ហេតុអ្វី One FC មិនទៅរៀបចំការប្រកួតនៅប្រទេសថៃ?
- 2014-09-17 16:50:32
- ចំនួនមតិ 0 | ចំនួនចែករំលែក 0
ហេតុអ្វី One FC មិនទៅរៀបចំការប្រកួតនៅប្រទេសថៃ?
ចន្លោះមិនឃើញ
រហូតដល់ពេលនេះកម្មវិធីប្រដាល់គុនចម្រុះក្នុងទ្រុង One Fighting Championship មិនទាន់បានទៅរៀបចំការប្រកួតរបស់ខ្លួននៅលើទឹកដីប្រទេសថៃនៅឡើយទេ បើទោះជាដឹងច្បាស់ហើយថា ប្រទេសមួយនេះពេញនិយមខ្លាំងខាងប្រដាល់។ តើមានមូលហេតុអ្វី?
កញ្ញា Tammy Chan ប្រធានផ្នែកទំនាក់ទំនងសាធារណៈរបស់ស្ថាប័នប្រដាល់ One FC បានប្រាប់ថា ប្រទេសថៃជាកន្លែងមួយដែលពិបាកនឹងចូលទៅរៀបចំការប្រកួតប្រដាល់ក្បាច់គុនចម្រុះ MMA។
កញ្ញាបាននិយាយថា ៖«យ៉ាប់ណាស់ ទៅរៀបចំការប្រកួតនៅទីនោះអត់កើតទេ យើងបានព្យាយាមទាក់ទងទៅទីនោះដែរ តែអត់មានលទ្ធផល»។ ទោះបីជាយ៉ាងណាតំណាងរូបនេះមិនបានបញ្ជាក់ពីមូលហេតុដែលមិនអាចទៅរៀបចំការប្រកួតនៅប្រទេសថៃបាននោះទេ។
កន្លងមក លោក Victor Cui នាយកប្រតិបត្តិ One FC បាននិយាយថា កម្មវិធីប្រដាល់គុនចម្រុះ One FC នឹងធ្វើដំណើរទៅរៀបចំការប្រកួតរបស់ខ្លួនគ្រប់បណ្ដាប្រទេសទាំងអស់នៅអាស៊ីអាគ្នេយ៍ក្នុងនោះប្រទេសកម្ពុជា ឡាវ ថៃ និងវៀតណាមជាដើម។
ពាក់ព័ន្ធនឹងករណីនេះ លោក មាស សុខគ្រី ជាគ្រូបង្ហាត់ប្រដាល់ និងជាសមាជិកគណៈកម្មការរៀបចំការប្រកួតរបស់សហព័ន្ធកីឡាប្រដាល់កម្ពុជាបានលើកឡើងថា ៖ «ខ្ញុំមិនចោទគេទេ តែខ្ញុំយល់ថា ប្រហែលជាថៃខ្ចីដាវគេកាប់ដូចការប្រើក្បាច់បុរាណខ្មែរយើងអីចឹងដែរ»។
លោកបន្តថា ប្រហែលជាថៃចង់បង្ហាញថា ក្បាច់នេះជារបស់ថៃ ដូច្នេះមិនបាច់ធ្វើការប្រកួតនៅថៃនោះទេ គឺត្រឹមតែហ្វឹកហាត់នៅថៃ ហើយចេញទៅប្រកួតក្រៅប្រទេស ដើម្បីផ្សព្វផ្សាយក្បាច់ប្រដាល់របស់គេក៏ថាបាន។
កម្មវិធីប្រដាល់គុនចម្រុះអន្តរជាតិធំជាងគេនៅអាស៊ីនេះបានរៀបចំការប្រកួតជាច្រើនប្រទេសមកហើយដូចជា ហ្វីលីពីន ម៉ាឡេស៊ី សិង្ហបុរី តៃវ៉ាន់ ឥណ្ឌូណេស៊ី អារ៉ាប់រួម និងកម្ពុជាផងដែរ។ ការប្រកួតជារៀងរាល់ខែតែងតែមានកីឡាករថៃ និងបរទេសដែលបានហ្វឹកហាត់នៅប្រទេសថៃក៏ចូលរួមការប្រកួតដែរ។
កីឡាករភាគច្រើនជាពិសេសនៅបណ្ដាប្រទេសអាស៊ីអាគ្នេយ៍នេះសុទ្ធតែដាក់រហស្សនាមថា ជើងខ្លាំងក្បាច់គុនមួយថៃនៅពេលឡើងសង្វៀនក្នុងទ្រុង One FC។ ជាក់ស្តែងកីឡាករមកពីប្រទេសសិង្ហបុរី និងម៉ាឡេស៊ីបានប្រកាសថាខ្លួនជាជើងឯកមួយថៃពេលពួកគេលេចមុខប្រកួតក្នុងព្រឹត្តិការណ៍ Rise of the Kingdom នៅប្រទេសកម្ពុជាកាលពីថ្ងៃទី១២ ខែកញ្ញាកន្លងទៅនេះ។
ចំណុចខាងលើនេះស្ដែងបញ្ជាក់ឲ្យឃើញច្បាស់ថា ថៃបានកំពុងសាបព្រោះក្បាច់គុនរបស់ខ្លួនឲ្យពិភពលោកទទួលស្គាល់ និងបញ្ជាក់ថា ក្បាច់គុនចម្រុះក៏ជាផ្នែកមួយដែលផុសចេញពីក្បាច់គុនមួយថៃរបស់ខ្លួនដែរ ស្របពេលប្រទេសមួយនេះ និងកម្ពុជាកំពុងប្រជែងគ្នាផ្នែកខាងក្បាច់គុនបុរាណដើម្បីចូលជាសម្បត្តិបេតិកភណ្ឌពិភពលោកផ្នែកអរូបិយ។
ចំណែកប្រទេសកម្ពុជាវិញបានទទួលរៀបចំការប្រកួតរបស់ One FC ម្តងរួចមកហើយកាលពីថ្ងៃទី១២ ខែកញ្ញាកន្លងទៅថ្មីៗនេះ។ ណាហ្គាវើលបានចុះកិច្ចសហប្រតិបត្តិការនឹង One FC រយៈពេលពីរឆ្នាំដែលក្នុងមួយៗឆ្នាំយ៉ាងហោចណាស់ក៏មានការប្រកួតពីរដង។
មិនត្រឹមតែប៉ុណ្ណោះណាហ្គាវើលនឹងទំនុកបម្រុងបញ្ជូន សំអាង ឌុន ឲ្យទៅហ្វឹកហាត់ក្បាច់គុនចម្រុះនៅក្លិប Tiger Muay Thai & MMA Training Camp ក្នុងខេត្តភូកេតដែលជាក្លិបមួយដ៏ល្បីសំបូរដោយកីឡាករបរទេស និងថៃហ្វឹកហាត់ បន្ទាប់ពីកីឡាករកម្ពុជារូបនេះឈ្នះជើងឯក Grand Prix ក្រោយឈ្នះចាន់ រតនា។
នៅតុលាក្រោយនេះ One FC ធ្វើដំណើរទៅរៀបចំការប្រកួតនៅប្រទេសម៉ាឡេស៊ី និងខែវិច្ឆិកានៅប្រទេសសិង្ហបុរី ហើយធ្នូនៅប្រទេសចិន៕
លោកអ្នកយល់ឃើញយ៉ាងណាដែរចំពោះករណីនេះ?
អត្ថបទ៖ ជាន ចាន់រ៉ា