មាស សុខរតនៈ៖ "ពុកខ្ញុំជាប៉ូលិសចរាចរណ៍ ជាភស្តុតាងការវិវឌ្ឍន៍ ជាវិជ្ជមាន នៃចម្រៀងសម័យ”

2016-03-16 02:43:01
ចំនួនមតិ 0 | ចំនួនចែករំលែក 0

ចន្លោះមិនឃើញ

លោក មាស សុខរតនៈ អ្នកចាត់ការទូទៅផលិតកម្មថោន បានប្រាប់ Sabayថា បទចម្រៀងពុកខ្ញុំជាប៉ូលិសចរាចរណ៍ គ្រាន់តែជាការចាប់ផ្ដើមប៉ុណ្ណោះ សម្រាប់ការបញ្ជាក់អោយជនរួមជាតិដឹងពីការងើបឡើងយ៉ាងត្រដែតរបស់សិល្បៈតន្ត្រី originalខ្មែរ។

“ខ្ញុំយល់ថា Sabayបានឃើញហើយពីការខិតខំរបស់យើង ក្នុងការជួយសិល្បៈសម័យ មិនថាផ្នែកបទភ្លេងថ្មី អត្ថន័យអត្ថរូប និង អត្ថរសដែលសង្ឃឹមនាំទៅដដល់ការកែប្រែទស្សនៈអវិជ្ជមាន ភាពអគតិទៅលើមន្ត្រីរាជការកងកម្លាំងសណ្ដាប់ធ្នាប់ដែលបានពលិកម្មក្នុងវិជ្ជាជីវៈហើយភាគច្រើនត្រូវបានមើលរំលង” លោកនិយាយដូច្នេះមកកាន់ Sabay នៅខណៈដែល បទចម្រៀងចេញជា MVមិនដល់ប៉ុន្មានម៉ោងក៏ទទួលបានការគាំទ្រយ៉ាងពេញទំហឹងពីគ្រប់ស្រទាប់អ្នកទស្សនា។

អ្នកគ្រប់គ្រងរូបនេះបន្តទៀតថា៖ “អ្នកនិពន្ធ យឹម តាស្រង់ ដ៏ឆ្នើមរបស់យើង បានប្រើប្រាស់ពេលវេលាត្រិះរិះ ស្វែងយល់សាកសួរ និងចងក្រងនូវបទនិពន្ធដ៏មានអត្ថន័យនេះឡើង! ហើយនេះជាមោទនភាពសម្រាប់ផលិតកម្ម ក៏ដូចជាមោទនភាពសម្រាប់សិល្បៈខ្មែរទាំងមូល”។

បទចម្រៀង ពុកខ្ញុំជាប៉ូលិសចរាចរណ៍ បានចេញនៅឆ្នាំ ២០១៥ ច្រៀងដោយ កញ្ញា សាយចៃ ហើយត្រូវបានផលិតជា MVចប់សព្វគ្រប់នៅខែ កុម្ភៈ ឆ្នាំនេះ ព្រមទាំងដាក់បង្ហាញចេញនៅខែមីនាសប្ដាហ៍កន្លងទៅ។

លោក មាស សុខរតនៈ បានបន្ថែមទៀតថា អ្នកដឹកនាំរឿងវ័យក្មេងដ៏មានកេរ្តិ៍ឈ្មោះរបស់ផលិតកម្មថោន គឺ លោក ប៊ុន រតនា ហៅសេម បានសម្រិតសម្រាំងរូបភាព ទស្សនវិជ្ជានៅក្នុងផ្ទាំងនិមួយៗរបស់ MVនេះដោយយកចិត្តទុកដាក់ ធ្វើយ៉ាងណាឆ្លើយតបទៅនឹងអត្ថន័យបទនិពន្ធព្រមទាំងឆ្លុះបញ្ចាំងពីការពិតក្នុងសង្គមរស់នៅ។

“សេមគាត់ជាDirector ដ៏មានសមត្ថភាព និងមនសិការសង្គម! ការងារបែបនេះបើមិនយកបេះដូងទៅធ្វើ គឺធ្វើមិនចេញមកល្អបែបនេះឡើយ! ខ្ញុំ មានមោទនភាពក្នុងការរួមការងារជាមួយយុវវ័យទាំងពីរហើយសង្ឃឹមថាស្នាដៃក្រោយៗរបស់គាត់នឹងរួមចំណែកធំធេងជាងនេះក្នុងការបង្កើតទស្សនៈវិជ្ជមានក្នុងសង្គមយើង!!”៕

កាលពីពេលថ្មីៗនេះដែរ សម្ដេចតេជោ ហ៊ុន សែន នាយករដ្ឋមន្រ្តី នៃព្រះរាជាណាចក្រកម្ពុជា បានបង្ហោះសារមួយនៅលើគណនី ហ្វេសបុក ផេក របស់សម្ដេច ដោយបានសម្ដែងការសោកស្ដាយ ចំពោះការបាត់បង់មន្រ្តីនគរបាលម្នាក់ និង បានចូលរួមរំលែកទុក្ខក្រុមគ្រួសារនៃសព ព្រមទាំងបានជ្រើសរើសបទ "ពុកខ្ញុំជាប៉ូលិសចរាចរណ៍" ចែកជូនជនរួមជាតិ ដែលជាផ្នែកមួយដាស់អារម្មណ៍ដល់មហាជនឲ្យគោរពច្បាប់ចរាចរណ៍ផង និង ឲ្យតម្លៃនគរបាលចរាចរណ៍ផង៕