Psy សម្ដែងបទ "Up & Down” របស់ EXID ផ្អើលអស់ទស្សនិកជន

2015-12-25 15:47:02
ចំនួនមតិ 0 | ចំនួនចែករំលែក 0

ចន្លោះមិនឃើញ

តារាចម្រៀងកូរ៉េល្បីឈ្មោះទូទាំងពិភពលោក Psy បានធ្វើឲ្យទស្សនិកជនភ្ញាក់ផ្អើលម្ដងទៀតនៅពេលយកបទចម្រៀងរបស់តារាស្រី EXID មកសម្ដែងនៅក្នុងការប្រគំតន្ត្រីរបស់ខ្លួន។

ការប្រគំតន្ត្រី "All Night Stand” របស់តារាចម្រៀងកូរ៉េខាងត្បូង Psy ត្រូវបានប្រព្រឹត្តឡើងកាលពីថ្ងៃទី ២៤ ខែធ្នូមុននេះនៅកីឡដ្ឋាន Olymin Park Gymnastics ទីក្រុងសេអ៊ូល។ នៅក្នុងកម្មវិធីនេះ តារាចម្រៀងវ័យ ៣៧ ឆ្នាំមិនត្រឹមតែសម្ដែងបទចម្រៀងរបស់ខ្លួននោះទេ តែព្រមទាំងបានបង្ហាញពីការធ្វើត្រាប់តាមបទរបស់តារាចម្រៀងដទៃទៀតផង។

ជារៀងរាល់ឆ្នាំ Psy តែងតែជ្រើសយកបទរបស់តារាចម្រៀងនារីយកមកសម្ដែងដើម្បីមកបង្ហាញអ្នកគាំទ្រដែលបានមកចូលរួមក្នុងការប្រគំតន្ត្រីរបស់លោក។ កាលពីឆ្នាំមុនម្ចាស់បទ "Daddy” បានសម្ដែងបទ "Red” របស់ Hyuna រីឯឆ្នាំ ២០១៣ វិញលោកប្រែខ្លួនទៅជា Sunmi សមាជិកក្រុម Wonder Girls ដើម្បីសម្ដែងបទ "24 Hours”។

សម្រាប់ឆ្នាំ ២០១៥ តារាចម្រៀងជួរមុខនេះ បានក្លែងខ្លួនធ្វើជាក្រុមចម្រៀងនារី EXID ហើយសម្ដែងបទ "Up & Down”។ ក្នុងឈុតខោខ្លីខ្មៅ ជាមួយអាវដៃវែងពណ៌លឿង គួបផ្សំជាមួយដើមទ្រូងក្លែងក្លាយ Psy បានសម្ដែងដូចម្ចាស់បទដើមបេះបិទ៕ បើទោះបីជាមានរាងមិនស្ដើងដូចសមាជិក EXID ក៏ដោយ តែជាមួយនឹងទេពកោសល្យរបស់ខ្លួន Psy បានធ្វើឲ្យអ្នកដែលមានវត្តមាននៅក្នុងកម្មវិធីនោះបានទទួលយកយប់មុនថ្ងៃបុណ្យណូអែលមួយមិនអាចបំភ្លេចបាន៕