ផៃ សុខ គ្រូជម្រើសជាតិកីឡាអត្តពលកម្មកម្ពុជាបង្ហាញស្នាដៃឆ្នាំ២០១៥
- 2016-02-11 17:04:57
- ចំនួនមតិ 0 | ចំនួនចែករំលែក 0
ផៃ សុខ គ្រូជម្រើសជាតិកីឡាអត្តពលកម្មកម្ពុជាបង្ហាញស្នាដៃឆ្នាំ២០១៥
ចន្លោះមិនឃើញ
លោក ផៃ សុខ គ្រូជម្រើសជាតិកីឡាអត្តពលកម្មកម្ពុជា ដណ្ដើមបានមេដាយមាស១ ប្រាក់៥ និងសំរឹទ្ធ៣ ក្នុងព្រឹត្តិការណ៍កីឡា ASEAN Para Games ក្នុងឆ្នាំ២០១៥ នៅប្រទេសសិង្ហបុរីកាលពីពេលកន្លងទៅនេះ។
លោក ផៃ សុខ បានឲ្យដឹងថា លោកជាគ្រូជម្រើសជាតិអត្តពលកម្មកម្ពុជាតាំងពីឆ្នាំ១៩៩៦មកម្ល៉េះ បើគិតមកដល់ពេលនេះមានស្នាដៃជាច្រើន ដែលលោកដណ្ដើមបានមេដាយជូនជាតិ។ ក្នុងឆ្នាំ២០១៥នេះលោកបានដឹកនាំកូនសិស្សរបស់ខ្លួនទៅប្រកួតក្នុងព្រឹត្តិការណ៍កីឡា ASEAN Para Games នៅប្រទេសសិង្ហបុរី ដែលដណ្ដើមបានមេដាយមាស១ ប្រាក់៥ និងសំរឹទ្ធ៣។
គ្រូអត្តពលកម្មរូបនេះបន្តថា ផ្នែកកីឡារបស់លោកចេញទៅប្រកួតនៅក្រៅប្រទេសក្នុងព្រឹត្តិការណ៍កីឡាធំៗ ជាញឹកញាប់តែងនាំយកមេដាយជួនជាតិសឹងរាល់ឆ្នាំ។ លោកក៏សូមអំពាវនាវដល់ប្រិយមិត្តដែលនិយមប្រើបណ្ដាញសង្គម Facebook ចូលរួមបោះឆ្នោតឲ្យលោកបានជាប់ជាគ្រូបង្វឹកឆ្នើមប្រចាំឆ្នាំ២០១៥នេះផងដែរ។
គណៈកម្មាធិការជាតិអូឡាំពិកកម្ពុជា (NOCC) បានរៀបចំបង្កើតកម្មវិធីជ្រើសរើសអត្តពលិក ឆ្នើមប្រចាំឆ្នាំ២០១៥នេះដែលឧបត្ថម្ភដោយ NagaWorld។ រង្វាន់គ្រូបង្វឹកល្អប្រចាំឆ្នាំជយលាភីលេខ១ ទទួលបានប្រាក់ចំនួន២ពាន់ដុល្លារអាមេរិក ក្នុងនោះមានបេក្ខភាពប្រកួតប្រជែងគ្រូល្អនេះចំនួន១០រូប៕
អត្ថបទ៖ ស្រី សុវណ្ណដារ៉ា