កូឡុំប៊ីគ្រោងទិញដីពីអ្នកមាន ផ្ដល់ឲ្យអ្នកក្រីក្រ
- 2015-08-05 23:22:51
- ចំនួនមតិ 0 | ចំនួនចែករំលែក 0
កូឡុំប៊ីគ្រោងទិញដីពីអ្នកមាន ផ្ដល់ឲ្យអ្នកក្រីក្រ
ចន្លោះមិនឃើញ
ថ្មីៗនេះរដ្ឋាភិបាលប្រទេសកូឡុំប៊ីបានប្រកាសប្រាប់ពីផែនការទិញដីដែលជាកម្មសិទ្ធិរបស់អ្នកមានៗ មកចែកជូនប្រជាជនក្រីក្រនៅក្នុងប្រទេស។
តាមការឲ្យដឹងពីរដ្ឋមន្ត្រីកសិកម្ម របស់កូឡុំប៊ី លោក Aurelio Iragorri តាមរយៈសារព័ត៌មានក្នុងស្រុក El Tiempo បានឲ្យដឹងថារដ្ឋាភិបាលនឹងចំណាយថវិកាទិញដីស្រែទំហំសរុប២,៥លាន Acre (ប្រហែល១លានហិកតារ) ដែលជាគម្រោងមួយឈ្មោះLandbank។ ដីស្រែដែលជាទ្រព្យរបស់អ្នកមានៗ ទុកចោលទំនេរទាំងនោះ នឹងត្រូវយកទៅឲ្យគ្រួសារអ្នកក្រីក្រប្រើប្រាស់។
គម្រោងនៃការធ្វើបែបនេះ គឺរំពឹងថានឹងមានប្រជាជនមកតាំងទីលំនៅក្នុងដីកំណើតរបស់ខ្លួនវិញ បន្ទាប់ពីមានវិបត្តិជម្លោះក្នុងប្រទេសជាង៥ទសវត្សមក។ ជម្លោះរ៉ាំរ៉ៃដែលបង្កឡើងពួកឧទ្ទាម ជនទុច្ចរិត និងមន្ត្រីយោធារដ្ឋាភិបាល បានបង្កឲ្យប្រជាជនចាកចេញពីកន្លែងដែលគេរស់នៅ និងធ្វើឲ្យមានគម្លាតឆ្ងាយរវាងអ្នកមាន និងអ្នកក្រ។
ដោយឡែកចំពោះដីធ្លីដែលត្រូវបានទិញដោយឈ្មួញគ្រឿងញៀនទុច្ចរិត នឹងត្រូវយកបញ្ចូលក្នុងគម្រោង Landbank នេះផងដែរ។ លោកប្រធានាធិបតីកូឡុំប៊ី Juan Manuel Santos នឹងដាក់សំណើនេះទៅឲ្យសភាអនុម័ត ប្រសិនបើសភាមិនជំទាស់ទេនោះ គម្រោងនេះនឹងដំណើរការតាមការគ្រោងទុក៕
ចុចអាន៖ មហាសេដ្ឋីចិនទិញដីនៅអាមេរិក ២៣លានដុល្លារទុកអភិរក្សព្រៃឈើ
ប្រែសម្រួល៖ មាន រតនា ប្រភព៖ metro , AFP