ជប៉ុន បានយកឈ្នះ កម្ពុជា ៣-០ ក្នុងដីរបស់ខ្លួន
- 2015-09-04 02:21:24
- ចំនួនមតិ 0 | ចំនួនចែករំលែក 0
ជប៉ុន បានយកឈ្នះ កម្ពុជា ៣-០ ក្នុងដីរបស់ខ្លួន
ចន្លោះមិនឃើញ
ក្រុមបាល់ទាត់ជម្រើសជាតិជប៉ុនបានយកឈ្នះក្រុមជម្រើសជាតិកម្ពុជាដោយលទ្ធផល ៣-០ ទាំងទឹកមុខមិនសូវសប្បាយចិត្តនៅកីឡដ្ឋាន Saitama Stadium 2002 របស់ខ្លួន សម្រាប់ការប្រកួតជម្រុះបាល់ទាត់ពិភពលោក ឆ្នាំ២០១៨ នៅពូល E សម្រាប់តំបន់អាស៊ី ជុំទីពីរជើងទី១ដែលទើបបញ្ចប់ទៅមុននេះបន្តិច។
ការប្រកួតនេះពិតជាលំបាកណាស់សម្រាប់ក្រុមកម្ពុជាដែលលេងនៅក្នុងដីរបស់ក្រុមខ្លាំងជប៉ុន។ គ្រាន់តែចាប់ផ្តើមភ្លាម ក្រុមជប៉ុនចាប់ផ្តើមវាយសម្រុកយ៉ាងខ្លាំងគ្មានត្រាប្រណីឡើយដើម្បីរកគ្រាប់បាល់ឲ្យបានច្រើន ប៉ុន្តែរបាំងការពាររបស់កម្ពុជាពិតជារឹងមាំដែលធ្វើឲ្យម្ចាស់ផ្ទះព្យាយាមលេងថយក្រោយដើម្បីទាញកម្លាំងរបស់កម្ពុជា។
ការវាយសម្រុកខ្លាំងរហូតដល់នាទីទី២៨ទើប ជប៉ុនអាចទម្លាយសំណាញ់ទីរបស់កម្ពុជាដោយតារាឆ្នើមមកពីអឺរ៉ុប Honda តាមរយៈការស៊ុតបាល់ពីចម្ងាយដែលធ្វើឲ្យអ្នកចាំទី ស៊ូ យ៉ាទី ទះបាល់មិនផុត។ បន្ទាប់មកទៀត ជប៉ុននៅតែវាយសម្រុកតែមិនអាចទម្លាយរបាំងការពារកម្ពុជា ហើយចប់តង់ទីមួយ ជប៉ុននាំមុខ ១-០។
ចូលតង់ទីពីរជប៉ុនបានវាយលុកបន្ថែមទៀត និងរកគ្រាប់បាល់បានយ៉ាងលឿនគឺ២គ្រាប់ជាប់គ្នាដោយនាទីទី៥០ Yoshida បានទម្លាយសំណាញ់ទីមួយគ្រាប់ ហើយ១នាទីក្រោយមក Kagawa បានបន្ថែម១គ្រាប់ទៀត។ ជប៉ុននៅតែសម្រុកវាយ និងស៊ុតជាច្រើនជើង ប៉ុន្តែអ្នកចាំទី និងខ្សែការពារកម្ពុជាបានជួយសង្គ្រោះជាច្រើនលើកច្រើនសារ។ ស៊ូ យ៉ាទីពិតជាគួរឲ្យសរសើរដែលបានជួយសង្គ្រោះបាល់ជាច្រើនគ្រាប់។ បន្ទាប់ពីលោកអាជ្ញាកណ្តាលបញ្ចប់ការប្រកួត មើលទៅទឹកមុខគ្រូបង្វឹក និងកីឡាកររបស់ជប៉ុនហាក់មិនសប្បាយចិត្តឡើយនឹងលទ្ធផល ៣-០នេះ៕
អ្នកគាំទ្រកម្ពុជានៅកោះពេជ្រ យប់នេះ
អត្ថបទ៖ ជាន ចាន់រ៉ា