តាពិការដៃសងខាង ប្រឹងបង្កើតដៃសិប្បនិមិត្តជួយជនពិការដូចគ្នាជាង១០០០នាក់

2016-03-17 14:59:15
ចំនួនមតិ 0 | ចំនួនចែករំលែក 0

ចន្លោះមិនឃើញ

អ្នកភូមិពិការដៃសងខាងចំណាស់ម្នាក់ បានជួបប្រទះជីវិតថ្មីមួយទៀត ក្រោយលោកតាទើបបំពាក់ដៃសិប្បនិមិត្តខ្លួនឯង ដោយគំនិតច្នៃប្រឌិតផ្ទាល់ខ្លួន ហើយលោកក៏បានជួយមនុស្សរាប់ពាន់នាក់ផ្សេងទៀតដែរ ដែលបាត់បង់ដៃដូចគាត់។

លោកតាមានឈ្មោះ ស៊ុន ជីហ្វា អាយុ ៦៣ឆ្នាំ រស់នៅភូមិ Guanma ខេត្តជីជីន ភាគឦសានប្រទេសចិន។ លោកតាបានចូលរួមធ្វើកងទ័ព និងបម្រើជាក្រុមទាហានកាំភ្លើងធំ ក្នុងឆ្នាំ ១៩៧៤ ចាប់តាំងពីពេលនោះមកគាត់ចូលចិត្ត និងចេះបំផ្ទុះគ្រាប់យ៉ាងស្ទាត់ជំនាញ។

លោកតា ស៊ុន បានចូលនិវត្តន៍នៅ៥ឆ្នាំក្រោយទាំងវ័យក្មេង និងបានរៀបការ ពេលត្រលប់ទៅផ្ទះវិញ។ ក្នុងឆ្នាំ ១៩៨០ គាត់បានរៀបចំគ្រាប់បែកច្នៃដើម្បីបំផ្ទុះចាប់ត្រីក្នុងស្រះ ប៉ុន្តែជាអកុសលរំសេវគ្រាប់ បានផ្ទុះខុសបច្ចេកទេស ដោយការទ្រនិចកំណត់នាទីផ្ទុះមិនដំណើរការ ធ្វើឲ្យផ្ទុះភ្លាមៗ បណ្ដាលឲ្យគាត់រងរបួសដៃយ៉ាងធ្ងន់ធ្ងរ។

ដោយសារតែរបួសមិនអាចស្រោចស្រង់បាន គ្រូពេទ្យសម្រេចកាត់ដៃទាំងពីរត្រឹមកែងដៃចោលតែម្ដង។ ពេលនោះគាត់មានអាយុ ២៧ឆ្នាំ និងជាពេលគាត់ប្ដេជ្ញាចិត្តធ្វើការជាមួយគ្រឿងដែក ដើម្បីរិះរកកែច្នៃដៃបានប្រើមកវិញ។

អស់រយៈពេលជាង ៣៦ឆ្នាំ លោកតាស៊ុន បានរចនាម៉ូត និងបង្កើតដៃសិប្បនិមិត្តបាន ៤ប្រភេទ ដែលអាចឲ្យគាត់មើលថែខ្លួនឯង និងធ្វើកិច្ចការផ្ទះបាន។ លើសពីនេះ គាត់ និងគ្រួសារ ក៏បានជួយជនពិការជាង ១ពាន់នាក់ផ្សេងទៀតដែរ តាមរយៈដៃសិប្បនិមិត្តនេះ។ មកទល់ពេលនេះ លោកតាសន្យាបន្តពង្រឹងគុណភាពដៃ និងត្រូវជួយមនុស្សឲ្យច្រើនតាមដែលអាចធ្វើបាន៕