តា គង់ ណៃ គ្រោងយកបទចម្រៀងចាប៉ី ទៅចុះកម្មសិទ្ធិបញ្ញា

2015-10-26 18:41:49
ចំនួនមតិ 0 | ចំនួនចែករំលែក 0

ចន្លោះមិនឃើញ

បន្ទាប់ពីស្ដាប់ប្រសាសន៍ឯកឧត្ដម ស៊ុន ចាន់ថុល ទេសរដ្ឋមន្ត្រី រដ្ឋមន្ត្រីក្រសួងពាណិជ្ជកម្ម បើកផ្លូវឲ្យតារាចម្រៀងក៏ដូចជាក្រុមគ្រួសារតារាចម្រៀង យកបទចម្រៀងដែលគិតថា ជាស្នាដៃរបស់ខ្លួនទៅចុះបញ្ជីកម្មសិទ្ធិបញ្ញា ដើម្បីទទួលបានសិទ្ធិការពារតាមផ្លូវច្បាប់ លោក តាគង់ ណៃ តារាចម្រៀងចាប៉ីជើងចាស់ ក៏គ្រោងយកបទចម្រៀងចាប៉ីរបស់ខ្លួនទៅ ចុះបញ្ជីដែរ។

តាមការលើកឡើង របស់ គង់ ណៃ លោកតាមានបទចម្រៀងប្រហែលជិត១០បទ ក្នុងនោះមាន " ផាត់ជាយ" "ល្បើកផ្គរលាន់" "ក្រើនស្ត្រី" "ដំរីយោលកន្ទុយ" "ក្មេងជំនាន់ដើមនិងបច្ចុប្បន្ន" "បង្គងក្អែក" "រាប់ភូមិស្រុក និងសម្ភារៈ" និង បទជូនពរជាដើម ដោយនៅក្នុងនោះលោកនិងពិចារណាថា បទទាំងអស់នោះ តើបទណាខ្លះដែលអាចយកមកចុះបញ្ជីបាន ។

ការចុះបញ្ជីកម្មសិទ្ធិបញ្ញានៃបទចម្រៀង អាចធ្វើទៅបាន លុះត្រាតែបទចម្រៀងនោះ ជាការតែងនិពន្ធច្រៀងដោយតារាចម្រៀងនោះផ្ទាល់តែម្ដង ហើយប្រយោជន៍ម្ចាស់បទ ឬក្រុមគ្រួសារ នឹងទទួលបានសិទ្ធិការពារតាមផ្លូវច្បាប់ ប្រសិនបើមានជនណាដែលលួចចម្លង ឬយកបទចម្រៀងនោះទៅធ្វើអាជីវកម្មដោយមិនមានការអនុញ្ញាត។ នេះបើតាមការបញ្ជាក់របស់ឯកឧត្តមរដ្ឋមន្ត្រី ស៊ុន ចាន់ថុល កន្លងមក។

ឯកឧត្តមបន្តថា ក្រោយពីមានការស្នើសុំពីសាមីខ្លួន ឬសាមីគ្រួសារ ក្រសួងពាណិជ្ជកម្ម នឹងពិនិត្យមើល ហើយធ្វើការចេញផ្សាយលើបណ្ដាញ សារព័ត៌មានចំនួន១ខែ ប្រសិនបើមិនមានជនណាមកតវ៉ាទេ នោះបទចម្រៀងដែលស្នើសុំ នឹងមានការទទួលស្គាល់ជាផ្លូវច្បាប់។

លោកតា គង់ ណៃ បានលើកឡើងថា កន្លងមកលោកធ្លាប់សហការជាមួយ ខ្មែរនៅឯប្រទេសបារាំង ថតបទចម្រៀងយកទៅលក់នៅក្រៅប្រទេស ដោយសន្យាថា ចែកប្រាក់ចំណេញគ្នា ប៉ុន្តែក្រោយមកលោកមិនទទួលបានអ្វីទាំងអស់ ជាមួយគ្នានោះ បទចម្រៀងរបស់លោក ត្រូវបានគេថតចម្លង លក់ពេញផ្សារ ដោយមិនមានការអនុញ្ញាតពីលោកតាឡើយ ។ លោកថា ប្រសិនបើមានច្បាប់ពីកម្មសិទ្ធិបញ្ញា ហើយមានការអនុវត្តត្រឹមត្រូវនោះ លោកត្រូវតែទទួលបានអត្ថបទប្រយោជន៍ពីស្នាដៃរបស់ខ្លួន។

លោកតា គង់ ណៃ រំពឹងថា ប្រសិនបើបទចម្រៀងរបស់លោកត្រូវបានចុះបញ្ជីកម្មសិទ្ធិបញ្ញាមែននោះ ទៅថ្ងៃអនាគតលោកក៏ដូចជាក្រុមគ្រួសារ នឹងទទួលបានអត្ថបទប្រយោជន៍ ពីស្នាដៃ នៃបទចម្រៀងទាំងនោះជាក់ជាមិនខាន។

គិតត្រឹមបច្ចុប្បន្ន មានបទចម្រៀងចំនួន៧១បទហើយ ដែលត្រូវបានចុះបញ្ជីកម្មសិទ្ធិបញ្ញានៅក្រសួងពាណិជ្ជកម្ម ក្នុងនោះមាន៧០បទ របស់អធិរាជសំឡេងមាស ស៊ីន ស៊ីសាមុត និង១បទរបស់រាជនីសំឡេងមាស រស់ សេរីសុទ្ធា ។ឯកឧត្តមទេសរដ្ឋមន្ត្រី ស៊ុន ចាន់ថុល ស្នើតារាចម្រៀង និងគ្រួសារតារាចម្រៀង បន្តនាំយកស្នាដៃបង្កើតថ្មីផ្ទាល់ខ្លួន មកចុះបញ្ជីកម្មសិទ្ធិបញ្ញានៅក្រសួងពាណិជ្ជកម្មបន្តបន្ទាប់ទៀត ដើម្បីទទួលបានការការពារខាងផ្លូវច្បាប់នាពេលខាងមុខ៕

អត្ថបទ៖ ខុត សីហា