ក្បួនដង្ហែម្ចាស់មេដាយមាសពិភពលោក កែ ឡេង នឹងធ្វើនៅថ្ងៃទី១៧ វិច្ឆិកា
- 2015-11-12 22:22:02
- ចំនួនមតិ 0 | ចំនួនចែករំលែក 0
ក្បួនដង្ហែម្ចាស់មេដាយមាសពិភពលោក កែ ឡេង នឹងធ្វើនៅថ្ងៃទី១៧ វិច្ឆិកា
ចន្លោះមិនឃើញ
ក្បួនដង្ហែកិត្តិយសម្ចាស់មេដាយមាសប៉េតង់ពិភពលោក កែ ឡេង ដើម្បីទៅជួបសំណេះសំណាល ព្រមទាំងទទួលរង្វាន់ពីនាយករដ្ឋមន្ត្រីនៃព្រះរាជាណាចក្រកម្ពុជានឹងធ្វើឡើងនៅថ្ងៃទី១៧ ខែវិច្ឆិកាខាងមុខ។
ពេល កែ ឡេង ឡើងទទួលមេដាយមាស នៅថៃ (រូបថត៖ Chantrea Oum)
លោក វ៉ាត់ ចំរើន អគ្គលេខាធិការគណៈកម្មាធិការជាតិអូឡាំពិកកម្ពុជាបានប្រាប់ Sabay នៅថ្ងៃនេះថា ក្បួនដង្ហែកិត្តិយសម្ចាស់មេដាយមាសប៉េតង់ពិភពលោក កែ ឡេង នឹងត្រូវធ្វើឡើងនៅថ្ងៃទី១៧ ខែវិច្ឆិកាខាងមុខ ពោលគឺ ១០ថ្ងៃក្រោយនាំជ័យជម្នះត្រលប់មកមាតុប្រទេសវិញ។ ចំពោះកម្មវិធីលម្អិត ឯកឧត្ដមកំពុងប្រជុំ និងរង់ចាំការសម្រេចពីថ្នាក់លើបន្តទៀត។
អ្នកស្រី កែ ឡេង បានត្រលប់មកដល់មាតុប្រទេសវិញកាលពីថ្ងៃទី០៨ ខែវិច្ឆិកាកន្លងទៅ បន្ទាប់ពីដណ្ដើមបានមេដាយមាសប៉េតង់ផ្នែកវាយយកពិន្ទុជាលើកទី២ នៅប្រទេសថៃ។ ពេលមកដល់ព្រលានយន្តហោះ មានការទទួលពី ឯកឧត្ដម វ៉ាត់ ចំរើន អគ្គលេខាធិការនៃគណៈកម្មាធិការជាតិអូឡាំពិក និងឯកឧត្ដម ពិត ចំណាន រដ្ឋលេខាធិការក្រសួងអប់រំយុវជន និងកីឡា ប៉ុន្តែមិនមានការដង្ហែក្បួនកិត្តិយសឡើយ។
ចំពោះបញ្ហានេះដែរលោក វ៉ាត់ ចំរើន ធ្លាប់បានបញ្ជាក់ថា ដោយសាររៀបចំមិនទាន់ហើយរង់ចាំការសម្រេចពីថ្នាក់លើ ទើបគ្មានការដង្ហែក្បួនកិត្តិយសភ្លាមៗ។ ទោះបែបនេះក្ដី ក៏មានសារព័ត៌មានក្នុងស្រុកមួយចំនួនចុះផ្សាយថា អ្នកស្រី កែ ឡេង មានការអន់ចិត្តដែលគ្មានការដង្ហែភ្លាមៗ ខណៈសាមីខ្លួនផ្ទាល់បដិសេធចំពោះព័ត៌មានទាំងនោះ។
កីឡាការិនីប៉េតង់ជម្រើសជាតិកម្ពុជា កែ ឡេង ធ្លាប់បានឈ្នះមេដាយមាសប៉េតង់ពិភពលោកក្នុងព្រឹត្តិការណ៍អន្តរជាតិ Women’s World Championship of Petanque នៅប្រទេសបារាំងកាលពីឆ្នាំ២០១៣ ម្ដងរួចមកហើយ។ នៅឆ្នាំ ២០១៥នេះ អ្នកស្រីបានដណ្ដើមយកមេដាយមាសជាលើកទី២ ក្នុងព្រឹត្តិការណ៍ពិភពលោកដដែលនៅប្រទេសថៃ៕
មើលទិដ្ឋភាពកាលពិធីដង្ហែលើកទី១ សូមចុច...
អត្ថបទ៖ គង់ វិសាល