នាយតាក់ស៊ី និយាយរឿងប្រចណ្ឌភរិយាពេលសម្ដែង

2016-01-11 17:19:46
ចំនួនមតិ 0 | ចំនួនចែករំលែក 0

ចន្លោះមិនឃើញ

តារាកំប្លែង នាយតាក់ស៊ី បានប្រាប់ឲ្យ Sabay រឿងដែលខ្លួនប្រចណ្ឌភរិយាពេលសម្ដែងថា គ្រាន់ជាការលេងឲ្យបងប្អូនទស្សនិកជនសើចសប្បាយប៉ុណ្ណោះ។

“អត់ទេបង ខ្ញុំមិនធ្លាប់ប្រចណ្ឌភរិយាទេ ពេលលេងជាមួយពួកគាត់(នាយគ្រឿន នាយក្រូច នាយពែកមី) អីនោះទេ ព្រោះនេះ គ្រាន់តែជាការសម្ដែងដើម្បីឲ្យបងប្អូនសើច។” តាក់ស៊ី និយាយបែបនេះ បន្ទាប់ពីការលេងកំប្លែងរបស់ក្រុមនាយសប្ដាហ៍មុនត្រូវបានមហាជនរិះគន់ ថាបំណងទៅបៀតបៀននាងភីម។

លោកបានថ្លែងបន្តទៀតថា នៅលើកញ្ចក់ទូរទស្សន៍លោកតែងបញ្ចេញអាកប្បកិរិយា ឬពាក្យសម្ដីខឹងច្រឡោតមែន តែធាតុពិតគ្មានរឿងបែបនោះឡើយ។ បុរសរហ័សនាម អ៊ូខុង បានបន្តទៀតថា ចំពោះសកម្មភាពនៅខាងក្រៅឆាកវិញ គឺពួកលោកស្រលាញ់រាប់អានគ្នាដូចបងប្អូនបង្កើត ដោយធ្លាប់ស្គាល់ក្រុមគ្រួសារ និងទៅលេងផ្ទះគ្នាទៅវិញទៅមកទាំងអស់គ្នាក្នុងក្រុមទៀតផង។

បុរសវ័យ ៣០ ឆ្នាំជាងរូបនេះ បានប្រាប់ទៀតថា បញ្ហានេះ មានបងប្អូនអ្នកគាំទ្រមួយចំនួន ក៏ធ្លាប់និយាយ និងសួរលោកដែរ ប៉ុន្តែឆ្លៀតក្នុងឱកាសនេះ លោកសុំយកឱកាសនេះប្រាប់ផងថា នេះគ្រាន់ជាការសម្ដែង និងបានរៀបចំទុកជាមុនពេលឡើងឆាកប៉ុណ្ណោះ៕

អត្ថបទ៖ទ្រី រ៉ាវី