុងរយៈពេល៣ថ្ងៃដំបូង នៅប្រទេសកាណាដា និងអាមេរិកខាងជើង។

"Mission: Impossible – Rogue Nation” គឺជាប្រភេទខ្សែភាពយន្តបាញ់ប្រហារ ដែលសម្ដែងដោយតារាល្បី Tom Cruise និងដឹកនាំដោយលោក Christopher McQuarrie ដែលភាពយន្តនេះបានចេញ៤វគ្គរួចមកហើយ តាំងពីឆ្នាំ១៩៩៦មក។ ចំណាយដើមទុនអស់ ១៥០លានដុល្លារ "Mission Impossible" វគ្គទី៥ អាចរកចំណូលបាន ១២១លានដុល្លារហើយ នៅសប្ដាហ៍ទីមួយនេះបើគិតទាំងចំណូលពីប្រទេសផ្សេងៗជុំវិញពិភពលោក។

ចំណាត់ថ្នាក់លេខពីរសប្ដាហ៍នេះ គឺភាពយន្តបែបកំប្លែង "Vacation” ដែលទើបចាក់បញ្ចាំងក្នុងសប្ដាហ៍ទីមួយដូចគ្នា។ ៥ថ្ងៃដំបូង ភាពយន្តដែលសម្ដែងដោយតារាល្បី Chris Hemsworth អាចរកចំណូលបាន ២១លានដុល្លារ (១៤,៨លានដុល្លារសម្រាប់ថ្ងៃសុក្រ សៅរ៍ និងអាទិត្យ) ដែលជាចំណូលដ៏តិចតួច ខុសពីការរំពឹងទុករបស់ផលិតកម្ម Warner Bros.។

ចំណាត់ថ្នាក់លេខ៣គឺខ្សែភាពយន្តបុរសស្រមោច "Ant-Man” ដែលបានជាប់លេខមួយផ្ទួនគ្នាកាលពីពីរសប្ដាហ៍មុន។ នៅសប្ដាហ៍ទី៣នេះខ្សែភាពយន្តថ្មីរបស់ Marvel Studios អាចរកចំណូលបាន ១២,៦លានដុល្លារនៅអាមេរិក។ តែបើគិតពីចំណូលសរុបទូទាំងពិភពលោកវិញ "Ant Man” អាចរកបាន ២៩១លានដុល្លារហើយមកដល់ពេលនេះ។

ខាងក្រោមនេះគឺជាចំណាត់ថ្នាក់កំពូលទាំង ១០លើតារាងចំណូលភាពយន្ត Box Office នៅអាមេរិកសប្ដាហ៍នេះ៖

ល.រ	ចំណងជើងភាពយន្ត	ផលិតកម្ម	ចំណូលចុងសប្ដាហ៍	ចំណូលសរុប	សប្ដាហ៍ទី
១	Mission:Impossible 5	Par.	៥៦លានដុល្លារ	៥៦លានដុល្លារ	១
២	Vacation	WB (NL)	១៤,៨លានដុល្លារ	២១,១លានដុល្លារ	១
៣	Ant-Man	BV	១២,៦លានដុល្លារ	១៣២លានដុល្លារ	៣
៤	Minions	Uni.	១២,២លានដុល្លារ	២៨៧លានដុល្លារ	៤
៥	Pixels	Sony	១០,៤លានដុល្លារ	៤៥,៦លានដុល្លារ	២
៦	Trainwreck	Uni.	៩,៧លានដុល្លារ	៧៩,៧លានដុល្លារ	៣
៧	Southpaw	Wein.	៧,៥លានដុល្លារ	៣១,៥លានដុល្លារ	២
៨	Paper Towns	Fox	៤,៦លានដុល្លារ	២៣,៨នលានដុល្លារ	២
៩	Inside Out	BV	៤,៥លានដុល្លារ	៣២៩លានដុល្លារ	៧
១០	Jurassic World	Uni.	៣,៨លានដុល្លារ	៦៣១លានដុល្លារ	៨