ភូមិមួយនៅថៃ ប្រារព្ធពិធីដឹងគុណស្វា ដោយទិញផ្លែឈើឲ្យស៊ីអស់ជាង១ម៉ឺនដុល្លារ

2015-12-01 21:27:28
ចំនួនមតិ 0 | ចំនួនចែករំលែក 0

ចន្លោះមិនឃើញ

អ្នកភូមិនៅខេត្ត Lopburi ប្រទេសថៃ ចម្ងាយប្រមាណ ១៥០គីឡូម៉ែត្រភាគខាងជើងទីក្រុងបាងកក បានប្រារព្ធពិធីបុណ្យរំលឹកគុណស្វា (Monkey Festival ឬ Monkey Buffet Festival) ដោយឲ្យស្វាជាច្រើនក្បាលស៊ីបន្លែ ផ្លែឈើ និងចាហួយក្មេងៗតាមចិត្តចង់ អស់ជាង២តោន បើគិតជាប្រាក់វិញមានតម្លៃប្រមាណ ១១០០០ដុល្លារអាមេរិក។

ក្នុងអំឡុងពេលពិធីបុណ្យ ស្វាជាច្រើនក្បាលបានលោតផ្លោះតុពីមួយទៅមួយ ទៅស៊ីអាហារទាំងនោះយ៉ាងប្រញាប់ប្រញាល់ដូចស្រុកកើតសង្គ្រាម ខណៈអ្នកទេសចរឈរសម្លឹងហ្វូងសត្វទាំងនេះប្រញាយគ្នា។

អ្នករៀបចំពិធីបុណ្យ «Monkey Festival» លោក Yongyuth Kitwattananusorn បានប្រាប់សារព័ត៌មានថៃថា អាហាររបស់ស្វាឆ្នាំនេះភាគច្រើនជាផ្លែធូរេន និងឈែរី ដែលទិញពីប្រទេសឈីលី ក្នុងតម្លៃមួយគីឡូ ១៩០០បាត ឬ ៥៣ដុល្លារអាមេរិក។ លោកបាននិយាយបន្ថែមថា៖ "ខ្ញុំគិតថាកម្មវិធីនេះពិតជាល្អខ្លាំងណាស់។ វាបាននាំមកនូវភ្ញៀវទេសចរជាច្រើន។ វាពិតជាល្អសម្រាប់សេដ្ឋកិច្ច"។

ចំណែកអ្នកភូមិប្រារព្ធពិធីនេះឡើង គឺដើម្បីអរគុណស្វា ដែលបាននាំភ្ញៀវទេសចរជាច្រើន ទៅលេងសហគមន៍ពួកគេជារៀងរាល់ឆ្នាំ ដែលបានជួយឲ្យសេដ្ឋកិច្ចពលរដ្ឋទីនោះកាន់តែធូរធារឡើង។ ពិធីនេះត្រូវគេចាប់ផ្ដើមប្រារព្ធដំបូងក្នុងឆ្នាំ ១៩៨៩ និងដើម្បីជំរុញកំណើនទេសចរដែរ៕