ហង្ស សូរីយ៉ាន់ ថាចង់ភ្លក្សរសជាតិជាតួសម្ដែង

2015-12-03 18:25:24
ចំនួនមតិ 0 | ចំនួនចែករំលែក 0

ចន្លោះមិនឃើញ

តារាម៉ូដែលខ្ពស់ស្រឡះកញ្ញា ហង្ស សូរីយ៉ាន់ បានប្រាប់ឲ្យដឹងថា នាងពិតជាចង់ភ្លក្សរសជាតិសម្ដែងខ្លាំងណាស់ ហើយបើមានផលិតកម្មណាចង់ទាក់ទងនាងឲ្យសម្ដែង ទោះជាតួអ្វីក៏នាងមិនប្រកាន់ដែរ។

“ខ្ញុំចង់ណាស់រឿងសម្ដែងក្នុងខ្សែភាពយន្តហ្នឹង តែមិនទាន់ដែលសម្ដែងរបៀបជាកុនខ្នាតធំអីនៅឡើយទេ ធ្លាប់តែថតរឿងអប់រំបានពីររឿងរបស់អង្គការដូចជា ស្នេហ៍ ៩ និងរបស់អង្គការមួយទៀតតែផ្អាកមួយរយៈសិន។ ” តារាម៉ូដែលខាងលើបានបញ្ជាក់ទៀតថា បើសិនជាបានសម្ដែងមែនទោះគេតម្រូវឲ្យដើរតួអ្វីក៏ព្រមដែរ ព្រោះនាងចង់ផ្លាស់ប្ដូរ និងចង់ចេះផ្នែកសិល្បៈនេះឲ្យបានច្រើនទម្រង់។

តារាវ័យ ២០ ឆ្នាំបានបន្តទៀតថា ពីមុននាងគិតថាការសម្ដែងមានភាពលំបាកណាស់ និងគ្មានទេពកោសល្យទេ។ តែពេលចូលរួមប្រឡងក្នុងកម្មវិធី “Cambodia Next Top Model” ធ្លាប់មានតារាសម្ដែងជើងចាស់លោក ទេព រិនដារ៉ូ ត្រូវបានគេអញ្ជើញមកបង្រៀនបេក្ខនារីទាំងអស់គ្នាមក កញ្ញាដឹងខ្លួនថា នាងក៏មានសមត្ថភាពអាចដាក់អារម្មណ៍ចូលតួបានល្អគួរសមដែរ។

“ពីមុនគិតថាគ្មានសមត្ថភាពសម្ដែងបានទេ តែតាំងពីបានហ្វឹកហាត់ខ្លះៗមក ក៏មានគំនិតផ្ទុយវិញ។ ” និស្សិតស្រីផ្នែកច្បាប់បានថ្លែងទៀតថាចំពោះការដើរម៉ូដនាងអាចធ្វើបានល្អហើយ តែអាជីពសម្ដែង និងពិធីការិនីនាងនៅមានកម្រិតនៅឡើយ។

ហង្ស សូរីយ៉ាន់ បានប្រាប់ថា ចំពោះអត្តចរិតដែលកញ្ញាចង់ដើរតួបំផុត គឺប្រភេទ Cute Cute ព្រោះត្រូវនឹងចរិតធម្មជាតិរបស់នាង។ “សម្រាប់ខ្ញុំជំនាញទាំងបី ខ្ញុំគិតថាអាជីពជាតួសម្ដែងមានភាពលំបាកជាង ព្រោះត្រូវទន្ទេញប៉ារ៉ូល គិត លេងទឹកមុខ និងបញ្ចូលអារម្មណ៍ច្រើននៅក្នុងនោះ។ តែទោះជាយ៉ាងនេះខ្ញុំនឹងព្យាយាមឲ្យអស់ពីលទ្ធភាព។”

តារាស្រីមានប្រភពនៅរាជធានីភ្នំពេញនេះបានបញ្ជាក់ថា នាងហ៊ានសម្ដែងបែបសិចស៊ីដោយគ្រាន់តែស្លៀកនៅសល់ត្រឹមប៊ីគីនីបាន តែបើដល់ថ្នាក់ថតស្រាត គឺនាងថាមិនហ៊ានទេ៕

កំពុងមានចម្រូងចម្រាស ម៉ៅ ហាជី បញ្ចេញតម្លៃខ្លួន Trailer រឿងដែល ប្រាក់ មុន្នីឧត្ដម សម្ដែងចេញហើយ ថន ស្រីណៃ ហាត់ប្រាណពេលព្រឹកជួយឲ្យឆាប់ស្រកគីឡូជាងពេលល្ងាច

អត្ថបទ៖ទ្រី រ៉ាវី