អ្នកដឹកនាំរឿងវ័យក្មេង រ៉ូណាន ចាន់ណា ចាកចេញពីផលិតកម្ម Rich Kids Media?

2015-09-02 21:55:07
ចំនួនមតិ 0 | ចំនួនចែករំលែក 0

ចន្លោះមិនឃើញ

ចាន់ណា រ៉ូណាន បានសម្រេចចិត្តចាកចេញ ពីផលិតកម្ម Rich Kids Media ខណៈរឿង "ក្រមុំ៣១ កំលោះ៥២" នៅមិនទាន់រួចរាល់ និង ចរាចរណ៍តាមរោងភាពយន្តនានានៅឡើយ។

ក្នុងជំនួបជាមួយ Sabay អ្នកដឹកនាំរឿងវ័យក្មេងរូបនេះ បញ្ជាក់ថា មានហេតុផលមួយចំនួនធ្វើឱ្យរូបគេសម្រេចចិត្តចាកចេញ ពីផលិតកម្មខាងលើ ប៉ុន្តែគ្មានទំនាស់ ឬការថ្នាំងថ្នាក់ចិត្តគ្នាណាមួយឡើយ។ លោកបន្ថែមថា៖ "ខ្ញុំបើកផលិតកម្មខ្លួនឯងវិញម្ដង ព្រោះពីមុនធ្លាប់បាននិយាយជាមួយគាត់ហើយថា ពេលដែលមានលទ្ធភាព នឹងចេញបើកផលិតកម្មខ្លួនឯង"។

បច្ចុប្បន្ន ចាន់ណា រ៉ូណាន បានចូលហ៊ុនជាមួយបងស្រីបង្កើតបើកផលិតកម្មរួមគ្នា ហើយកំពុងរៀបចំតួសម្ដែង ដើម្បីត្រៀមថតរឿងដំបូងក្នុងផលិតកម្មរបស់ពួកគេនៅចុងខែកញ្ញានេះទៀតផង។ ការសម្រេចបើកផលិតកម្មដូច្នេះ ក៏ព្រោះតែមើលឃើញអំពីទីផ្សារភាពយន្តបច្ចុប្បន្នកំពុងមានការកើនឡើង ខណៈមានទស្សនិកជនកាន់តែច្រើននិយមគាំទ្រស្នាដៃភាពយន្តខ្មែរ បើទោះបីជាមិនទាន់មានការរីកចម្រើនដូចបណ្ដាប្រទេសនានាយ៉ាងណាក្ដី។

រ៉ូណាន់ ចាន់ណា អះអាងថា បច្ចុប្បន្នរូបគេមានក្រុមការងារស្រាប់ ដែលជាបច្ច័យល្អសម្រាប់ការបង្កើតជាផលិតកម្ម និងផលិតរឿងដោយខ្លួនឯង។ ប៉ុន្តែអ្នកដឹកនាំរឿងវ័យក្មេង មានអតីតកាលរស់នៅជំរំជនភៀសខ្លួនដដែលបង្ហាញជំហរថា មិនបានផ្ដាច់ខ្លួនទាំងស្រុងពីផលិតកម្មចាស់នោះទេ អាចនឹងមានការសហការផលិតភាពយន្តរួមគ្នាទៀតផង អាស្រ័យលើភាពជាក់ស្ដែងនាពេលខាងមុខ។

ចាន់ណា រ៉ូណាន ប្រឡូកក្នុងការងារភាពយន្តអស់រយៈពេល ៦ ឆ្នាំហើយ ដោយធ្លាប់ចូលរួមជាមួយផលិតកម្ម RGB, LD Picture ជាដើម ដោយទទួលបានជោគជ័យលើស្នាដៃបន្តបន្ទាប់។ ដោយឡែករឿង "ក្រមុំ៣១ កំលោះ៥២" នៃផលិតកម្ម Rich Kids Media ក៏កំពុងដំណើរការកាត់តនៅឡើយ ដែលគ្រោងនឹងចាក់បញ្ចាំងតាមរោងភាពយន្តឆាប់ៗនេះ បន្ទាប់ពីរឿង"៧ថ្ងៃ" ទទួលបានការគាំទ្រច្រើនពីទស្សនិកជន។

អ្នកដឹកនាំរឿងខាងលើអះអាងថា នឹងធ្វើឱ្យកាន់តែល្អឡើងចំពោះស្នាដៃរឿងក្រោយនេះ ព្រោះនៅក្នុងផលិតកម្មផ្ទាល់ខ្លួន ដែលអាចសម្រេចចិត្តដោយដោយខ្លួនឯងក្នុងការផលិត ស្របពេលយល់ច្បាស់ពីតម្រូវការរបស់ទស្សនិកជន៕

អានអត្ថបទ៖ ពែកមី ល្បីឈ្មោះខ្លាំងប៉ុណ្ណាដាច់ខាតមិនចោល… អានអត្ថបទ៖ តួ Stunt ហូលីវូដដើមកំណើតខ្មែរ Jean-Paul Ly ត្រៀមមកថតរឿងលើកដំបូងនៅប្រទេសកម្ពុជា

សកម្មភាពដឹកនាំរឿងរបស់ រ៉ូណាន ចាន់ណា