Tavia Yeung ចុះចោលទ្រនំ TVB ប្រុងបើកក្រុមហ៊ុនផ្ទាល់ខ្លួន
- 2015-11-27 22:38:24
- ចំនួនមតិ 0 | ចំនួនចែករំលែក 0
Tavia Yeung ចុះចោលទ្រនំ TVB ប្រុងបើកក្រុមហ៊ុនផ្ទាល់ខ្លួន
ចន្លោះមិនឃើញ
ស្របពេលដែលប៉ុស្តិ៍ទូរទស្សន៍ហុងកុង TVB កំពុងស្វែងរកតារាស្រករក្រោយដើម្បីជំនួសជើងឲ្យតារារៀមច្បងទាំងឡាយដែលបានចាកចេញទាំងគ្មានស្ដាយស្រណោះនោះ នៅពេលនេះ តារាជើងចាស់របស់ TVB Tavia Yeung បានសម្រេចចិត្តលាចាកចេញដែរហើយ។
ខណៈដែលតារាស្រករក្រោយកំពុងតែវាយលុកទីផ្សារនៅ TVB តារាសម្ដែងលំដាប់ជួរមុខ Tavia Yeung ត្រូវធ្លាយពាក្យចចាមអារ៉ាមថាជាតារាសម្ដែងបន្ទាប់ដែលនឹងដើរចេញពីទ្រនំដែលនាំឲ្យនាងមានឈ្មោះល្បីដូចសព្វថ្ងៃ។ ក្នុងចំណោមកំពូលតារាសម្ដែងស្រីទាំងបួនរបស់ TVB រួមមាន Myolie Wu, Kate Tsui, Linda Chung និង Tavia Yeung គឺសល់តែតារាត្រកូល Yeung ម្នាក់គត់ដែលនៅជ្រកក្រោមដំបូលចាស់មួយនេះ ដោយតារាស្រីដទៃទៀតបានដោះដៃចោលប៉ុស្តិ៍ទូរទស្សន៍ហុងកុងនេះអស់ហើយ។ ផ្អែកតាមបណ្ដាញព័ត៌មាន Jaynestars បានឲ្យដឹងថា Tavia អន់ចិត្តដោយសារតែ TVB ប្រឹងលើកកម្ពស់តារាទើបរះ Grace Chan ខ្លាំងពេកដោយមិនរវីរវល់ជាមួយនឹងខ្លួន។ តាមប្រភពដដែលនេះដែរ Tavia Yeung ជាមួយនឹងតារាសម្ដែង Moses Chan ក៏មានគម្រោងបើកក្រុមហ៊ុនកម្សាន្តផ្ទាល់ខ្លួននៅចិនដីគោកដែរ។
អ្នកគ្រប់គ្រងជាន់ខ្ពស់របស់ TVB បានចាប់ផ្ដើមចរចាជាមួយតារាអាយុ ៣៦ ឆ្នាំពីរឿងចុះកុងត្រាថ្មីដែលនឹងផុតនៅខែមេសា ឆ្នាំ ២០១៦ ខាងមុខនេះ តែ Tavia គ្មានគំនិតនឹងចង់បន្តកុងត្រានេះទេ។ លើសពីនេះទៅទៀតសូម្បីតែកម្មវិធីគម្រប់ខួបរបស់ TVB ក៏តារារូបនេះមិនបានបង្ហាញវត្តមានចូលរួមដែរ។ បើទោះជានៅក្នុងឆ្នាំ ២០១៥ នេះ Tavia មានរឿងភាគបីត្រូវបានចាក់បញ្ចាំងក៏ពិតមែន តែតារាសម្ដែងស្រីនេះគ្មានបំណងចូលប្រជែងតំណែងរាជិនីទូរទស្សន៍សម្រាប់ឆ្នាំនេះនោះទេ៕
ចុចអាន៖តួរឿង “The Moon Embrace The Sun” មានផ្ទៃពោះកូនទីពីរ ក្រោយការ១០ឆ្នាំ
ប្រែសម្រួល៖ សុវណ្ណផៃ ប្រភព៖lollipop