យឹម ណារ៉ា ចាប់ដៃ សុខ សោម៉ាវត្តី សម្ដែងភាពយន្តខ្នាតធំរឿងស្នេហាយុវវ័យ
- 2015-09-09 19:09:32
- ចំនួនមតិ 0 | ចំនួនចែករំលែក 0
យឹម ណារ៉ា ចាប់ដៃ សុខ សោម៉ាវត្តី សម្ដែងភាពយន្តខ្នាតធំរឿងស្នេហាយុវវ័យ
ចន្លោះមិនឃើញ
តារា សម្ដែង និងពិធីករ យឹម ណារ៉ា បានចាប់ដៃគ្នាសម្ដែងជាលើកដំបូងជាមួយ សុខ សោម៉ាវត្តី សម្ដែងភាពយន្តខ្នាតធំមួយរឿង និយាយពីស្នេហាយុវវ័យដែលបើកពិធីក្រុងពាលីព្រឹកមិញនេះ។
ភាពយន្ត នោះមានចំណងជើងថា "សិស្សប្អូនសំណព្វចិត្ត" ឬ "My Junior My Crush” ផលិតដោយផលិតកម្ម Rock។ ណារ៉ា ដែលសម្ដែងជាតួឯកប្រុសឈ្មោះ "សង្ហារ" គឺជាតួដែលមានចរិតឡូយ មិនសូវចេះខ្វល់នឹងនរណា។ ប៉ុន្តែដោយសារ រូបរាងសង្ហារ និងជាកំលោះឡូយឆាយផង ចរណៃ សម្ដែងដោយ សុខ សោម៉ាវត្តី ក៏បានបាក់ចិត្តស្រឡាញ់។
ណារ៉ា ថ្លែងថា "បើមើលចំណងជើងថា ប្រិយមិត្តអាចច្រឡំថា សិស្សច្បងគឺជាខ្ញុំ ដោយសារភាគច្រើនគឺមនុស្សប្រុសនៅរៀនច្រើនមានអាយុច្រើនជាងស្រីៗ តែក្នុងរឿងនេះគឺផ្ទុយគ្នាវិញ គឺស្រីតី ជាសិស្សច្បងខ្ញុំ ខ្ញុំសិស្សប្អូន ហើយស្រីតី ជាអ្នកស្រឡាញ់ខ្ញុំមុន ទាល់យូរទៅបានខ្ញុំមានចិត្តស្រឡាញ់នាងវិញ"។
វិលមកតួឯក ស្រី សុខ សោម៉ាវត្តី វិញឲ្យដឹងថា ក្នុងរឿងនេះ គឺនាងសម្ដែងជាតួឯកស្រីមានរាងធាត់ និងមិនសូវស្អាត ទើបមិនសូវមានអ្នកស្រឡាញ់។ ផ្ទុយទៅវិញ គឺនាងបាក់ចិត្តស្រឡាញ់ ណារ៉ា ជាតួឯកប្រុសថែមទៀត។ តារាសម្ដែងកូនមួយរូបនេះ ថ្លែងទៀតថា នេះជារសជាតិថ្មីមួយនៃសម្រាប់ការសម្ដែងរបស់នាង និងសង្ឃឹមថា ទស្សនិកជនគាំទ្រ។
ផលិតកម្ម Rock បានវិនិយោគថវិកាប្រមាណជា៥ទៅ ៦ម៉ឺនដុល្លារ សម្រាប់ "សិស្សប្អូនសំណព្វចិត្ត" ឬ "My Junior My Crush” ដើម្បីធ្វើឲ្យសាច់រឿងមានភាពទាក់ទាញ ដោយនាំយកសិល្បករ សិល្បការិនីល្បីៗ និងវ័យក្មេងជាច្រើនដួង។ រឿងនេះ ឆ្លុះបង្ហាញពីសង្គមស្នេហាយុវវ័យក្នុងមហាវិទ្យាល័យ និងបង្កប់ការអប់រំ។
យឹម សុសត្យា នាយកគ្រប់គ្រងការផលិតរបស់ Rock បង្ហើបថា ខ្លឹមសារអប់រំសំខាន់មួយរបស់រឿងនេះ គឺលើកទឹកចិត្តឲ្យយុវវ័យស្រឡាញ់ការសិក្សា ក្នុងបើទោះមានស្នេហាក្នុងពេលសិក្សា ប៉ុន្តែមិនត្រូវបោះបង់ការសិក្សាឡើយ ផ្ទុយទៅវិញត្រូវប្រឹងរៀនដើម្បីស្នេហា។ "ក្នុងរឿងនេះ តួឯកប្រុសបានដាក់លក្ខខណ្ឌដល់តួឯកស្រីថា បើស្រឡាញ់គេគឺត្រូវតែប្រឹងប្រែងរៀនសូត្រ បើមិនអីចឹង គឺមិនអោយស្រឡាញ់ទេ។ អីចឹងទេ នេះគឺជាខ្លឹមសារអប់រំសំខាន់មួយ"។
ក្រៅ ពីតួសម្ដែងខាងលើ "សិស្សប្អូនសំណព្វចិត្ត" ឬ "My Junior My Crush” ចូលរួមសម្ដែងដោយសិល្បករ សិល្បការិនីជាច្រើនទៀតមានដូចជា៖ នាយ ចើម Checky ភីម៉ៃ អ្នកនាង កាតុ B.I.G ឆ័យលី ដាឡែន យាយយ៉យ ព្រំម៉ាញ និងនាយ តេឡេ ជាដើម។
Checky និង កាតុ ដែលសម្ដែងជាតួអង្គ "អាម៉ាប់" និងគណៈកម្មការរៀងខ្លួន ថ្លែងថា តាមការអានខ្លឹមសាររឿង ពួកគេអះអាងថា នេះជាខ្សែភាពយន្តដ៏ល្អមួយ។ ដូច្នេះហើយស្នើប្រិយមិត្តចូលរួមគាំទ្រ។ តាមផែនការ "សិស្សប្អូនសំណព្វចិត្ត" ឬ "My Junior My Crush” គ្រោងនឹងចាក់បញ្ចាំងជូនប្រិយមិត្តទស្សនាក្នុងរង្វង់ដើមឆ្នាំ ២០១៦៕
អត្ថបទ៖ ទារិកា