Jimmy Kiss ប្រាប់មូលហេតុមិនទាន់ចង់ចូលផលិតកម្ម
- 2014-10-21 21:28:10
- ចំនួនមតិ 0 | ចំនួនចែករំលែក 0
Jimmy Kiss ប្រាប់មូលហេតុមិនទាន់ចង់ចូលផលិតកម្ម
ចន្លោះមិនឃើញ
Jimmy Kiss មិនទាន់មានគម្រោងចូលច្រៀងក្នុងផលិតកម្មណាមួយនៅឡើយ ព្រោះបារម្ភថា អាចមានការប៉ះពាល់ដល់ឯករាជ្យភាពនៃការតែងនិពន្ធរបស់ខ្លួន ហើយសុខចិត្តផលិតបទដោយខ្លួនឯង និងបង្ហោះលើបណ្ដាញសង្គមនានាទៅវិញ។
Jimmy Kiss និយាយថា៖" ខ្ញុំមិនចូលចិត្តចម្លងបទចម្រៀងពីគេទេ គឺចូលចិត្តធ្វើអ្វីជាស្នាដៃខ្លួនឯងជាង និងគ្មានបរទេសណាមករិះគន់យើងទេ"។ ធម្មតាអ្នកនិពន្ធគ្រប់រូបត្រូវការសេរីភាពក្នុងការសរសេរបទចម្រៀងរបស់ខ្លួន និងមិនចង់រងគំនាបរបស់ផលិតកម្ម ដើម្បីតែប្រាក់ចំណេញនោះទេ។
តារាចម្រៀងរូបនេះបានបន្ថែមថា រូបគេផលិតបានបទចម្រៀងប្រមាណជាង២០បទហើយ ដែលសុទ្ធសឹងតែជាស្នាដៃមិនចម្លងពីបរទេស។ ទោះបីជាយ៉ាងណា ក្នុងចំណោមបទចម្រៀងទាំងអស់នោះ អាចមានមួយចំនួន ជាការសហការផលិតរួមគ្នាជាមួយមិត្តភ័ក្ដិ ដែលមាននិស្ស័យសិល្បៈ និងនិន្នាការមិនចម្លងដូចគ្នា។
បទចម្រៀងភាគច្រើនរបស់ Jimmy Kiss គេឃើញបង្ហោះលើបណ្ដាញសង្គម ហើយទទួលបានការគាំទ្រគួរឲ្យកត់សម្គាល់ដូចជាបទ "Baby I am sorry”, “កុំអាណិតបង" និងបទ "បើសិនគ្មានអូន"ជាដើម។ ម្ចាស់បទបញ្ជាក់ថា គ្មានគម្រោងថតជាCDលក់លើទីផ្សារនៅឡើយ ព្រោះកន្លងមកមានផលិតកម្មមួយចំនួនមិនបានសម្រេចនោះទេ។
Jimmy Kiss បញ្ជាក់ថា៖“ ខ្ញុំយល់ថា ការចង់បានចំណូលពីបទនិពន្ធថ្មីបែបនេះ គឺមានអារម្មណ៍ថា តឹងតែងចិត្តមែនទែន ទើបមិនទាន់ចងថតដាក់CDលក់ដូចអ្នកផ្សេងទៀត"។ ម្យ៉ាងទៀត លោកមិនទាន់ចាប់អារម្មណ៍លើលុយកាក់ខ្លាំងពេកនោះទេ ក្នុងហេតុផលមិនទាន់មានប្រពន្ធកូន ដែលត្រូវគិតគូរ។
ទោះបីជាយ៉ាងណា Jimmy Kiss បើកផ្លូវចរចាជាមួយផលិតកម្មនានា ប្រសិនបើចាប់អារម្មណ៍ចំពោះសមត្ថភាពបង្កើតបទចម្រៀងថ្មីរបស់គេ ហើយលក្ខខណ្ឌចាំបាច់នោះ គឺចង់បានសេរីភាពតែងនិពន្ធ និងផលិតបទចម្រៀងប៉ុណ្ណោះ៕
-បទ" Baby I'm sorry" របស់ Jimmy Kiss
http://youtu.be/fkZYsJwfDfc
-"កុំអាណិតបង"
http://youtu.be/Ew2Z_WPxpHY
-"បើសិនគ្មានអូន"
http://youtu.be/qSZ37w8eS0w
អត្ថបទ៖ សំ ជំនាញ