៤ចំណុចប្លែកគ្នារបស់ ស៊ន សៀវម៉ី មុន និងក្រោយឈ្នះមេដាយមាស
- 2014-10-16 16:44:09
- ចំនួនមតិ 0 | ចំនួនចែករំលែក 0
៤ចំណុចប្លែកគ្នារបស់ ស៊ន សៀវម៉ី មុន និងក្រោយឈ្នះមេដាយមាស
ចន្លោះមិនឃើញ
ម្ចាស់មេដាយមាសជើងឯកតេក្វាន់ដូកីឡាអាស៊ី Asian Games 2014 ស៊ន សៀវម៉ី មានការប្រែប្រួលខ្លាំង បន្ទាប់ពីនាងឈ្នះមេដាយមាសជាប្រវត្តិសាស្ត្រជូនជាតិមាតុភូមិពីព្រឹត្តិការណ៍ខាងលើ ដែលពីមុនមកកម្ពុជាមិនដែលស្គាល់រសជាតិមេដាយមាសម្ដងណាសោះឡើយ ហើយក៏បានខកខានមេដាយផ្សេងៗអស់រយៈពេល៤៤ឆ្នាំមកហើយ។ ក្នុងពេលល្បីនេះគេសង្កេតឃើញមានបួនចំណុចដែល ម្ចាស់មេដាយមាសនេះមានការប្រែប្រួលច្រើនគួរឲ្យកត់សម្គាល់។
ចំណុចទី១នោះគឺមុនពេលល្បីគេអាចធ្វើការសម្ភាសន៍ សៀវម៉ី ដោយផ្ទាល់តែម្ដង ដោយពុំចាំបាច់សុំការអនុញ្ញាតពីខាងសហព័ន្ធ ឬខាងគណៈកម្មាធិការជាតិអូឡាំពិកកម្ពុជានោះទេ ប៉ុន្តែក្រោយនាងឈ្នះមេដាយមាសរាល់ការទាក់ទងសម្ភាសន៍ សៀវម៉ី គឺត្រូវសុំការអនុញ្ញាតពីខាងសហព័ន្ធ ឬគណៈកម្មាធិការជាតិអូឡាំពិកកម្ពុជាមុន ហើយប្រសិនបើអនុញ្ញាតទើបអាចធ្វើសម្ភាសន៍បាន។
ចំណុចទី២គឺមុនពេលល្បីមិនមាននរណានឹកនាបង្កើតទំព័រហ្វេសប៊ុកឈ្មោះ ស៊ន សៀវម៉ី នោះទេ ប៉ុន្តែក្រោយក្លាយជាវីរនារីកម្ពុជា គេឃើញមានទំព័រហ្វេសប៊ុកជាច្រើនដែលបានបង្កើតឡើង ហើយដាក់ឈ្មោះថា ស៊ន សៀវម៉ី។
ចំណុចទី៣នោះគឺមុនពេលល្បីពុំសូវមានអ្នកស្គាល់គ្រួសារកម្ពស់ខ្ពស់ត្រកូល ស៊ន នេះទេ ហើយក៏ពុំសូវមានអ្នកជួយឧបត្ថម្ភដល់វិស័យកីឡា ពិសេសកីឡាតេក្វាន់ដូនោះដែរ ប៉ុន្តែក្រោយ ស៊ន សៀវម៉ី បានសាងស្នាដៃធំធេងជូនជាតិមាតុភូមិ គេសង្កេតឃើញមានស្ថាប័នរដ្ឋ បុគ្គល និងក្រុមហ៊ុនឯកជនជាច្រើនបានយកចិត្តទុកដាក់ និងឧបត្ថម្ភដល់នាង អញ្ជើញនាងចូលរួមកម្មវិធីនេះ កម្មវិធីនោះរកពេលសម្រាកសឹងមិនមាន។
ចំណុចទី៤ ដែលគួរឲ្យចាប់អារម្មណ៍ខ្លាំងនោះគឺ សៀវម៉ី ជាអត្តពលិកកម្ពុជាដំបូងគេដែលអង្គព្រះមហាក្សត្រព្រះបាទ នរោត្តម សីហមុនី ប្រោសប្រទានឲ្យចូលគាល់ព្រះអង្គនៅក្នុងព្រះបរមរាជវាំង ជាមួយសម្ដេចយាយ នរោត្តម មុនីនាថ សីហនុ។
ទាំងនេះអាចចាត់ទុកថាជាចំណុចប្រែប្រួលរបស់ សៀវម៉ី ផ្ទាល់ ក៏ដូចជាការប្រែប្រួលរបស់មជ្ឈដ្ឋានខាងក្រៅ ក្នុងការងាកសម្លឹងទៅមើល និងផ្ដោតការយកចិត្តទុកដាក់លើម្ចាស់មេដាយមាសរូបនេះ។
ក្រៅពីបូនចំណុចខាងលើ តើប្រិយមិត្តគិតថានៅមានចំណុចអ្វីខ្លះទៀតដែលវីរៈនារី ស៊ន សៀវម៉ី មានការប្រែប្រួលអ្វីខ្លះទៀត?
អត្ថបទ៖ អៀង សូទ្រី