មនុស្សប្រុសសុទ្ធតែមិនបានថែរក្សាភាពបរិសុទ្ធឱ្យភរិយាមែនឬ?

2015-09-02 16:20:40
ចំនួនមតិ 0 | ចំនួនចែករំលែក 0

ចន្លោះមិនឃើញ

មនុស្សប្រុសជាទូទៅតែងតែចង់បាន ភរិយាដែលបានរក្សាភាពបរិសុទ្ធ តែនាងមិនបានដឹងឡើយថា ស្វាមីរបស់នាង បានទុកភាពបរិសុទ្ធឱ្យនាងឬក៏អត់ទេ ពីព្រោះគេចាត់ទុកបុរសជាមាសទឹកដប់។ ទោះបីជាបុរសបានបាត់បង់ខ្លួនប្រាណ ប៉ុន្មានដងក៏ដោយក៏គ្មានអ្នកណាដឹង ឡើយ ក្រៅពីបុរសនោះធ្លោយមាត់ប្រាប់គេដោយខ្លួនឯង។

តើមនុស្សប្រុសពិតជាមិនបានទុកភាពបរិសុទ្ធឱ្យភរិយាមែនឬ?

រូបតំណាង

«សម្រាប់ខ្ញុំមិនបានទុកមែន!» នេះជាការឆ្លើយតបរបស់ ប្រភពម្នាក់សុំមិនបញ្ចេញឈ្មោះ មកកាន់ Sabay។ លោកបានបន្តទៀតថា មនុស្សស្រីមិនក្រោម ១០០ នាក់ទេ ដែលលោកធ្លាប់គេងជាមួយ ដូច្នេះលោកគ្មាន ភាពបរិសុទ្ធឯណាដើម្បីទុក្ខឱ្យភរិយានោះទេ។

តែទោះជាយ៉ាងណាក៏ដោយ លោកជឿជាក់ថា មនុស្សស្រីត្រូវការ ការកែខ្លួន របស់មនុស្សប្រុស ទោះមុនរៀបការ មនុស្សប្រុសធ្លាប់ខូចខិលយ៉ាងណាក៏ដោយ តែក្រោយរៀបការគួរតែឈប់ប្រព្រឹត្ត ត្រូវស្មោះស្ម័គ្រមួយនឹងមួយ ទើបគេហៅថា មនុស្សប្រុសមានទំនួលខុសត្រូវ។

ពេលដែលចោទសំណួរថា ប្រពន្ធដឹងរឿងនេះដែរឬទេ? លោកបាននិយាយថា « ដឹង! ព្រោះមុនរៀបការខ្ញុំបានប្រាប់គាត់ហើយថាខ្ញុំជាមនុស្សខូចណាស់ ខ្ញុំអត់មានបរិសុទ្ធទេ»។ ការនិយាយគ្នា ឱ្យដឹងស្រេចជាមុន ជារឿងល្អប្រសើរ ជាងឱ្យរឿងនោះបែកធ្លាយដោយខ្លួនឯង នៅថ្ងៃក្រោយ ដែលអាចបណ្ដាលឱ្យមានភាពចម្រូងចម្រាស់។ លោកបានបន្ថែមយ៉ាងដូច្នេះ។

ចំណែកប្រភពម្នាក់ទៀត ដែលសុំដាក់ងារថា សេវេន បានឱ្យដឹងថា តាមតម្លាភាពរវាងមនុស្សប្រុសនឹងមនុស្សស្រី គេទាំងពីរនាក់គួរតែរក្សាភាពបរិសុទ្ធ ឱ្យគ្នាទៅវិញទៅមករហូតដល់ថ្ងៃរៀបការ តែដោយឡែកសម័យនេះ មនុស្សមួយចំនួនមិនសូវគិតគូលើរឿងអស់ទាំងនេះទេ។ «គេថាមនុស្សប្រុស ៩៩% ហើយដែលខូច តែទោះជាយ៉ាងណាក៏មាន ១% ដែរដែលត្រឹមត្រូវ ហើយគេពិតជាបានថែរក្សាភាពបរិសុទ្ធរបស់គេបានល្អមែន!»។ លោក សេវេន បានបញ្ជាក់។

ងាកមកប្រភពវ័យក្មេងម្នាក់នេះវិញ មានឈ្មោះហៅក្រៅថា ឡាង បានឱ្យ Sabay ដឹងថា រូបគេផ្ទាល់អស់ភាពបរិសុទ្ធតាំងពីចូលមហាវិទ្យាល័យដំបូងម្ល៉េះ។ និស្សិតឆ្នាំទី បួនរូបនេះ បានបន្តថា រូបគេបានខូចខិលជាមួយមិត្តស្រីរបស់គេ ហើយបន្តបែកគ្នាអស់ជាច្រើននាក់។ សំណួរសួរថា តើលោកមានអារម្មណ៍យ៉ាងណាបើ អនាគតភរិយាលោកក៏មិនបានថែរក្សាភាពបរិសុទ្ធឱ្យលោកដូចគ្នា? «ខ្ញុំមិនគិតម៉េចទេ ខ្ញុំមិនប្រកាន់ឡើយ បើគាត់ប្រាប់ខ្ញុំមុនរៀបការ ហើយខ្ញុំក៏ប្រាប់គាត់ដូចគ្នា តែខ្ញុំមិនរំពឹងថាអនាគតប្រពន្ធខ្ញុំ នៅបរិសុទ្ធទេ ព្រោះខ្ញុំម្នាក់ឯងបានយក ភាពបរិសុទ្ធពីគេអស់ ពីរ បីនាក់ហើយ!»។

តែទោះជាយ៉ាងណាក៏ដោយ លោក ឡាង នៅតែចង់ឱ្យបុរស គ្រប់រូបស្មោះនឹងភរិយាក្រោយរៀបការដែរ ។ វាជារឿងអយុត្តិធម៌មួយទៅ ហើយសម្រាប់ភរិយាដែលមិនបានភាពបរិសុទ្ធពីស្វាមី តែខ្លួនឯងប្រឹងរក្សាដើម្បីស្វាមី ដូច្នេះអ្វីដែលធ្លាប់ខូចខិលមុនរៀបការ គួរតែលះបង់ចោលឱ្យអស់។ លោកបានបន្ថែម៕

ចុះចំណែកប្រិយមិត្ត បុរសឯទៀតវិញ ឯកភាពនឹងមតិខាងលើទេ?

អត្ថបទ៖ ណេង ណេង