កែវ វាសនា លាតត្រដាងពីស្ត្រីម្នាក់ដែលជាដៃគូរកស៊ីជាមួយគ្នា

2016-03-02 17:46:43
ចំនួនមតិ 0 | ចំនួនចែករំលែក 0

ចន្លោះមិនឃើញ

លោក កែវ វាសនា បានប្រកែកថា ស្ត្រីម្នាក់ដែលចូលហ៊ុនបើកហាងគ្រឿងសម្អាងជាមួយលោក មិនមែនជាភរិយាលោកឡើយ គ្រាន់តែមិត្តភ័ក្ដិប៉ុណ្ណោះ។

លោកថ្លែងបែបនេះ បន្ទាប់ពីប្រភពដែលសូមមិនបញ្ចេញឈ្មោះមួយបង្ហើបថា កែវ វាសនា កំពុងមានទំនាក់ទំនងជាមួយជាកូនមន្ត្រីធំម្នាក់ ដែលមានទ្រព្យច្រើន ហើយបានចូលហ៊ុនរកស៊ីជាមួយគ្នាថែមទៀតផង។ ប្រភពដដែលបានឲ្យដឹងទៀតថាតារាចម្រៀងមកពីខេត្តកំពង់ឆ្នាំងរូបនេះ និងស្ត្រីម្នាក់នោះ តែងហៅគ្នាប្ដីប្រពន្ធជានិច្ច ទោះបីមិនទាន់រៀបការក្ដី ។ ជាមួយគ្នានោះ ភាគីខាងស្រី ក៏តែងតែជួយផ្គត់ផ្គង់តារាចម្រៀងម្នាក់នេះជានិច្ចទាំងរថយន្តជិះរាល់ថ្ងៃ ក៏ដូចជាការរកស៊ីជាដើម។ ទោះបែបនេះក្ដី លោក កែវ វាសនា បានប្រកែក ដោយតារាចម្រៀងម្នាក់នេះបញ្ជាក់ថា ស្ត្រីម្នាក់នោះ មិនមែនជាសង្សារ ឬជាប្រពន្ធលោកឡើយ ពោលគឺគ្រាន់តែជាមិត្តភ័ក្ដិ តែជិតស្និទ្ធប៉ុណ្ណោះ។ ម្ចាស់បទ "កូលាបពុលដី" រូបនេះ បានបន្តទៀតថា លោកបានស្គាល់គ្នាជាង៥ឆ្នាំមកហើយ ហើយដោយសារទំនាក់ទំនងមានភាពជិតស្និទ្ធ ទើបធ្វើឲ្យមនុស្សមួយចំនួនច្រឡំថាសង្សារនឹងគ្នា។ យ៉ាងណា លោកអះអាងថា ទំនាក់ទំនងពួកលោក គ្រាន់ជាមិត្តភក្ដិប៉ុណ្ណោះ ។ តារាចម្រៀងម្នាក់នេះ បានបន្តទៀតថា ដោយសារតែមានទំនាក់ទំនងជិតស្និទ្ធមានការទុកចិត្តគ្នាបែបនេះ ទើបលោកបានសម្រេចចិត្តដាក់ទុនរកស៊ីជាមួយគ្នា។ ហាងដែលលោកបើកជាង២ខែមុននោះ គឺលក់ផលិតផលគ្រឿងសម្អាងនាំចូលពីប្រទេសម៉ាឡេស៊ី។ ដើមទុនបើកហាងខាងលើ ត្រូវបានតារាចម្រៀងម្នាក់នេះ ទម្លាយឲ្យដឹងថា អស់រហូតដល់ទៅជិត៣ម៉ឺនដុល្លារ។ ទោះយ៉ាងនេះក្ដី ទីតាំងក៏ដូចជាយីហោហាង លោក កែវ វាសនា មិនបានបញ្ជាក់ឲ្យដឹងឡើយ។ វិលមកទំនាក់ទំនងជាមួយនារីខាងលើ ទៅថ្ងៃខាងមុខ តើអាចឈានដល់ដំណាក់កាលមានស្នេហាជាមួយគ្នា ឬយ៉ាងណានោះ កែវ វាសនា បញ្ជាក់ថា មិនហ៊ានសន្និដ្ឋានមុនឡើយ៕ អត្ថបទ៖ ខុត សីហា