AFC U-16៖ U-16 កម្ពុជាប៉ះក្រុមខ្លាំង U-16 កូរ៉េខាងជើងល្ងាចនេះ

2015-09-02 16:25:26
ចំនួនមតិ 0 | ចំនួនចែករំលែក 0

ចន្លោះមិនឃើញ

ក្រុមវ័យក្មេងកម្ពុជាអាយុក្រោម១៦ឆ្នាំ (U-16)ត្រូវប្រឈមនឹងក្រុមខ្លាំងយុវជនU-16 កូរ៉េខាងជើងវេលាម៉ោង១៧ម៉ោងនៅសិង្ហបុរី (ម៉ោង៤ល្ងាចនៅកម្ពុជា)សម្រាប់ការបើកឆាកយុទ្ធនាការជម្រុះពូល H នៃពានយុវជនទ្វីបអាស៊ី 2016 AFC U-16 Championship នៅកីឡដ្ឋានJalan Basar Stadium ប្រទេសសិង្ហបុរី។

ការប្រកួតនេះនឹងក្លាយជាប្រកួតដ៏តឹងតែងសម្រាប់ក្រុមយុវជនកម្ពុជាដោយសារតែក្រុមកូរ៉េខាងជើងមួយនេះត្រូវបានគេដឹងថា ជាក្រុមខ្លាំងមួយប្រចាំនៅអាស៊ី ហើយសូម្បីតែលោកគ្រូបង្វឹកកម្ពុជាជនជាតិជប៉ុនក៏ទទួលស្គាល់ថា ការប៉ះនឹងកូរ៉េខាងជើងពិតជាពិបាកបំផុតសម្រាប់កម្ពុជា។

លោក Iki Yusuke គ្រូបង្វឹក U-16 កម្ពុជាបានឲ្យដឹងថា លោកអត់សូវដឹងពីទម្រង់លេងរបស់ក្រុម U-16 កូរ៉េខាងជើងឡើយ ដោយសារតែមិនមានឯកសារ និងវីដេអូប្រកួតរបស់ក្រុមខ្លាំងមួយនេះដែលធ្វើឲ្យរូបលោកពិបាកក្នុងការរៀបចំទម្រង់លេង។

ក្នុងរយៈពេលប៉ុន្មានឆ្នាំចុងក្រោយនេះ ជាពិសេសឆ្នាំ២០១៥នេះ ក្រុមយុវជនU-16 កម្ពុជាបានប្រកួតលក្ខណៈអន្តរជាតិច្រើនដែលជាប្រភពនៃបទពិសោធន៍ធ្វើឲ្យពួកគេមានបច្ចេកទេស ល្បឿន និងភាពបត់បែនតាមស្ថានភាពបានច្រើន។ ៤ប្រកួតផ្លូវការក្នុងពាន 2015 AFF U-16 Championship ដែលកម្ពុជាធ្វើជាម្ចាស់ផ្ទះ U-16 កម្ពុជាឈ្នះ១ ស្មើ១ និងចាញ់២គឺឈ្នះហ្វីលីពីន១-០, ស្មើសិង្ហបុរី ០-០, ចាញ់អូស្ត្រាលី ៤-០ និងចាញ់មីយ៉ាន់ម៉ា៣-០។ បន្ទាប់មក U-16 កម្ពុជាចាញ់U-16 ម៉ាឡេស៊ី ២-០ សម្រាប់ការប្រកួតមិត្តភាពមុនពេលធ្វើដំណើរទៅសិង្ហបុរី។

បន្ទាប់ពីប៉ះកូរ៉េខាងជើង យុវជនកម្ពុជាត្រូវប៉ះជើងឯក 2015 AFF U-16 Championship ថៃនៅថ្ងៃទី៤ ខែកញ្ញា មុនពេលប្រកួតបញ្ចប់នឹងក្រុមម្ចាស់ផ្ទះសិង្ហបុរីនៅថ្ងៃទី៦ ខែសីហា ឆ្នាំ២០១៥។ ពានរង្វាន់យុវជនទ្វីបអាស៊ី 2016 AFC U-16 Championship នេះមានប្រទេសចូលរួមប្រកួតប្រជែងចំនួន៤៥ក្នុងវគ្គជម្រុះតាមពូលចាប់ពីថ្ងៃទី២ ខែកញ្ញា ដល់ថ្ងៃទី២០ ខែកញ្ញា៕