Toyota ចេញរថយន្ត Camry 016 រូបរាងកាន់តែទាក់ទាញ

2015-08-31 19:29:47
ចំនួនមតិ 0 | ចំនួនចែករំលែក 0

ចន្លោះមិនឃើញ

ក្រុមហ៊ុន Toyota បានបង្ហាញរថយន្ត Camryស៊េរីថ្មី ០១៦ ដោយបានផ្លាស់ប្ដូរនិងការរចនារូបរាងកាន់តែទាក់ទាញជាងមុន។

Camry 016 នេះមានការផ្លាស់ប្ដូររូបរាង ដោយនៅផ្នែកខាងមុខមានការរចនាកាន់តែធំទូលាយ។ ភ្លើងចង្កៀងមុខជាលក្ខណៈ Projector ដែលជះពន្លឺភ្លឺច្បាស់ជាមួយការប្រើប្រាស់យ៉ាន់កង់ប្រភេទស្ព័រទំហំ ១៧ អ៊ីង ដែលបានស្តែងពីលក្ខណៈពិសេសនៃរថយន្តស៊េរីថ្មីនេះ។

នៅផ្នែកខាងក្នុងអ្នកធ្វើដំណើរនឹងទទួលបានអារម្មណ៍ផាសុកភាពជាមួយពូកស្បែកដ៏ទន់ល្មើយ និងគ្រប់កៅអីអាចបញ្ជាដោយប្រព័ន្ធស្វ័យប្រវត្តិ។ នៅដៃចង្កូតមានប៊ូតុង ដែលអាចឲ្យអ្នកបើកបរបញ្ជាមុខងារផ្សេងៗលើរថយន្តកាន់តែងាយស្រួល។ ចំណែកប្រព័ន្ធម៉ាស៊ីនត្រជាក់ក៏មានការបែងចែករវាងអ្នកបើកបរនិងអ្នករួមដំណើរដាច់ដោយឡែកពីគ្នា។

នៅជួរខាងក្រោយមានថត ដែលអាចសាកថ្មទូរសព្ទនិងដាក់ទឹកបាន រួមទាំងប្រឡោះដែលអាចទាញរបស់របរពីឃ្លុបដាក់អីវ៉ាន់ខាងក្រោយដោយមិនចាំបាច់ឈប់រថយន្តទេ។

Camry ស៊េរីថ្មីនេះ មានបំពាក់ប្រព័ន្ធ Sensor និងកាមេរ៉ាដោយភ្ជាប់អេក្រង់ថាច់ស្រ្គីនក្នុងរថយន្ត ដែលផ្តល់ភាពងាយស្រួលក្នុងការចតឬធ្វើការថយក្រោយ។ ក្រៅពីនេះក៏មានប្រព័ន្ធ Auto Alarm ដែលនឹងផ្តល់សញ្ញាក្នុងករណីមានជនខិលខូចលួចរបស់របរពីក្នុងរថយន្ត។

រថយន្តនេះក៏មានបំពាក់ប្រព័ន្ធ Cruise Control ដែលធ្វើឲ្យអ្នកបញ្ជាដៃចង្កូតអាចកំណត់ល្បឿនក្នុងការបើកបរ។ សម្រាប់ប្រព័ន្ធសុវត្ថិភាពវិញ Camry 016 ពោងសុវត្ថិភាពដល់ទៅ ៩ ត្រូវបានបំពាក់ជុំវិញរថយន្តនិងមានប្រព័ន្ធ ABS និង BA ប្រព័ន្ធគ្រប់គ្រងលំនឹង VSC ប្រព័ន្ធជំនួយការឡើងចំណោត HAC សម្រាប់សម្រួលដល់ការបើកបរ។

រថយន្តប្រភេទ ៥ កៅអី មានកម្លាំងម៉ាស៊ីន Dual VVT-I 2.5 L ដែលផ្តល់សន្ទុះខ្លាំង។ ជាមួយបច្ចេកវិទ្យា Eco Mode រថយន្តនេះជួយសន្សំសំចៃការប្រើប្រាស់ប្រេងដោយ ១០០ គីឡូម៉ែត្រស៊ីតែ ៦ ទៅ ៧ លីត្រប៉ុណ្ណោះ។

លោក លី ប៊ុនហៃ នាយកចាត់ការទូទៅក្រុមហ៊ុន Toyota Cambodia បានឲ្យដឹងថា ក្រុមហ៊ុនគ្រោងលក់រថយន្ត Camry ស៊េរីថ្មីឲ្យបាន ១០០ គ្រឿងមុនបំណាច់ឆ្នាំ ២០១៥ នេះ។

មានជម្រើស ៦ ពណ៌ Camry ស៊េរីថ្មីនេះមួយគ្រឿងតម្លៃជាង ៥៥ ៩០០ ដុល្លារអាមេរិក៕

អត្ថបទ៖ ប៊ុណ្ណារ៉ា