គូស្នេហ៍សប្បុរសទួរគីរៀបចំអាហារឲ្យជនភៀសខ្លួនស៊ីរី ៤ពាន់នាក់ក្នុងថ្ងៃរៀបការ

2015-08-05 20:53:40
ចំនួនមតិ 0 | ចំនួនចែករំលែក 0

ចន្លោះមិនឃើញ

គូស្នេហ៍ចិត្តសប្បុរសមួយគូរបស់ប្រទេសទួរគី បានសម្រេចចិត្តចែករំលែកភាពរីករាយក្នុងថ្ងៃអាពាហ៍ពិពាហ៍របស់ពួកគេ ដោយរៀបចំអាហារអញ្ជើញជនភៀសខ្លួនស៊ីរី ៤ពាន់នាក់ឲ្យចូលរួមទទួលទាន។

កូនកំលោះ Fethullah Üzümcüoğlu និងកូនក្រមុំ Esra Polat បានរៀបអាពាហ៍ពិពាហ៍នៅក្រុង Kilis ជិតព្រំដែនប្រទេសស៊ីរី។ ដើម្បីអបអរថ្ងៃមង្គលរបស់ខ្លួន គូស្នេហ៍ចិត្តសប្បុរសបានអញ្ជើញជនភៀសខ្លួនស៊ីរីដែលរត់ចូលប្រទេសទួរគីដោយសារសង្គ្រាមស៊ីវិល ៤ពាន់នាក់ ឲ្យចូលរួមរីករាយទទួលទានអាហារជាមួយគ្នា។

កូនកំលោះ Üzümcüoğlu បាននិយាយថា លោកមានអារម្មណ៍អស្ចារ្យបំផុត ដែលអាចធ្វើឲ្យអ្នកដទៃសប្បាយចិត្ត។ "ឃើញភាពរីករាយនៅក្នុងកែវភ្នែកក្មេងៗភៀសខ្លួនស៊ីរី ពិតជាមានតម្លៃបំផុត... យើងចាប់ផ្ដើមដំណើរឆ្ពោះទៅរកសុភមង្គលរបស់យើង ដោយធ្វើឲ្យអ្នកដទៃសប្បាយចិត្ត ហើយវាជាអារម្មណ៍អស្ចារ្យមួយ"។ កូនកំលោះបញ្ជាក់។

យ៉ាងណាក្ដី សកម្មភាពគួរឲ្យសរសើរនេះ កើតឡើងពីឪពុករបស់កូនកំលោះ ដែលមានឈ្មោះ Ali Üzümcüoğlu។ លោកបានប្រាប់កាសែត Serhat Kilis ថា សង្ឃឹមអ្នកផ្សេងទៀតនឹងធ្វើដូចគ្នា ហើយចែករំលែកថ្ងៃអាពាហ៍ពិពាហ៍ដ៏រីករាយជាមួយបងប្អូនជនភៀសខ្លួនស៊ីរី៕