សាវិន ហ្វីលីព និយាយពីសមត្ថភាពដឹកនាំរឿងដ៏អស្ចារ្យរបស់ Angelina Jolie
- 2016-02-16 19:05:04
- ចំនួនមតិ 0 | ចំនួនចែករំលែក 0
សាវិន ហ្វីលីព និយាយពីសមត្ថភាពដឹកនាំរឿងដ៏អស្ចារ្យរបស់ Angelina Jolie
ចន្លោះមិនឃើញ
ទីបំផុតទៅ សាវិន ហ្វីលីព ព្រមទទួលស្គាល់ថា បានចូលរួមសម្ដែងរឿង "មុនដំបូងខ្មែរក្រហមសម្លាប់ប៉ាខ្ញុំ" របស់ Angelina Jolie ហើយ និងបានពោលសរសើរពីសមត្ថភាពដឹកនាំដ៏អស្ចារ្យ និងការលះបង់ខ្ពស់របស់តារាហូលីវូដរូបនេះទៀតផង។
“ខ្ញុំគិតថា គាត់ជាអ្នកដឹកនាំរឿងមួយដ៏អស្ចារ្យ ដោយគំនិតគាត់ Reflex ព្រោះអីពេលខ្លះ Scene ថ្មីៗគាត់បង្កើតភ្លាមដោយគំនិតផ្ទាល់"។ សាវីន ហ្វីលីព ថ្លែងមកកាន់ Sabay។ លោកបន្តថា Angelina Jolieទ្រាំឈរក្រោមកម្ដៅថ្ងៃដ៏ក្ដៅបញ្ជាការថតដឹកនាំរឿង។ ហើយនាងជាអ្នកដឹកនាំរឿងម្នាក់ ដែលយល់ពីស្ថានភាពតួសម្ដែងខ្មែរទៀតផង។
តួកម្មាភិបាលរូបនេះបន្ថែមថា Angelina Jolie តែងញញឹមដោយភាពរាក់ទាក់មកកាន់តួសម្ដែងទាំងអស់មុនដំណើរការថត និងលើកទឹកចិត្តរាល់ពេលថតចប់។ ម្ចាស់មូលនិធិជួយកុមាររូបនេះអះអាងថា ប្រការនោះហើយ ធ្វើឱ្យលោក ក៏ដូចជាតួសម្ដែងទាំងអស់តាំងចិត្តសម្ដែងអស់ពីបេះដូង។ លោកមិនដែលបានជួបប្រទះអ្នកដឹកនាំរឿងបែបនេះទេ៕
អត្ថបទ៖ សំ ជំនាញ