Fans មីយ៉ាន់ម៉ាអរពេករត់ចូលទីលាន ត្រូវ AFC ពិន័យ
- 2014-10-21 00:13:52
- ចំនួនមតិ 0 | ចំនួនចែករំលែក 0
Fans មីយ៉ាន់ម៉ាអរពេករត់ចូលទីលាន ត្រូវ AFC ពិន័យ
ចន្លោះមិនឃើញ
សហព័ន្ធកីឡាបាល់ទាត់ទ្វីបអាស៊ី (AFC) បានពិន័យសហព័ន្ធបាល់ទាត់មីយ៉ាន់ម៉ា (MFF) ជាទឹកប្រាក់ ២៤០០០ដុល្លារអាមេរិក ដោយសារអ្នកគាំទ្រក្រុមនេះបានសម្រុកចូលទីលានប្រកួតកាលពីសប្ដាហ៍មុន។ មិនត្រឹមតែពិន័យជាប្រាក់ទេ AFC ក៏ព្រមានថាមីយ៉ាន់ម៉ាអាចត្រូវប្រកួតបិទទ្វារផងដែរ ពោលគឺមិនអនុញ្ញាតឲ្យអ្នកទស្សនាចូលមើលនោះឡើយ ប្រសិនបើមិនអាចគ្រប់គ្រងពួកគេបានល្អទេនោះ។
អ្នកគាំទ្រក្រុម U-19 មីយ៉ាន់ម៉ាជាច្រើននាក់បានរត់ចូលទីលានប្រកួត ដើម្បីអបអរ ក្រោយពេលមីយ៉ាន់ម៉ា យកឈ្នះអារ៉ាប់រួម នៅក្នុងការប្រកួតវគ្គ៨ក្រុមចុងក្រោយ AFC U-19 Championship នៅទីក្រុងរ៉ង់ហ្គូនកាលពីថ្ងៃសុក្រ។
AFC បានបញ្ជាក់ក្នុងសេចក្ដីថ្លែងការណ៍របស់ខ្លួនថា៖ "ដើម្បីធានាសុវត្ថិភាពលើទីលានប្រកួត ក៏ដូចជាការគោរពតាមច្បាប់ និងបទបញ្ជា MFF ត្រូវធ្វើយ៉ាងណាគ្រប់គ្រងអ្នកទស្សនារបស់ខ្លួនឲ្យបាន នៅក្នុងប្រកួតក្រោយៗ"។
សេចក្ដីប្រកាសដដែលនោះ ក៏បានបញ្ជាក់ផងដែរថាប្រសិនបើមានករណីបែបនេះមួយប្រកួតទៀត នោះមីយ៉ាន់ម៉ានឹងត្រូវលេងដោយគ្មានអ្នកទស្សនា។
គួរបញ្ជាក់ផងដែរថា នៅក្នុងការប្រកួតនោះ ក្រុមម្ចាស់ផ្ទះមីយ៉ាន់ម៉ាបានយកឈ្នះអារ៉ាប់រួម ១-០ ដើម្បីឡើងទៅវគ្គពាក់កណ្ដាលផ្ដាច់ព្រ័ត្រ។ ការឡើងនោះ ក៏មានន័យថាក្រុមនេះនឹងអាចលេងនៅពានរង្វាន់ FIFA U-20 World Cup នៅឆ្នាំ២០១៥ជាស្វ័យប្រវត្តិផងដែរ។ ៣ក្រុមផ្សេងទៀតដែលឡើងទៅវគ្គ៤ក្រុមចុងក្រោយដែរនោះ រួមមាន អ៊ុយបេគីស្ថាន (ឈ្នះថៃ), កូរ៉េខាងជើង (ឈ្នះជប៉ុន) និងកាតារ (ឈ្នះចិន)៕
ចុចអានរឿងរ៉ាវជាច្រើនទៀតទាក់ទងនឹងកីឡាបាល់ទាត់អាស៊ី
ដោយ៖ សុខ សុវត្ថិ
ប្រភព៖ straitstimes