Facebook នឹងមានអ្នកប្រើប្រាស់ដែលស្លាប់ ច្រើនជាងអ្នកមានជីវិតត្រឹមឆ្នាំ ២០៩៨

2016-03-09 17:04:05
ចំនួនមតិ 0 | ចំនួនចែករំលែក 0

ចន្លោះមិនឃើញ

Facebook កំពុងតែវិវត្តន៍ខ្លួនទៅជាផ្នូរសិប្បនិម្មិតដែលធំជាងគេបង្អស់ក្នុងពិភពលោកនៅត្រឹមឆ្នាំ ២០៩៨ខាងមុខនេះ។ នៅចុងបញ្ចប់នៃសតវត្សទី២១នេះចំនួនអ្នកប្រើប្រាស់ដែលបាត់បង់ជីវិតនឹងកើតឡើងលើសចំនួនអ្នកដែលមានជីវិត។ នេះបើយោងតាមការព្យាកររបស់បេក្ខភាពបណ្ឌិតមួយរូប។

ការកើនឡើងចំនួនអ្នកប្រើប្រាស់ដែលស្លាប់នេះដោយសារតែការសម្រេចចិត្តរបស់ Facebook ដែលមិនព្រមលុបចោលគណនីអ្នកបាត់បង់ជីវិតដោយស្វ័យប្រវត្តិ ពោលទុកគណនីទាំងនោះជាទំព័រសម្រាប់រំលឹកវិញ្ញាណខ័នអ្នកស្លាប់។

យោងតាមសម្ដីរបស់លោក Hachem Sadikki បេក្ខភាពបណ្ឌិតនៃសកលវិទ្យាល័យ Massachusetts ដែលធ្វើការព្យាករនេះឡើង បានឲ្យដឹងថាការកើនឡើងយឺតនូវចំនួនអ្នកប្រើប្រាស់ថ្មីក៏ជាដើមហេតុមួយដែរ។

ប្រសិនក្រឡេកមើលទិន្នន័យក្នុងឆ្នាំនេះផ្ទាល់ អ្នកប្រើប្រាស់ច្រើនជាង១លាននាក់ត្រូវបានព្យាករថានឹងបាត់បង់ជីវិត។ បើប្រៀបទៅនឹងតួលេខឆ្នាំ ២០១០ គឺមានត្រឹម ៣៨៥ ០០០នាក់ប៉ុណ្ណោះ។

មនុស្សភាគច្រើនហាក់មិនបានចែករំលែកលេខសម្ងាត់ Facebook របស់ពួកគេជាមួយនឹងមិត្តភ័ក្ដិឬក្រុមគ្រួសារឡើយ ហេតុនេះ Profile របស់ពួកគេនៅតែមានជីវិតទោះបីជាម្ចាស់ Profile បានបាត់បង់ជីវិតក្ដី។ ជាពិសេសពេលដល់ថ្ងៃកំណើតរបស់បុគ្គលដែលស្លាប់នោះតែងតែឃើញលោតសាររំលឹកឲ្យជូនពរជានិច្ច។

គួរបញ្ជាក់ថាបណ្ដាញ Facebook ក៏បានបង្កើតមុខងារ "Legacy Contact” ដែលអាចកំណត់ឲ្យ Facebook លុបគណនីរបស់អ្នកស្លាប់បាន ពេលដែលដឹងថាម្ចាស់គណនីនោះបានបាត់បង់ជីវិត។ ប៉ុន្តែហាក់មានអ្នកប្រើប្រាស់មួយចំនួនតូចប៉ុណ្ណោះដែលបានដឹងនិងប្រើប្រាស់មុខងារនេះ៕

ចុចអាន៖ ច្បាប់នៅបារាំងអាចឲ្យកូនៗប្ដឹងឪពុកម្ដាយដែលបង្ហោះរូបថតពួកគេលើ Facebook បាន

ប្រែសម្រួល៖ ហៃ សុខហេង ប្រភព៖ FossBytes