ក្រុមណាជាម្ចាស់ជើងឯកពានរង្វាន់ Soccer League ល្ងាចនេះ?
- 2015-12-26 15:00:08
- ចំនួនមតិ 0 | ចំនួនចែករំលែក 0
ក្រុមណាជាម្ចាស់ជើងឯកពានរង្វាន់ Soccer League ល្ងាចនេះ?
ចន្លោះមិនឃើញ
ក្រុមអាណាចក្របៃតង និងក្រុមយុវជន វ៉ិចតូរី អេហ្វស៊ី នឹងត្រូវជួបប្រកួតគ្នាវគ្គផ្ដាច់ព្រ័ត្រនៅវេលាម៉ោង ៤រសៀលថ្ងៃសៅរ៍នេះ ដើម្បីដណ្ដើមពានរង្វាន់ជើងឯក Soccer League លើកទី៣ ប្រចាំឆ្នាំ២០១៥។ ការប្រកួតក៏មានផ្សាយផ្ទាល់តាមកញ្ចក់ទូរទស្សន៍ BTV ផងដែរ។
កាលពីថ្ងៃទី២១ ក្រុមយុវជន វ៉ិចតូរី អេហ្វស៊ី បានយកឈ្នះក្រុម យុវជន ក.១២ ដោយលទ្ធផល ២-០ ក្នុងវគ្គពាក់កណ្ដាលផ្ដាច់ព្រ័ត្រ ឡើងទៅចាំនៅវគ្គផ្ដាច់ព្រ័ត្រមុន។ ចំណែកក្រុមអាណាចក្របៃតងបានឡើងទៅវគ្គផ្ដាច់ព្រ័ត្រ បន្ទាប់ពីយកឈ្នះក្រុមសម្ព័ន្ធ គ.ស.ន.ប.ក ដោយបាល់ប៉េណាល់ទីកាត់សេចក្ដី ៧-៨ បន្ទាប់ពីបញ្ចប់លទ្ធផល ១-១ កាលពីរសៀលថ្ងៃទី២២។
ក្រុមទាំង២ នឹងត្រូវជួបប្រកួតគ្នានៅវេលាម៉ោង ៤រសៀលថ្ងៃសៅរ៍នេះ ដើម្បីដណ្ដើមជើងឯកពានរង្វាន់ Soccer League លើកទី៣ ដែលរៀបចំឡើងដោយសហភាពសហព័ន្ធយុវជនកម្ពុជា (ស.ស.យ.ក) សហការជាមួយសហព័ន្ធកីឡាបាល់ទាត់កម្ពុជា (FFC)។ ក្រុមជើងឯកនឹងទទួលបានប្រាក់រង្វាន់ ១០លានរៀល ក្រុមជើងឯករងទទួលបានប្រាក់រង្វាន់ ៧លានរៀល ឯក្រុមលេខ៣ នឹងទទួលបានប្រាក់រង្វាន់ ៥លានរៀល។
ពិធីបិទការប្រកួតនៅល្ងាចនេះ នឹងមានការចូលរួមពី ឯកឧត្តម ថោង ខុន រដ្ឋមន្ត្រីក្រសួងទេសចរណ៍ និងជាប្រធានគណៈកម្មាធិការជាតិកម្ពុជា ឯកឧត្ដម សៅ សុខា ប្រធានសហព័ន្ធកីឡាបាល់ទាត់កម្ពុជា និង ឯកឧត្ដម ហ៊ុន ម៉ានី ប្រធានសហភាពសហព័ន្ធយុវជនកម្ពុជា៕
ក្រុមយុវជន វ៉ិចតូរី អេហ្វស៊ី
អត្ថបទ៖ គង់ វិសាល