ម្លេច កន្លែងកំសាន្តដែលអ្នកទេសចរមិនសូវស្គាល់

2015-08-21 12:00:20
ចំនួនមតិ 0 | ចំនួនចែករំលែក 0

ចន្លោះមិនឃើញ

ដោយបត់តាមស្លាក ”សកលវិទ្យាល័យ ភូមិន្ទតាកែវ-កំពត” ដែលបន្សល់ពីសម័យសង្គមរាស្រ្តនិយមមានចំងាយប្រមាណជា ៦គីឡួម៉ែត្រ ពីថ្នល់ជាតិលេខ ៣ តាមផ្លូវលំក្រាលដោយថ្មរដិបរដុបបន្តិច យើងនឹងទៅដល់រមណីយដ្ឋានមួយ ដែលមិនសូវជាមានអ្នកដំណើរពីចម្ងាយស្គាល់ច្រើនទេ នោះគឺ ម្លេច។

ម្លេច គឺជា អូរធម្មជាតិច្រើនប្រសព្វគ្នា ក្រោយមកក្លាយជាបឹងដ៏ធំមួយ ដែលមានទឹកយ៉ាងច្រើន។ សព្វថ្ងៃវាត្រូវបានគេរៀបចំឲ្យទៅជាតំបន់កំសាន្ត ដែលមានខ្ចុសសម្រាប់ភ្ញៀវសម្រាកលំហែរ ភេសជ្ជៈ អាហារ មានមនុស្សរាប់ពាន់មកលេងណែនណាន់តាន់តាប់ នៅថ្ងៃបុណ្យជាតិធំៗ ដូចជាចូលឆ្នាំជាដើម ។ម្លេច ជាកន្លែងដ៏ពេញនិយមសំរាប់ប្រជាពលរដ្ឋលំនៅឋានក្បែរនោះ ក៏ដូចជាអ្នករស់នៅក្នុងស្រុកឈូក ។ សម្រាប់ប្រជាជនក្បែរបឹងនេះអាស្រ័យផលនេសាទ និងជាប្រភពទឹកសម្រាប់ធ្វើស្រែផងដែរ។

លើផ្ទៃទឹកដ៏ធំ ខ្យល់ជំនោរបក់រសៀកៗ ក្រោមផ្ទៃមេឃខៀវស្រងាត់ ហ៊ុំព័ទ្ធដោយភ្នំជុំជិត អ្នកអាចចុះងូតទឹកលេងកំសាន្តគយគន់មើលទេសភាពដ៏ស្រស់ត្រកាល នៃជួរភ្នំដែលព័ទ្ធជុំវិញផ្ទៃទឹកនិង សម្រាកតាមខ្ចុះ ដែលបានសង់ប្របមាត់ទឹក ហើយថែមទាំងអាចកុម៉្មង់អាហារ ភេសជ្ជៈដែលមានរសជាតិឆ្ងុយឆ្ងាញ់នៅទីនេះ បាននារដូវវស្សា។ ប៉ុន្តែសម្រាប់រដូវប្រាំងទឹកស្រកដោយសារ រំហួត ជម្រាបទឹកទៅក្នុងដី និង ពលរដ្ឋបើកទឹកធ្វើស្រែ ទើបធ្វើអោយម្លេចបាត់សម្រស់នៅរដូវប្រាំង។