គ្រូ Barca ថានឹងស៊ី Real ឱ្យបានក្នុងជំនួប El Clasico

2014-10-20 18:06:00
ចំនួនមតិ 0 | ចំនួនចែករំលែក 0

ចន្លោះមិនឃើញ

លោក Luis Enrique អ្នកចាត់ការថ្មីរបស់ Barcelona បាននិយាយអះអាងថាក្នុងជំនួបដំបូង EL Clasico ដែលនឹងធ្វើឡើងនៅទឹកដី Real Madrid ថ្ងៃសៅរ៍នេះ ក្រុមរបស់លោកត្រូវតែឈ្នះឱ្យទាល់តែបាន។

ថ្វីត្បិត៥ប្រកួតចុងក្រោយរបស់ Real Madrid ធ្វើបានល្អយ៉ាងណាក្ដី ក៏លោក Enrique ដែលចូលមកដឹកនាំ Barca រដូវកាលនេះមិនទាន់ស្គាល់ពាក្យចាញ់ក្នុង La Liga នោះ បាននិយាយថា៖ “យើងនៅសល់ការប្រកួតជាច្រើនទៀត ហើយខ្ញុំមិនគិតថាការប្រកួតទាំងអស់ Real ធ្វើបានល្អទាំងអស់នោះទេ។ Barca នឹងទៅយកជ័យជម្នះនៅទឹកដី Real ដូចដែលធ្លាប់បានធ្វើពីមុនមក។ ហើយពេលនេះខ្ញុំចង់ឱ្យកីឡាកររបស់ខ្ញុំទាំងអស់សម្រាកឱ្យបានគ្រប់គ្រាន់ដើម្បីត្រៀមប្រយុទ្ធនៅចុងសប្ដាហ៍នេះ”។

លោក Luis Enrique ឈរបញ្ជាកូនក្រុមនាការប្រកួតកន្លងមក

មុនជំនួប EL Clasico នេះ Real Madrid និង Barcelona នៅមានមួយប្រកួតដូចគ្នាក្នុងពានរង្វាន់ UEFA Champions League ពោលគឺ Real Madrid ត្រូវជួប Liverpool នៅយប់ថ្ងៃអង្គារ ឯ Barcelona ត្រូវជួប Ajax នៅយប់ថ្ងៃពុធ។

ខ្សែប្រយុទ្ធថ្មី Luis Suarez នឹងអាចបង្ហាញខ្លួនជាលើកដំបូងឲ្យ Barca ក្នុងជំនួបនេះ ស្របពេល Messi អាចនឹងក្លាយជាអ្នកស៊ុតបាល់បញ្ចូលទីច្រើនជាងគេក្នុងប្រវត្តិសាស្ត្រ La Liga (all-time leading goalscorer in La Liga ) ប្រសិនបើអាចស៊ុតចូល ។

ដោយឡែកខាង Real Madrid វិញ តួអង្គសំខាន់ Cristiano Ronaldo បានបង្ហាញទម្រង់លេងយ៉ាងល្អ ដោយអាចរកគ្រាប់បាល់បាន១៥គ្រាប់ហើយក្នុង៧ប្រកួតនៅ La Liga ដើមរដូវកាលនេះ។ នេះមានន័យថាជាមធ្យម ១ប្រកួត កីឡាករវ័យ២៩ឆ្នាំរូបនេះរកបានយ៉ាងតិច២គ្រាប់។

គិតត្រឹម៥ប្រកួតចុចក្រោយរដូវកាលនេះ Real Madrid ឈ្នះ Levante ៥-០, ឈ្នះ Athletic Bilbao ៥-០, ឈ្នះ Villarreal ២-០, ឈ្នះ Elche ៥-១ និង ឈ្នះ Deportivo ៨-២ ឈរនៅចំណាត់ថ្នាក់លេខ៣បណ្ដោះអាសន្ន។ ចំណែកឯ Barcelona វិញ ឈ្នះ Eibar ៣-០, ឈ្នះ Rayo Vallecano ២-០, ឈ្នះ Granada ៦-០, ឈ្នះ Levante ៥-០ និងស្មើជាមួយ Malaga ០-០ ឈរនៅកំពូលតារាងបណ្ដោះអាសន្នដោយនាំមុខ Real ៤ពិន្ទុ។

ចាំមើលតើលោក Enrique អាចទៅស៊ី Real ដល់ក្នុងដីបានដូចការអះអាងដែរឬទេ? សម្រាប់ប្រិយមិត្តវិញ គិតថា Barca ឬ Real ជាអ្នកឈ្នះការប្រកួតនេះ?

ចុចអាន៖ Barca មិនអាចលេងនៅ La Liga បានទេ បើទីក្រុងមួយនេះកាត់ផ្ដាច់ពីអេស្ប៉ាញ

ប្រែសម្រួល៖ មុន្នី រម្យ

ប្រភព៖ bbc