ទម្លាប់គេង៧យ៉ាងដែលអ្នកគួរដឹង ដើម្បីជោគជ័យក្នុងការងាររកស៊ី

2015-09-02 22:16:30
ចំនួនមតិ 0 | ចំនួនចែករំលែក 0

ចន្លោះមិនឃើញ

ប្រិយមិត្តបានដឹងហើយថាការគេងមិនគ្រប់គ្រាន់ គឺអាចប៉ះពាល់សុខភាពជាច្រើនយ៉ាង ដូចជាប៉ះពាល់ការគិត បង្កើនហានិភ័យនៃជំងឺផ្លូវចិត្ត និងការតប់ប្រមល់ ជំងឺបេះដូង និងធ្វើឲ្យប្រព័ន្ធភាពស៊ាំធ្លាក់ចុះខ្សោយជាដើម។ ទោះជាបែបនេះក្ដី មនុស្សមួយចំនួន ជាពិសេសអ្នកគិតរឿងការងាររកស៊ី មិនសូវបានគេងគ្រប់គ្រាន់នោះឡើយ។

វេជ្ជបណ្ឌិត Lisa Shives ដែលជាជំនាញមួយរូបទាក់ទងនឹងការគេង បានឲ្យដឹងថាអ្នកគួរគេងឲ្យបាន ៧ ឬ៨ម៉ោងក្នុងមួយយប់ ជាពិសេសគឺអ្នកមានតួនាទីធំ ឬអ្នកកាន់កាប់ការរកស៊ីណាមួយ។ វេជ្ជបណ្ឌិតដដែល បានបញ្ជាក់បន្ថែមថាការគេងអាចជះឥទ្ធិពលដល់មុខងារនៃការដឹកនាំ ប៉ះពាល់ដល់ផ្នែកខ្លះនៃខួរក្បាលដែលដើរតួនាទីក្នុងការសម្រេចចិត្ត ការគិតគំនិតច្នៃប្រឌិតថ្មី ការចងចាំ និងការគិតបានរហ័ស។

ដូច្នេះការគេងឲ្យបានគ្រប់គ្រាន់គឺពិតសំខាន់បំផុត ប៉ុន្តែអ្វីដែលសំខាន់មួយទៀត គឺតើធ្វើយ៉ាងណាឲ្យគេងបានលក់ស្កប់ស្កល់ គ្រប់គ្រាន់? តោះ! អានវិធីខាងក្រោមទាំងអស់គ្នា៖

១. ចៀសវាងញ៉ាំគ្រឿងស្រវឹងមុនពេលចូលគេង

គ្រឿងស្រវឹងប្រហែលជាអាចជួយអ្នកឲ្យងងុយគេង ប៉ុន្តែវាអាចប៉ះពាល់ដល់ការគេងរបស់អ្នក។ វេជ្ជបណ្ឌិតខាងលើបានឲ្យដឹងថាគ្រឿងស្រវឹង អាចឲ្យអ្នកភ្ញាក់កណ្ដាលយប់ ពេលកំពុងគេងលក់ស្កប់ស្កល់ ហើយពិបាកនឹងគេងលក់វិញណាស់ ជាទូទៅគឺក្រោយពេលដែលអ្នកគេងលក់បានប្រហែល៤ម៉ោង។ អ្វីដែលអ្នកគួរធ្វើ គឺមិនគួរទទួលទានគ្រឿងស្រវឹង រយៈពេល៣ម៉ោងមុនចូលគេងនោះឡើយ។

