បុរសម្នាក់ស្ទើរក្អួតឈាម ញ៉ាំបង្គាមួយចាន គិតលុយអស់២៤០ដុល្លារ

2015-10-08 15:38:49
ចំនួនមតិ 0 | ចំនួនចែករំលែក 0

ចន្លោះមិនឃើញ

បុរសជនជាតិចិនម្នាក់ បានហួសចិត្តស្ទើរក្អួតឈាម ពេលទទួលបានវិក្កយបត្រគិតលុយថ្លៃញ៉ាំអាហារ អស់បង្គាមួយចាន ២៤០ដុល្លារ។

តាមការចុះផ្សាយរបស់ Shanghaiist បុរសខាងលើមានត្រកូល Zhu បានធ្វើដំណើរកម្សាន្តលេងទៅទីក្រុងកំពង់ផែ Qingdao ក្នុងខេត្តសានទុង ភាគខាងកើតប្រទេសចិន។ ក្រោយមកលោក និងគ្រួសារបានចូលទៅញ៉ាំអាហារល្ងាចក្នុងភោជនីយដ្ឋានអាហារសមុទ្រស្រស់ៗ និងបាប៊ីឃ្យូ Shande ដោយបានកុម្ម៉ង់បង្គាមួយចាន និងមុខម្ហូបបន្តិចបន្តួចទៀត។

ក្រោយពេលគិតលុយលោកភ្ញាក់ផ្អើលជាខ្លាំងពេលបានវិក្កយបត្រទឹកប្រាក់ថ្លៃអាហារញ៉ាំសរុបចំនួន ២៧០០យាន់ ( ៤២៥ដុល្លារ)។ ក្រោយពិនិត្យរួចឃើញថា បង្គាដែលលោកបានញ៉ាំមានតម្លៃសរុប១៥២០យាន់ ( ២៤០ដុល្លារ)។ នៅពេលលោក Zhu សួរថាហេតុអ្វីបានជាថ្លៃដូចនោះ? ខាងម្ចាស់ហាងថាប្រាប់ថា លោក Zhu មិនបានមើលឲ្យច្បាស់ព្រោះ បញ្ជីមុខម្ហូបគឺដាក់បញ្ជាក់ច្បាស់ថា គិតតម្លៃ បង្គាស្រស់មួយក្បាល គឺ៣៨យាន់ (៦ដុល្លារ) ក្នុងបង្គាមួយចានដែលមានប្រហែល៤០បង្គា មិនមែនតម្លៃសរុបបង្គាមួយចាននោះទេ។

យ៉ាងណាក្ដីលោក Zhu បានបដិសេធមិនព្រមបង់លុយតាមចំនួនវិក្កយបត្រនោះទេ ប៉ុន្តែម្ចាស់ហាងមានទាំងដំបងមកព្រមានផង បង្ខំឲ្យបង់ប្រាក់រហូតដល់មានជម្លោះ និងអន្តរាគមន៍ពីប៉ូលិស។

តាមប្រភពសារព័ត៌មាន Net Ease ទោះមានការអន្តរាគមន៍ពីប៉ូលិសក្ដី លោក Zhu ចុងក្រោយត្រូវបង់ប្រាក់២០០០យាន់ (៣១៥ដុល្លារ) សម្រាប់ថ្លៃអាហារល្ងាចមួយពេលនោះ។ ចំណែកម្ចាស់បានប្រាប់ថាអ្នកយកព័ត៌មានថាតម្លៃបង្គាគិតថ្លៃមួយៗនោះ ព្រោះជាបង្គាស្រស់ៗទើបនឹងចាប់មក ទើបបានជាថ្លៃ ។

ទោះជាយ៉ាងណា បង្គាតូចមួយក្បាលតម្លៃ៦ដុល្លារ កំពុងជាប្រធានបទក្ដៅក្នុងបណ្ដាញសង្គមប្រទេសចិន។ បណ្ដាអ្នកលេងអ៊ីនធឺណិតជាច្រើនមានការខឹងសម្បារនឹងតម្លៃម្ហូបថ្លៃនោះ ដូចបុរសខាងលើដែរ។

បញ្ជាក់៖ ព័ត៌មានថ្មីចុងក្រោយបានឲ្យដឹងថាអាជ្ញាធរបានផាកពិន័យម្ចាស់ហាងខាងលើចំនួន ៩ម៉ឺនយាន់ (១៤០០០ដុល្លារ) ពីបទក្លែងបន្លំអតិថិជន (ធ្វើអោយអតិថិជនច្រឡំបង្គាមួយក្បាល និងបង្គាមួយចាន នៅក្នុងបញ្ជីមុខម្ហូប)៕

ចុចអាន៖ ញ៉ាំអស់៩៣ដុល្លារ ឲ្យលុយធីប២០០០ដុល្លារ

ចុចអាន៖ ពេលល្ងាចអញ្ចឹង ឃើញអាហារ៣មុខនេះភ្លាម ចង់ទៅញ៉ាំភ្លែតហ្មង!

ប្រែសម្រួល៖ មាន រតនា ប្រភព៖ shanghaiist