គង់ សំបូរ បង្ហើបថា អយុត្តិធម៌ជាឧបសគ្គដណ្ដើមខ្សែក្រវាត់ K-Cement វគ្គ៣

2016-02-12 21:20:30
ចំនួនមតិ 0 | ចំនួនចែករំលែក 0

ចន្លោះមិនឃើញ

អ្នកប្រដាល់វ័យក្មេងមានសមត្ថភាពលេចធ្លោក្នុងចំណោមបេក្ខភាពប្រជែងខ្សែក្រវាត់ K-Cement វគ្គ៣កីឡាករ គង់ សំបូរ យល់ឃើញថា រឿងអយុត្តិធម៌ជាឧបសគ្គនៃក្នុងការប្រកួតដណ្តើមខ្សែក្រវាត់នេះ ដែលនឹងធ្វើឡើងរៀងរាល់ថ្ងៃសៅរ៍ ចាប់ពីទី២០ ខែកុម្ភៈ ឆ្នាំ២០១៦ នៅសង្វៀនអាស៊ីអាគ្នេយ៍។

ជើងខ្លាំងប្រភេទទម្ងន់៦០គីឡូក្រាម គង់ សំបូរ បានឲ្យដឹងថា គ្រប់ស្ថានីយទូរទស្សន៍នៅក្នុងប្រទេសកម្ពុជា តែងមានកីឡាករប្រចាំប៉ុស្តិ៍ផ្ទាល់ខ្លួន។ រូបគេជាមិនមែនជាកីឡាករវ៉ៃប្រចាំប៉ុស្តិ៍ ហេតុនេះត្រូវធ្វើយ៉ាងណាវ៉ៃឲ្យឈ្នះពិន្ទុដាច់ ឬផ្ដួលដៃគូឲ្យសន្លប់ទើបអាចឈ្នះបាន។

សំបូរ បានសំដែងក្ដីព្រួយបារម្ភថា ការប្រកួតដណ្ដើមខ្សែក្រវាត់នេះ ព្រួយខ្លាចគ្មានភាពសុក្រឹត។ បើសិនកម្មវិធីរៀបចំបានល្អ មានថ្នាក់ដឹកនាំមន្ត្រីជាន់ខ្ពស់ចូលរួមទស្សនា ដែលអាចនាំឲ្យការប្រកួតមានភាពយុត្តិធម៌ រូបគេមានទំនុកចិត្តខ្ពស់ថា នឹងឈ្នះខ្សែក្រវាត់នេះមិនខាន។

ខ្សែក្រវាត់ K-Cement វគ្គ៣នេះ ប្រកួតក្នុងប្រភេទទម្ងន់៦០គីឡូក្រាម ដែលមានកីឡាករចូលរួមប្រកួតចំនួន៨រូបគឺ គង់ សំបូរ, វ៉េង សុភ័ក្រ, ម៉ន ព្រំម៉ាញ, សុខ វាសនា, ឯម សាវិន, ង៉ែត រដ្ឋា, ហេង វាសនា និងផាន់ សារុន។ របៀបប្រកួតជាលក្ខណៈវិលជុំសន្សំពិន្ទុ អ្នកមានពិន្ទុតិចជាងគេចំនួន២នាក់នឹងត្រូវធ្លាក់ចេញជាបន្ទាប់ៗ រហូតរកឃើញអ្នកខ្លាំង ៤រូបប្រកួតវគ្គពាក់កណ្ដាលផ្ដាច់ព្រ័ត្រ។

កម្មវិធីប្រកួតដណ្ដើមខ្សែក្រវាត់ខាងលើត្រូវបានប្រកាសបើកការប្រកួតកាលពីព្រឹកថ្ងៃទី១២ ខែកុម្ភៈ ឆ្នាំ២០១៦។ សម្រាប់ប្រាក់រង្វាន់អ្នកឈ្នះជើងឯកទទួលបាន៣០០០ដុល្លារអាមេរិក ជើងឯករងទទួលបាន ២០០០ដុល្លារអាមេរិក ចំណាត់ថ្នាក់លេខ៣ទទួលបាន ១៥០០ដុល្លារអាមេរិក និងចំណាត់ថ្នាក់លេខ៤ទទួលបាន១០០០ ដុល្លារអាមេរិក៕