អាយុ ១៥ ឆ្នាំ តែអាចនិពន្ធសៀវភៅជាភាសាអង់គ្លេសបានយ៉ាងល្អ
- 2016-02-12 22:48:51
- ចំនួនមតិ 0 | ចំនួនចែករំលែក 0
អាយុ ១៥ ឆ្នាំ តែអាចនិពន្ធសៀវភៅជាភាសាអង់គ្លេសបានយ៉ាងល្អ
ចន្លោះមិនឃើញ
“មានពេលមួយខ្ញុំគិតថា ហេតុអ្វីយើងត្រូវអានតែសៀវភៅដែលគេសរសេរ? ហេតុអ្វីយើងមិនបង្កើតសៀវភៅមួយជារបស់ខ្លួន ដោយប្រាប់អ្វីដែលដឹងទៅអ្នកដទៃ ហើយសរសេរវាចេញមកឲ្យគេបានដឹងផង?” នេះជាកាលើកឡើងរបស់យុវជន សុក ខៀវសមិទ្ធិ អ្នកនិពន្ធវ័យក្មេង អាយុទើប១៥ឆ្នាំ តែរូបគេបានបង្កើតស្នាដៃសម្រាប់ខ្លួនឯងដោយនិពន្ធសៀវភៅជាភាសាអង់គ្លេសបានយ៉ាងល្អ។
យុវជននេះកំពុងសិក្សាថ្នាក់ទី៩នៅសាលាអន្តរជាតិភ្នំពេញ និពន្ធសៀវភៅតាំងពីអាយុ១១ឆ្នាំ ដែលមកទល់ពេលនេះបានចំនួន៤ក្បាលរួមមាន Midknight , Knightfall, Nikolai និងចុងក្រោយគឺសៀវភៅ The Wildland ។
រូបគេបានចំណាយពេលជិត១ឆ្នាំទៅលើការតែងនិពន្ធរាល់សៀវភៅនីមួយៗ។ ជាក់ស្ដែង សៀវភៅ The Wildland ជាប្រភេទប្រលោមលោកបែបវិទ្យាសាស្ត្រ ដែលសាច់រឿងកើតឡើងនៅក្នុងស.វ ទី១៨ ដោយសរសេរចេញពីការគិតស្រមៃ និងភាពច្នៃប្រឌិតរបស់ខ្លួនផ្ទាល់។
សមិទ្ធិ ថារូបគេបានចំណាយទាំងកម្លាំងកាយនិងចិត្តពេលនិពន្ធសៀវភៅ ហើយជួបការលំបាកខ្លះៗដោយសារមិនសូវមានពេលគ្រប់គ្រាន់ តែរូបគេសង្ឃឹមថាសៀវភៅនេះល្អដល់អ្នកអាន និងជាទុនព្រមទាំងជាចំណេះដឹងដល់មនុស្សគ្រប់គ្នា។ ទន្ទឹមនឹងនេះ រូបគេនឹងបរិច្ចាគប្រាក់ដែលបានពីការលក់សៀវភៅទាំងនេះទៅមន្ទីរពេទ្យគន្ធបុប្ផា២៥% ផងដែរ។
សមិទ្ធិ ប្រាប់ថា អ្នកណាក៏អាចសរសេរឬនិពន្ធអ្វីដែលចេញពីការគិតរបស់ខ្លួនបានដែរ។ នៅពេលមានគំនិតចង់បង្កើតជាសាច់រឿងអ្វីមួយអាចសរសេរឲ្យគេដឹងបាន ហើយវាជាការចែករំលែកយ៉ាងល្អសម្រាប់មនុស្សគ្រប់គ្នា។ ការធ្វើអ្វីមួយតែងជួបការលំបាក មិនថានិពន្ធចម្រៀងឬសៀវភៅនោះទេគឺត្រូវចាប់ផ្ដើមធ្វើ ព្យាយាមកុំបោះបង់ ព្រោះអ្នកណាក៏ដោយពេលចាប់ផ្ដើមធ្វើដំបូងគឺមិនបានល្អឥតខ្ចោះឡើយ តែបើបន្តធ្វើនោះនឹងបានល្អហើយល្បីល្បាញមិនខាន៕
អត្ថបទ៖ លឹម សុនា