គ្រូ Barcelona ថាចាប់ឆ្នោតវគ្គ៨ក្រុម UCL ខ្លាចតែក្រុម១គត់

2016-03-17 18:51:47
ចំនួនមតិ 0 | ចំនួនចែករំលែក 0

ចន្លោះមិនឃើញ

Luis Enrique អ្នកចាត់ការក្រុម FC Barcelona បានលើកឡើងថាក្រុមអ្នកមានបុណ្យរបស់លោក មិនខ្លាចញញើតក្រុមណាឡើយ ក្នុងការចាប់ឆ្នោត UEFA Champions League វគ្គ៨ក្រុម នៅថ្ងៃសុក្រស្អែកនេះ តែលោកបានកំប្លែងលេងថា លោកខ្លាចតែក្រុម១គត់គឺ ក្រុម Barca ខ្លួនឯង។

Barca បានឡើងទៅវគ្គ៨ក្រុម បន្ទាប់ពីបំបាក់ Arsenal សរុបទាំង២ជើង ៥-១ ខណៈដែលតារាឆ្នើម Lionel Messi, Luis Suarez និង Neymar គឺជាអ្នកស៊ុតម្នាក់១គ្រាប់ ជួយឲ្យអ្នកមានបុណ្យឈ្នះ ៣-១ នៅជើងទី២ នាកីឡដ្ឋាន Camp Nou យប់មិញទៀត។

ក្រុមទាំង៨ ដែលត្រូវចាប់ឆ្នោតថ្ងៃស្អែកគឺមាន Barcelona, Bayern Munich, Atletico Madrid, Real Madrid, Paris Saint-Germain, Manchester City, Wolfsburg និង Benfica ប៉ុន្តែអ្នកចាត់ការសញ្ជាតិអេស្ប៉ាញ (Enrique) យល់ថាគ្មានក្រុមណាក្នុងចំណោមក្រុមទាំងអស់នេះ ធ្វើឲ្យក្រុមរបស់លោកខ្លាចឡើយ។

អ្នកចាត់ការវ័យ៤៥ឆ្នាំ បានបញ្ជាក់បន្ថែមថា៖ "ក្រុមតែ១គត់ ដែលខ្ញុំមិនចង់ជួបគឺ Barca។ ពិតណាស់ យើងមានកីឡាករល្អៗបំផុត ហើយក្រុមលេងសហការគ្នាបានយ៉ាងល្អ ទាំងផ្នែកប្រយុទ្ធ និងការពារ។ យើងរីករាយ ដែលមាន Messi, Suarez និង Neymar ជាខ្សែប្រយុទ្ធរបស់យើង។ វគ្គ៨ក្រុមនេះ មានន័យថាក្រុមដែលសង្ឃឹមលើកពាន ១ឬ២អាចនឹងធ្លាក់ចេញ ដែលនេះជារឿងល្អសម្រាប់យើង។ ឥឡូវយើងកំពុងរង់ចាំលទ្ធផលនៃការចាប់ឆ្នោត”៕