Beyonce និង Jay Z រកបានផ្ទះជួលថ្មី ក្រោយម្ចាស់ផ្ទះចាស់បង្ខំឲ្យរើចេញ

2015-10-08 17:46:43
ចំនួនមតិ 0 | ចំនួនចែករំលែក 0

ចន្លោះមិនឃើញ

តារាចម្រៀងអាមេរិក Beyonce និង Jay Z នឹងត្រូវរើចូលនៅភូមិគ្រឹះថ្មីដែលមានតម្លៃ ១៥ម៉ឺនដុល្លារ ក្នុងមួយខែ បន្ទាប់ពីបានបង្ខំចិត្តរើចេញពីភូមិគ្រឹះចាស់ដែលពួកគេបានជួលកន្លងមក។ យោងតាមសារព័ត៌មាន TMZ ប្ដីប្រពន្ធតារាចម្រៀងទាំងពីររូបបានចុះកិច្ចសន្យាជួលផ្ទះថ្មីនេះ ដែលមានទីតាំងស្ថិតនៅតំបន់អភិជន Holmby Hills នៃទីក្រុង Los Angeles។

ផ្ទះដែលមានបន្ទប់គេងចំនួន៥ និងបន្ទប់ទឹកចំនួន៦នេះ គឺជាកម្មសិទ្ធិរបស់មហាសេដ្ឋីអង់គ្លេសម្នាក់ ដែលមានតម្លៃសរុបចំនួន ៤៥លានដុល្លារ។ ប្រភពដដែលបានបញ្ជាក់ថា Beyonce និង Jay Z នឹងរើទៅនៅផ្ទះថ្មីនេះ នៅចុងសប្ដាហ៍នេះ។

ជាមួយអាងហែលទឹកទាំងក្នុងនិងក្រៅផ្ទះ សួនច្បារធំទូលាយ រួមទាំងទឹកជ្រោះលើផ្ទៃដីសរុបជិត ២០០០ម៉ែត្រការ៉េ ផ្ទះថ្មីនេះនឹងមិនធ្វើឲ្យកូនស្រី Blue Ivy របស់តារាទាំងពីររូបខ្វះកន្លែងលេងឡើយ។

មុនចូលនៅផ្ទះនេះ គ្រួសារតារាទាំងពីររូបបានជួលភូមិគ្រឹះមួយនៅទីក្រុង Los Angeles ដែរនិងមានតម្លៃ ១៥ម៉ឺនដុល្លារក្នុងមួយខែដូចគ្នា ក៏ប៉ុន្តែម្ចាស់ផ្ទះបានប្រាប់ឲ្យពួកគេរើចេញកាលពីខែមុន ដោយសារគេបានសម្រេចចិត្តលក់ផ្ទះនោះ។

គូស្នេហ៍តារាដែលមានទ្រព្យសម្បត្តិច្រើនលំដាប់ទីពីរលើពិភពលោកនេះ មាន Apartment ផ្ទាល់ខ្លួនមួយនៅទីក្រុង New York ក៏ប៉ុន្តែពួកគេបានសម្រេចចិត្តមកនៅទីក្រុង Los Angeles ជាអចិន្ត្រៃយ៍ដោយជឿថានៅទីនោះ កូនស្រីរបស់ពួកគេអាចមានអនាគតប្រសើរជាង។ តារាទាំងពីររូបបានផ្លាស់ពីអគារ Empire State នៅ New York មកទីក្រុង Los Angeles រដ្ឋ California កាលពីដើមឆ្នាំនេះ ហើយកូនស្រីរបស់ពួកគេ Blue Ivy បានចូលរៀននៅមត្តេយ្យសាលាដែលមានតម្លៃ ១៥០០០ដុល្លារក្នុងមួយឆ្នាំ ៕