២. បិទឧបករណ៍អេឡិចត្រូនិកមុនចូលគេង

ទម្លាប់លេងទូរសព្ទមុនពេលបិទភ្នែកគេង គួរតែលុបចោល ព្រោះពន្លឺដែលចេញពីអេក្រង់ទូរសព្ទ ឬឧបករណ៍អេឡិចត្រូនិកផ្សេងទៀត អាចធ្វើឲ្យប្រព័ន្ធបញ្ជូនសរសៃប្រសាទដែលរៀបនឹងគេងលក់ ទៅជាភ្ញាក់វិញ។ ឧបករណ៍ទាំងអស់នោះ ក៏បង្ខំឲ្យខួរក្បាលធ្វើការ នៅពេលដែលត្រូវសម្រាកមុនពេលគេងផងដែរ។ វេជ្ជបណ្ឌិតដដែលបានផ្ដល់យោបល់ថាអ្នកគួរជំនួសឲ្យការប្រើឧបករណ៍អេឡិចត្រូនិក ទៅជាការសម្រាក ឬកម្សាន្តបែបផ្សេងវិញ ដូចជាអានសៀវភៅ ឬនិយាយលេងជាមួយដៃគូ (បើមាន)។

៣. លុបចោលការព្រួយបារម្ភ ឬបញ្ហាផ្សេងៗ តាមរយៈការសរសេរទុក ជាជាងការគិត

ទោះមានរឿងស្រ្ដេស ឬបញ្ហាអ្វីនៅកន្លែងការងារ ឬអាជីវកម្មនៅពេលថ្ងៃក៏ដោយ អ្នកគួរលុបវាចោលសិន ដើម្បីកុំឲ្យវារំខានដំណេករបស់អ្នក។ បើអ្នកមានរឿងស្រ្ដេសនៅក្នុងខួរក្បាល ឬរឿងត្រូវគិតបន្តនៅថ្ងៃស្អែក អ្នកគួរសរសេរវាទុកនៅលើក្រដាស ជាជាងគិត។ ការធ្វើបែបនេះ នឹងអាចជួយឲ្យខួរក្បាលអ្នកធូរស្រាលមុនពេលចូលគេង។

៤. បង្កើតបរិយាកាសគេងដ៏ល្អបំផុត

កន្លែងគេងដែលល្អ គឺជាកន្លែងដែលត្រជាក់ល្មម ងងឹត និងស្ងាត់។ ចូរដកចេញនូវឧបករណ៍ដែលអាចបង្កសំឡេង និងពន្លឺ ដូចជាបញ្ចូលថ្មទូរសព្ទនៅក្រៅបន្ទប់ជាដើម។

៥. ហាត់ប្រាណ

ការហាត់ប្រាណក៏ជួយឲ្យអ្នកគេងលក់ស្រួលផងដែរ។ វាដូចគ្នាទៅនឹងប្រព័ន្ធបញ្ជូនសរសៃប្រសាទដែរ គឺវាអាចជួយឲ្យវដ្ដ២៤ម៉ោងនៃការគេង និងការភ្ញាក់ (sleep-wake cycle) ដំណើរការប្រក្រតី។

៦. ចៀសវាងញ៉ាំអាហារសម្រន់មានជាតិស្ករមុនពេលគេង

ប្រសិនបើអ្នកហេវខ្លាំង អ្នកអាចញ៉ាំអាហារដែលមានជាតិប្រូតេអ៊ីន ដូចជាទឹកដោះគោជូរ ជំនួសឲ្យការញ៉ាំអាហារណាដែលមានជាតិស្ករ។ អាហារដែលមានជាតិស្ករ អាចជួយបង្កើនថាមពលរបស់អ្នកលឿនពេក ដែលអាចប៉ះពាល់ដល់គុណភាពនៃការគេង។

៧. ទទួលពន្លឺនៅពេលភ្ញាក់ពីដំណេក

ពេលព្រឹក ក៏សំខាន់ដូចពេលមុនចូលគេងដែរ។ ពេលភ្ញាក់ពីគេង អ្នកគួរធ្វើឲ្យស្រស់ស្រាយ ឧទាហរណ៍ដូចជាកាន់ពែងកាហ្វេ អង្គុយជិតបង្អួច ទទួលពន្លឺថ្ងៃ ដើម្បីចាប់ផ្ដើមថ្ងៃថ្មីដ៏ល្អបំផុត សម្រាប់មុខជំនួញ ឬការងាររបស់អ្នក។

កាន់តែច្បាស់ សូមមើលវីដេអូរបស់ Entrepreneur ដូចខាងក្រោម៖