បិសាចក្រហម អាចធ្វើស៊ីឆ្មាខ្មៅ Sunderland បានអត់យប់នេះ?

2016-02-13 20:31:41
ចំនួនមតិ 0 | ចំនួនចែករំលែក 0

ចន្លោះមិនឃើញ

ក្រុមបិសាចក្រហម Manchester United នឹងត្រូវធ្វើដំណើរទៅកីឡដ្ឋាន Stadium of Light ដើម្បីប៉ះក្រុមឆ្មាខ្មៅ Sunderland ក្នុងការប្រកួត Premier League សប្ដាហ៍ទី២៦ នាវេលាម៉ោង០៧:៤៥នាទីយប់នេះ។

កាលប៉ះគ្នាជើងទី១ នៅទឹកដី Old Trafford បិសាចក្រហម បានលត់ ៣-០ រួចមកហើយ ខណៈដែលយប់នេះ Man Utd ក៏ត្រូវការឈ្នះជាចាំបាច់ទៀត ដើម្បីបន្តសង្ឃឹមប្រជែងយក Top 4 រីឯ Sunderland ក៏ត្រូវការយក៣ពិន្ទុដែរ ដើម្បីគេចខ្លួនពីតំបន់កាត់ចោល ព្រោះបច្ចុប្បន្នក្រុមនេះកំពុងស្ថិតនៅចំណាត់ថ្នាក់លេខ១៩។

ជើងកីឡាករ៖

ម្ចាស់ផ្ទះ Sunderland របស់លោក Sam Allardyce នឹងគ្មានវត្តមានរបស់ Adam Johnson ទេ បន្ទាប់ពីក្លឹបបញ្ចប់កុងត្រា ដោយសាររឿងកីឡាកររូបនេះពាក់ព័ន្ធជាមួយបទល្មើសបៀតបៀនផ្លូវភេទលើកុមារ ខណៈដែល Jeremain Lens, Younes Kaboul និង Duncan Watmore ក៏នឹងអវត្តមានដោយសាររបួស។ ដូច្នេះ១១នាក់ដំបូងរបស់ឆ្មាខ្មៅ អាចជា៖ Mannone; Jones, O'Shea, Kone, Van Aanholt; Kirchhoff, Cattermole, M'Vila; Khazri, N'Doye, Defoe។

រីឯក្រុមភ្ញៀវ Man Utd កីឡាករ Guillermo Varela, Phil Jones និង Adnan Januzaj បានរងរបួសកាលលេងឲ្យក្រុម U-21 ខណៈដែល Bastian Schweinsteiger, Luke Shaw, Marcos Rojo, Antonio Valencia និង Ashley Young នឹងបន្តអវត្តមានដដែល ដោយសាររបួសរយៈពេលយូរ។ ដូច្នេះ១១នាក់របស់ក្រុមលោក Louis van Gaal អាចជា៖ De Gea; Darmian, Smalling, Blind, Borthwick-Jackson; Carrick, Fellaini; Lingard, Mata, Martial; Rooney។

ប្រវត្តិជួបគ្នា និងស្ថិតិមួយចំនួន៖

- Man Utd ចាញ់តែ១ដងប៉ុណ្ណោះ ក្នុងការប្រកួតក្នុងលីគ២៧ប្រកួតចុងក្រោយទល់នឹង Sunderland (ឈ្នះ២០, ស្មើ៦)។

Sunderland ឈ្នះ Man Utd ក្នុងដីខ្លួនឯងលើកចុងក្រោយ (២-១) ក្នុងការប្រកួត Premier League នៅទឹកដី Roker Park តាំងពីឆ្នាំ១៩៩៧។ ប៉ុន្តែពួកគេ ធ្លាប់ឈ្នះបិសាចក្រហម នៅ League Cup វគ្គពាក់កណ្ដាលផ្ដាច់ព្រ័ត្រជើងទី១ នៅ Stadium of Light កាលឆ្នាំ២០១៤។