គីម ជុងអ៊ុន បញ្ជាឲ្យប្រហារជីវិតអគ្គមេបញ្ជាការយោធា
- 2016-02-11 15:58:42
- ចំនួនមតិ 0 | ចំនួនចែករំលែក 0
គីម ជុងអ៊ុន បញ្ជាឲ្យប្រហារជីវិតអគ្គមេបញ្ជាការយោធា
ចន្លោះមិនឃើញ
អគ្គមេបញ្ជាការកូរ៉េខាងជើងលោក Ri Yong-gil ត្រូវបានមេដឹកនាំផ្ដាច់ការ គីម ជុងអ៊ុន បញ្ជាឲ្យប្រហារជីវិត កាលពីសប្ដាហ៍មុន ដោយចោទពីបទពុករលួយ និងកិបកេងប្រយោជន៍ផ្ទាល់ខ្លួនជាច្រើនទៀត។ នេះបើតាមប្រភពស្និទ្ធនឹងកិច្ចការកូរ៉េខាងជើង បានបង្ហើបប្រាប់កាលពីថ្ងៃពុធទី ១០កុម្ភៈម្សិលមិញ។
លោក Ri Yon-gil
ព័ត៌មាននេះ លេចឡើងចំពេលមានភាពតានតឹងលើកូរ៉េខាងជើង ពីសំណាក់សហគមន៍អន្តរជាតិ ក្រោយកូរ៉េខាងជើងសាកល្បងរ៉ុកកែតចម្ងាយឆ្ងាយលើកទី ៤ កាលពីថ្ងៃអាទិត្យសប្ដាហ៍មុន និងមានការថ្កោលទោសយ៉ាងខ្លាំង។
លោក Ri Yon-gil ត្រូវបានតែងតាំងជាអគ្គមេបញ្ជាការយោធាក្នុងឆ្នាំ ២០១៣ ដោយមានការពេញចិត្តពីគីម ជុងអ៊ុន ហើយតែងតែអមដំណើរចុះពិនិត្យមើល សមយុទ្ធយោធា និងកងកម្លាំងយោធាប្រជាជនទៀតផង។ តែទោះជាយ៉ាងណាក្ដី លោក Ri បានអវត្តមានពីកិច្ចប្រជុំរួមមួយរវាងគណបក្ស និងយោធា ព្រមទាំងព្រឹត្តិការណ៍សាកល្បងរ៉ុកកែតចម្ងាយឆ្ងាយកាលពីថ្ងៃអាទិត្យកន្លងទៅដែរ។
ជាទូទៅ កូរ៉េខាងជើងកម្រប្រកាសជាផ្លូវការណាស់ ចំពោះការកាត់ទោសប្រហារជីវិតមន្ត្រីជាន់ខ្ពស់នានា។ ចំណែកឪពុកមា មេដឹកនាំកូរ៉េខាងជើងគីម ជុង អ៊ុន លោកចាង ស៊ុង ធែក ដែលគេគិតថាជាមនុស្សមានឥទ្ធិពលបំផុតទីពីរ នៅកូរ៉េខាងជើង ក៏ត្រូវប្រហារជីវិតពីបទពុករលួយក្នុងឆ្នាំ ២០១៣ ផងដែរ៕
គីម ជុងអ៊ុន និងការតេស្ដរ៉ុកកែត ចម្ងាយឆ្ងាយកាលពីថ្ងៃអាទិត្យទី ៧កុម្ភៈ
ចុចអាន៖ កូរ៉េខាងជើង បង្កើតស្រាដែលផឹកហើយមិនស្រវឹង
ប្រែសម្រួល៖ ឡេង ភារុណ ប្រភព៖ Yonhap