Apple រងការរិះគន់ដោយសារបង្ខំឲ្យមនុស្សស្រីម្នាក់ញញឹម

2015-09-14 17:49:33
ចំនួនមតិ 0 | ចំនួនចែករំលែក 0

ចន្លោះមិនឃើញ

ដើម្បីបង្អួតពីសមត្ថភាពរបស់ iPad Pro ថ្មី ក្រុមហ៊ុន Apple បានអញ្ជើញនាយកប្រតិបត្តិមួយរូបពីក្រុមហ៊ុន Adobe ដើម្បីបង្ហាញពីការកាត់តរូបភាពលើ Tablet យក្សនេះ។ បន្ទាប់ពីធ្វើបទបង្ហាញរួច ក្រុមហ៊ុនទាំងពីរនេះបែរជារងការរិះគន់ពីសំណាក់ទស្សនិកជនមួយចំនួនទៅវិញ។

រូបនាទីដែលយកមកកែក្នុងកម្មវិធី Adobe Fix លើ iPad Pro បង្ហាញក្នុងព្រឹត្តិការណ៍សម្ពោធផលិតផល Apple

លោក Eric Snowden នាយកប្រតិបត្តិក្រុមហ៊ុន Adobe បានឡើងធ្វើបទបង្ហាញពីមុខងារមួយគឺ Adobe Fix ដែលអាចកែប្រែទម្រង់មុខ និងទឹកមុខបានយ៉ាងងាយស្រួល។ ខណៈពេលនោះគាត់បានធ្វើការកែផ្ទៃមុខរបស់មនុស្សស្រី ដែលមានទឹកមុខធម្មតាឲ្យទៅជាញញឹម។ រំពេចនោះអ្នកទស្សនាមួយចំនួនបានបញ្ចេញមតិរិះគន់លើបណ្ដាញ Twitter ដោយលើកឡើងថា ការកែប្រែទឹកមុខរបស់នារីម្នាក់ ប្រៀបដូចជាបង្ខំឲ្យនារីនោះញញឹម គឺជារឿងមួយដែលមិនសមរម្យនោះទេ។

iPad Pro ដែលមានអេក្រង់ធំ ដល់ទៅ ១២,៩ អ៊ីញ មានល្បឿនលឿន និងភ្ជាប់មកជាមួយប៊ិច STYLUS នេះត្រូវបានបង្ហាញ ទន្ទឹមនឹងការប្រកាសទូរសព្ទស្មាតហ្វូនជំនាន់ថ្មី កាលពីថ្ងៃទី៩ ខែកញ្ញាកន្លងទៅ។

ទាក់ទងទៅនឹងការរិះគន់នេះ អគ្គនាយកប្រចាំក្រុមហ៊ុន Adobe បានឆ្លើយតបទៅកាន់ទស្សនិកជនលើបណ្ដាញ Twitter របស់ខ្លួនថា ក្រុមហ៊ុនរបស់គាត់មិនមានបំណងវាយប្រហារអ្នកណាម្នាក់ឡើយ ហើយគាត់ក៏យល់ស្របផងដែរថា ការបង្ខំឲ្យនារីម្នាក់ញញឹមមិនមែនជាទង្វើល្អនោះទេ។ ចំណែកខាងក្រុមហ៊ុន Apple វិញមិនឃើញមានប្រតិកម្មតបអ្វីទៅលើបញ្ហាមួយនេះឡើយ។

-ចុចអាន៖ iPad Pro ថ្មីរបស់ Apple បង្ហាញខ្លួនហើយ អេក្រង់ធំ ល្បឿនរឹតតែលឿន កាន់ថ្មបានយូរ

ប្រែសម្រួល៖ ហៃ សុខហេង ប្រភព៖ yahoo