Dortmund បន្តកំណត់ត្រាឥតខ្ចោះ ឡើងកំពូលតារាងលើ Bayern

2015-08-31 16:48:14
ចំនួនមតិ 0 | ចំនួនចែករំលែក 0

ចន្លោះមិនឃើញ

ក្រុម Borussia Dortmund ដែលដឹកនាំដោយអ្នកចាត់ការថ្មី Thomas Tuchel បានបន្តកំណត់ត្រាល្អឥតខ្ចោះរបស់ខ្លួន សម្រាប់រដូវកាលថ្មីនេះ បន្ទាប់ពីឈ្នះ៣ប្រកួតជាប់ៗ ក្រោយឈ្នះ Hertha Berlin ៣-១ យប់មិញទៀត និងឡើងទៅឈរកំពូលតារាង Bundesliga លើក្រុមជើងឯកចាស់ Bayern Munich ថែមទៀត។

ការប្រកួតយប់មិញនេះ ខ្សែបម្រើជម្រើសជាតិជប៉ុន Shinji Kagawa គឺជាតួអង្គដ៏សំខាន់ ដែលជួយឲ្យ Dortmund ទទួលបាន៣ពិន្ទុពេញក្នុងដីខ្លួនឯង បន្ទាប់ពីអតីតកីឡាករក្រុម Manchester United រូបនេះ ជួយរួមចំណែក assist ឲ្យមិត្តរួមក្រុមរកគ្រាប់ចូលទី២គ្រាប់។

បើកការប្រកួតបាន២៧នាទី ខ្សែការពារនិងប្រធានក្រុម Mats Hummels បានតែតបញ្ចូលទីឲ្យម្ចាស់ផ្ទះនាំមុខបានសម្រេច ក្រោយការបញ្ជូនដ៏ល្អពី Kagawa ខណៈដែលនៅតង់ទី២ កីឡាករជប៉ុនវ័យ២៦ឆ្នាំ (Kagawa) បានទាត់បំប៉ោងទៅឲ្យ Matthias Ginter រួចទៅដល់ជើង Pierre-Emerick Aubameyang ស៊ុតគ្រាប់ទី២ នៅនាទី៥១។ ប៉ុន្តែ Salomon Kalou របស់ Hertha Berlin ស៊ុតតាម១គ្រាប់វិញ នៅនាទី៧៨ មុននឹង Adrian Ramos បានថែមគ្រាប់ទី៣ឲ្យ Dortmund នៅម៉ោងបន្ថែមមានរបួស។

ដូច្នេះ Dortmund បានឡើងទៅឈរកំពូលតារាង Bundesliga បណ្ដោះអាសន្ន ដោយមាន៩ពិន្ទុស្មើ Bayern ដែលយកឈ្នះ Bayer Leverkusen ៣-០ កាលពីយប់ថ្ងៃសៅរ៍ ប៉ុន្តែលើគ្រាប់ស៊ុត១គ្រាប់ ខណៈដែល VfL Wolfsburg ដែលយកឈ្នះ Schalke 04 ដោយលទ្ធផល ៣-០ កាលពីថ្ងៃសុក្រ នៅចំណាត់ថ្នាក់លេខ៣ មាន៧ពិន្ទុ៕