ខ្មាន់កាំភ្លើងបាញ់ប្រហារគ្លីនិកមួយក្នុងសហរដ្ឋអាមេរិក បណ្ដាលឲ្យរបួសមនុស្ស ១១នាក់
- 2015-11-28 15:54:42
- ចំនួនមតិ 0 | ចំនួនចែករំលែក 0
ខ្មាន់កាំភ្លើងបាញ់ប្រហារគ្លីនិកមួយក្នុងសហរដ្ឋអាមេរិក បណ្ដាលឲ្យរបួសមនុស្ស ១១នាក់
ចន្លោះមិនឃើញ
មន្ត្រីប៉ូលិសនៅទីក្រុង Colorado Springs សហរដ្ឋអាមេរិកបាននិយាយថា មនុស្សយ៉ាងហោចណាស់ ១១នាក់ដែលរាប់បញ្ចូលទាំងប៉ូលិស ៥នាក់ បានរងរបួសក្នុងហេតុការណ៍បាញ់ប្រហារមួយពីសំណាក់ខ្មាន់កាំភ្លើងនៅគ្លីនិក Planned Parenthood កាលពីយប់មិញនេះ។
អភិបាលក្រុង Colorado Springs លោក John Suthers បាននិយាយថា អាជ្ញាធរកំពុងព្យាយាមកំណត់ពីចំនួនជនរងគ្រោះជាក់ស្ដែង និងរកមើលថាមានមនុស្សនៅខាងក្នុងអគារទៀតឬអត់។ យ៉ាងណាក្ដី តាមទិន្នន័យដំបូងបានឲ្យដឹងថា មនុស្ស ១១នាក់រាប់ទាំងមន្ត្រីប៉ូលិស ៥នាក់បានរងរបួស និងត្រូវបញ្ជូនទៅសង្គ្រោះនៅមន្ទីរពេទ្យ។
ក្រុមមន្ត្រីជំនាញកំពុងពិនិត្យទៅលើវត្ថុនានាដែលនាំចូលទៅក្នុងអគារគ្លីនិក ដើម្បីប្រាកដថាមិនមានគ្រោះថ្នាក់អ្វីទៀត ព្រោះដំបូងឡើយប៉ូលិសបានប្រកាសឲ្យមានការប្រុងប្រយ័ត្នក្រែងវត្ថុទាំងនោះជាគ្រាប់បែកឆ្នៃ។ លោក Suthers បាននិយាយថា ត្រូវបញ្ជូនអ្នករាវគ្រាប់បែកទៅក្នុងជាមុនសិន ទើបអាចចូលទៅរកអ្នករបួស ឬស្លាប់នៅក្នុងអគារ Planned Parenthood ជាក្រោយ។
៥ម៉ោងបន្ទាប់ពីការបាញ់ប្រហារខាងលើកើតឡើង ទើបប៉ូលិសចាប់បានជនសង្ស័យ ប៉ុន្តែមិនទាន់បង្ហាញអត្តសញ្ញាណនៅឡើយទេ។ កាលពីប៉ុន្មានថ្ងៃមុន ក៏មានហេតុការណ៍បាញ់រះស្រដៀងគ្នា កើតឡើងនៅទីក្រុង New Orlean ដែលបណ្ដាលឲ្យមនុស្សយ៉ាងហោចណាស់ ១៦នាក់រងរបួស៕
ប្រែសម្រួល៖ គង់ វិសាល ប្រភព៖ ABC