រឿងមួយចំនួនដែលត្រូវដឹងពីខ្សែប្រយុទ្ធថ្មីរបស់ Man Utd
- 2015-09-02 16:49:14
- ចំនួនមតិ 0 | ចំនួនចែករំលែក 0
រឿងមួយចំនួនដែលត្រូវដឹងពីខ្សែប្រយុទ្ធថ្មីរបស់ Man Utd
ចន្លោះមិនឃើញ
Manchester United បានទិញខ្សែប្រយុទ្ធ Anthony Martial ពីក្រុម Monaco ក្នុងតម្លៃខ្លួន៣៦លានផោន (ជាង៥៥លានដុល្លារ) ក្នុងកុងត្រារយៈពេល៤ឆ្នាំ។ កីឡាករវ័យក្មេងនេះ ត្រូវបានគេហៅក្រៅថាជា New Thierry Henry ដោយសារតែរូបគេមានសមត្ថភាពខ្លាំងពីតូច ហើយធ្លាប់ហាត់ក្នុងក្លិបយុវជនដែល Henry ធ្លាប់ហាត់ដែរ។ ខាងក្រោមនេះជាប្រវត្តិត្រួសៗ របស់ Martial ៖
ចាប់ផ្ដើមអាជីពបាល់ទាត់ដំបូងដោយហាត់ជាមួយក្រុម CO Les Ulis ដែលជាក្លិបរបស់ Henry និង Patrice Evra ធ្លាប់ហាត់។ ត្រឹមវ័យ១៤ឆ្នាំ Martial បានផ្លាស់ទៅចូលរួមជាមួយ Lyon ហើយក៏បានជាប់ឈ្មោះក្នុងឈុត U16 របស់បារាំងតែម្ដង ហើយរកគ្រាប់បាល់បាន៩គ្រាប់ក្នុង១៧ប្រកួត។ ដោយមានការអភិវឌ្ឍខ្លួនខ្លាំង ខ្សែប្រយុទ្ធរូបនេះចូលលេងទាំង U17 (រកបាន៩គ្រាប់ក្នុង១៣ប្រកួត) , U18 (៣គ្រាប់ក្នុង៤ប្រកួត) ហើយបច្ចុប្បន្នកំពុងលេងនៅ U21 ។ ចំណែកឯកាលនៅជាយុវជនរបស់ Lyon វិញ រូបគេរកបាន៣២គ្រាប់ក្នុង២១ប្រកួត មុនផ្លាស់ចូលឈុតធំនៅឆ្នាំ២០១២។
ដោយលេងកាន់តែឡើងជើង Monaco ក៏បានសម្រេចចិត្តទិញយកនៅឆ្នាំ២០១៣ ក្នុងតម្លៃខ្លួនត្រឹមតែ៥លានអឺរ៉ូប៉ុណ្ណោះ។ នៅជាមួយ Monaco ក្នុងរដូវកាលដំបូង រូបគេរកបាន២គ្រាប់ក្នុង១៥ប្រកួត ហើយរដូវកាលមុននេះរូបគេរកបាន១១គ្រាប់ក្នុង៤២ប្រកួត។ ចំនួននេះដែរ បានធ្វើឱ្យរូបគេក្លាយជាកីឡាករក្មេងជាងគេនៅអឺរ៉ុបដែលរកគ្រាប់បាល់បានច្រើនជាងគេ។
ចំពោះរឿងផ្លាស់មក Man Utd ក្នុងតម្លៃខ្លួន៣៦លានផោននេះដែរ គឺបានធ្វើឱ្យកីឡាករសញ្ជាតិបារាំងរូបនេះក្លាយជាយុវជនដែលមានតម្លៃខ្លួនខ្ពស់ជាងគេលើលោក ដូចបង្ហាញក្នុងតារាងខាងក្រោមនេះ៖
ហេតុផលនឹកស្មានមិនដល់
គេហៅ Martial ជា Henry ទី២គឺដោយសារតែខ្សែប្រយុទ្ធរូបនេះមានស្រុកកំណើតនៅជិតនឹង Henry បំផុត ពោលគឺ Henry កើតនៅ Les Ulis ស្របពេលដែល Martial កើតនៅ Massy ។ ពួកគេហាត់នៅក្លិបយុវជនដូចគ្នា ហើយគ្រូបង្វឹកនៅទីនោះបានបញ្ជាក់ថា២នាក់នេះមានទម្រង់លេងប្រហែលគ្នាទៀត។
Martial ជាកីឡាករថ្លៃជាងគេទី៣ក្នុងប្រវត្តិសាស្ត្ររបស់បិសាចក្រហម បន្ទាប់ពី Di Maria និង Mata ។
មិនមែនមានតែ Man Utd មួយទេដែលចង់បានកីឡាករវ័យ១៩ឆ្នាំរូបនេះ សូម្បីតែ Chelsea និង Spurs ក៏ចង់បានខ្លាំងដែរ តែខាង Monaco មិនព្រមលក់ឱ្យព្រោះក្លិបទាំងពីរផ្ដល់តម្លៃខ្លួនទាបពេក។
Martial ចូល Man Utd ចំថ្ងៃដែល Rooney ចូលដែរ ពោលគឺ១១ឆ្នាំមុន Rooney ក៏ផ្លាស់មកក្នុងថ្ងៃនេះដែរ។
កីឡាករពាក់អាវលេខ៩រូបនេះ អាចលេងក្នុងតំបន់ប្រយុទ្ធទាំងកណ្ដាល ឆ្វេង និងស្ដាំបានទាំងអស់ ដោយមានល្បឿន និងបច្ចេកទេសខ្ពស់។
មូលហេតុដែលធ្វើឱ្យរូបគេផ្លាស់មក Old Trafford គឺមិនមែនដោយសារតែលុយនោះទេ ប៉ុន្តែសាមីខ្លួនបានបញ្ជាក់ថាដោយសារតែចង់លេងក្រោមការដឹកនាំរបស់លោក Louis van Gaal ៕
ចុចអាន៖ សរុបការទិញដូរកីឡាករទាំងអស់ គ្រប់ក្លិបនៅ Premier League
ប្រែសម្រួល៖ មុន្នី រម្យ ប្រភព៖ manutd